ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក អញ្ជើញចូលរួមកិច្ចប្រជុំកសាងកម្មវិធីសហប្រតិបត្តិការលើវិស័យគ្រប់គ្រងធនធានទឹកជាមួយធនាគារអភិវឌ្ឍន៍អាស៊ី
ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម និងសហការី បានអញ្ជើញចូលរួមកិច្ចប្រជុំស្តីពីការកសាងកម្មវិធីសហប្រតិបត្តិការលើវិស័យធនធានទឹក និងវិស័យនានារបស់រាជរដ្ឋាភិបាលនៃព្រះរាជាណាចក្រកម្ពុជា ក្រោមអធិបតីភាពឯកឧត្តម រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
សូមជម្រាបថា កិច្ចប្រជុំដែលរៀបចំដោយធនាគារអភិវឌ្ឍន៍អាស៊ី (ADB) ក្នុងបេសកកម្មកសាងកម្មវិធីសហប្រតិបត្តិការលើគ្រប់វិស័យនាពេលនេះមានការចូលរួមពីឯកឧត្តម លោកជំទាវ លោក លោកស្រី តំណាងមកពីបណ្តាក្រសួងស្ថាប័នរដ្ឋទាំងអស់របស់រាជរដ្ឋាភិបាល នៃព្រះរាជាណាចក្រកម្ពុជា។
ឯកឧត្តមរដ្ឋលេខាធិការបានឱ្យដឹងថា ក្រោមកិច្ចសហប្រតិបត្តិការដ៏រឹងមាំប្រកបដោយនិរន្តរភាពរវាងក្រសួងធនធានទឹក និងឧតុនិយម ក្រសួងសេដ្ឋកិច្ច និងហិរញ្ញវត្ថុ និងធនាគារអភិវឌ្ឍន៍អាស៊ី (ADB) បានធ្វើឱ្យការកសាងនូវយុទ្ធសាស្រ្តដៃគូ (CPS) និងផែនការអភិវឌ្ឍន៍លើគ្រប់វិស័យរបស់ប្រទេសកម្ពុជាកើនឡើងដល់កម្រិតល្អប្រសើរ។
ទន្ទឹមនឹងនេះ ឯកឧត្តមរដ្ឋលេខាធិការបានឱ្យដឹងបន្ថែមទៀតថា តាមរយៈកិច្ចសហប្រតិបត្តិការដ៏ល្អនេះនឹងធ្វើឱ្យប្រទេសកម្ពុជាឈានឡើងមួយជំហានទៀត ក្នុងការប្រើប្រាស់ហិរញ្ញប្បទានតាមបែប MFF ដើម្បីអនុវត្តន៍ជាមួយនឹងធនាគារអភិវឌ្ឍន៍អាស៊ី ជាពិសេសការវិនិយោគលើវិស័យគ្រប់គ្រងធនធានទឹកដោយវិធានការចម្រុះ និងកិច្ចប្រតិបត្តិការការពារទឹកជំនន់គ្រប់ប្រភេទ ព្រមទាំងចាត់វិធានការដោយប្រសិទ្ធភាពខ្ពស់បំផុតលើការកាត់បន្ថយគ្រោះរាំងស្ងួតក្នុងក្របខ័ណ្ឌទូទាំងប្រទេស និងការអនុវត្តយុទ្ធសាស្រ្តការពារកុំឱ្យកើតមាននូវគ្រោះមហន្តរាយនានាដែលបង្កឡើងដោយសារទឹកផងដែរ។
ឯកឧត្តមរដ្ឋលេខាធិការបានបញ្ជាក់ឱ្យដឹងថា ឯកឧត្តម Jiang Feng Zhang ប្រធានប្រតិបត្តិការភូមិភាគអាស៊ីអគ្នេយ៍របស់ស្ថានតំណាងធនាគារអភិវឌ្ឍន៍អាស៊ីប្រចាំប្រទេសហ្វីលីពីន និងលោកជំទាវ Jyotsana Verma ប្រធានធនាគារអភិវឌ្ឍន៍អាស៊ីប្រចាំប្រទេសកម្ពុជានឹងសុំជួបរាយការណ៍លម្អិតលើបណ្តាកម្មវិធីខាងលើជូនឯកឧត្តមដ្ឋមន្ដ្រីក្រសួងធនធានទឹក និងឧតុនិយម នៅថ្ងៃទី១៥ ខែឧសភា ឆ្នាំ២០២៤ ខាងមុខនេះ ៕
