ប្រមុខរាជរដ្ឋាភិបាល ប្រកាសបន្តស្រាវជ្រាវវែកមុខជនឆបោក ក្នុងគម្រោងរបស់ ឡេង ចាន់ណា ឲ្យដល់ទីបញ្ចប់

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាល នៅតែបន្តតាមវែកមុខជនឆបោកក្នុងគម្រោងរបស់ ឡេង ចាន់ណា ឱ្យដល់ទីបញ្ចប់ និងមិនទុកចោលបញ្ហារបស់ប្រជាពលរដ្ឋ ដោយមិនរកវិធានការដោះស្រាយឱ្យអស់លទ្ធភាពនោះឡើយ ។

ក្នុងឱកាសជួបសំណេះសំណាល ជាមួយបងប្អូនសហគមន៍ខ្មែរ រស់នៅសាធារណរដ្ឋកូរ៉េ នាថ្ងៃទី១៨ ខែឧសភា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍ថា ករណីឆបោករបស់អតីតឧកញ៉ា ឡេង ចាន់ណា សម្តេចបានចាត់វិធានការតាំងពីពាក់កណ្តាលខែកុម្ភៈ ឆ្នាំ២០២៤ បន្ទាប់ពីទទួលបានព័ត៌មាន ដោយសម្តេចបានប្រគល់ភារកិច្ចដល់លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចាប់ផ្តើមសិក្សាករណីនេះ និងរកវិធីសម្របសម្រួលដោះស្រាយ ដូចទៅនឹងករណីគ្រោងអចលនទ្រព្យផ្សេងទៀត។

សម្តេចធិបតី ហ៊ុន ម៉ាណែត បានថ្លែងថា សំណុំរឿងឆបោករបស់ ឡេង ចាន់ណា រាជរដ្ឋាភិបាលមិនបញ្ចប់ទេ ហើយបន្តចាត់វិធានការជាប់រហូត ដោយរាជរដ្ឋាភិបាល នៅតែបន្តតាមវែកមុខជនឆបោកក្នុងគម្រោងរបស់ ឡេង ចាន់ណា។

សម្តេចធិបតីបញ្ជាក់ថា «តាមសំណូមពររបស់ប្រជាពលរដ្ឋ ខ្ញុំបានប្រគល់ភារកិច្ចឱ្យមេធាវីរាជរដ្ឋាភិបាល ដើម្បីជួយធ្វើជាតំណាងឱ្យបងប្អូនជនរងគ្រោះរបស់យើង។ យើងមិនអាចលូកដៃរឿងតុលាការ ប៉ុន្តែយើងផ្តល់មេធាវីដើម្បីជួយដល់បងប្អូន យើងអត់នៅស្ងៀមទេ តាមតទៅទៀត។ ពេលដែលរដ្ឋាភិបាលប្រគល់មេធាវីឱ្យធ្វើហើយបានន័យថា តាមរឿងនេះពីដើមដល់ចប់ នេះគឺជាការបញ្ជាក់នៅការប្តេជ្ញាចិត្ត បើទោះបីរឿងនេះរដ្ឋាភិបាលពីដើមទីមិនបាន ចូលដៃក្នុងការងារនេះ ប៉ុន្តែជាការទទួលខុសត្រូវ និងស្រាវជ្រាវពង្រីកមុខសញ្ញាថែមទៀត តើនរណាពាក់ព័ន្ធទៀត?» ៕