រយៈពេលត្រឹម ១ឆមាសក្នុងឆ្នាំ២០២៤ អ្នកក្នុងបន្ទុកមន្រ្ដីសាធារណៈជាង ៤ម៉ឺននាក់ បានចុះឈ្មោះចូលជាសមាជិក ប.ស.ស.

ភ្នំពេញ៖ ឯកឧត្តមវេជ្ជបណ្ឌិត ស៊ុ សោភ័ណ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងថា ក្នុងរយៈពេលមិនដល់ ១ឆមាសពេញលេញផង អ្នកក្នុងបន្ទុករបស់មន្រ្ដីសាធារណៈដែលជាសមាជិក ប.ស.ស. សរុបប្រមាណជាង ៤ម៉ឺននាក់ទៅហើយ បានមកចុះឈ្មោះចូលជាសមាជិក ប.ស.ស. ដើម្បីអាចទទួលបានអត្ថប្រយោជន៍របបសន្តិសុខសង្គម ដែលផ្តល់ដោយ ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ ដែលក្នុងនោះ អ្នកក្នុងបន្ទុកមន្រ្ដីសាធារណៈ ដែលជាសហព័ទ្ធមានចំនួន ១១ ៦៥១នាក់ និងអ្នកក្នុងបន្ទុកដែលជាកូនរបស់មន្រ្ដីសាធារណៈមានចំនួន ៣០ ៧២៩នាក់។

ថ្លែងក្នុងពិធិបើកការផ្សព្វផ្សាយរបបសន្ដិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្រ្ដីសាធារណៈ ជូនថ្នាក់ដឹកនាំ និងមន្រ្ដីក្រោមឱវាទរដ្ឋបាលខេត្តកំពត ឯកឧត្តមវេជ្ជបណ្ឌិតរដ្ឋលេខាធិការ បានថ្លែងបន្តទៀតថា ការចុះឈ្មោះចូលជាសមាជិក ប.ស.ស. ខាងលើនេះ ធ្វើឡើងបន្ទាប់ពីរាជរដ្ឋាភិបាលកម្ពុជាបានសម្រេចពង្រីកវិសាលភាពកំណត់ដាក់ឱ្យអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្រ្តីរាជការសាធារណៈកាលពីខែវិច្ឆិកា ឆ្នាំ២០២៣ កន្លងទៅ។

ឯកឧត្តមវេជ្ជបណ្ឌិតរដ្ឋលេខាធិការ បានឱ្យដឹងទៀតថា ក្រសួងការងារ និងបណ្តុះបណ្តាលវិជ្ជាជីវៈ កន្លងមក រហូតមកដល់ពេលនេះ បានចុះផ្សព្វផ្សាយនៅតាមបណ្ដាក្រសួង-ស្ថាប័ននៅថ្នាក់ជាតិសរុបចំនួន ២៥ក្រសួងរួចមកហើយ ហើយក្រសួងនឹងបន្តយុទ្ធនាការរបស់ខ្លួនក្នុងការផ្សព្វផ្សាយពីកម្មវិធីគោលនយោបាយអាទិភាពរបស់រាជរដ្ឋាភិបាលក្នុងការផ្ដល់អត្ថប្រយោជន៍របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្រ្ដីរាជការសាធារណៈ នៅតាមបណ្តារាជធានី-ខេត្ត ដើម្បីឱ្យថ្នាក់ដឹកនាំ ក៏ដូចជាមន្រ្តីសាធារណៈទាំងអស់ទទួលបាននូវព័ត៌មាន និងចំណេះដឹងស្តីពីរបបសន្តិសុខសង្គម ក្នុងការទទួលបានការគាំពារយ៉ាងពេញលេញសម្រាប់ខ្លួនឯង រួមទាំងអ្នកនៅក្នុងបន្ទុករបស់ខ្លួន។

ឯកឧត្តម ខៀវ រិទ្ធិភ័ណ្ឌ អភិបាលរង នៃគណៈអភិបាលខេត្តកំពត ក៏បានជំរុញឱ្យមន្រ្តីសាធារណៈ ទាំងអស់ដែលចំណុះឱ្យរដ្ឋបាលសាលាខេត្តកំពត ដែលមិនទាន់នាំប្តី-ប្រពន្ធ ឬកូនដែលជាអ្នកក្នុងបន្ទុករបស់ខ្លួនទៅចុះឈ្មោះ ត្រូវប្រញ៉ាប់នាំពួកគាត់ទៅចុះឈ្មោះចូលជាសមាជិក ប.ស.ស. នៅតាមទីស្នាក់ការសាខា ប.ស.ស. ឱ្យបានឆាប់បំផុត ដើម្បីទទួលបានអត្ថប្រយោជន៍ពី ប.ស.ស. ក្នុងន័យចូលរួមសម្រេចបាននូវគោលដៅរបស់រាជរដ្ឋាភិបាលកម្ពុជា ក្នុងការផ្ដល់ការធានារ៉ាប់រងលើរបបថែទាំសុខភាពឆ្ពោះទៅរកការគ្របដណ្ដប់ជាសកលនាពេលដ៏ខ្លីខាងមុខ។

សូមបញ្ជាក់ថា ក្នុងពិធីផ្សព្វផ្សាយខាងលើ ឯកឧត្តម ប៉ែន នរៈវុធ អគ្គនាយករង ប.ស.ស. តំណាងឯកឧត្តម ម៉េង ហុង អគ្គនាយក ប.ស.ស. ស្តីទីនៃក្រសួងការងារ និងបណ្តុះបណ្តាលវិជ្ជាជីវៈ ដឹកនាំមន្រ្តីជំនាញចូលរួមអមឯកឧត្តមវេជ្ជបណ្ឌិត ស៊ុ សោភ័ណ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ ដែលប្រព្រឹត្តទៅដោយផ្ទាល់នៅសាលាខេត្តកំពត ដោយមានវត្តមានចូលរួមពីថ្នាក់ដឹកនាំ មន្រ្តីរាជការចំណុះឱ្យសាលាខេត្តកំពតសរុបប្រមាណ ៤០០នាក់៕