ឯកឧត្ដម ស្វាយ សំអ៊ាង៖ ខេត្តស្ទឹងត្រែង បាននិងកំពុងមានការអភិវឌ្ឍ ឈានឡើងលើគ្រប់វិស័យ ទាំងផ្នែកសេដ្ឋកិច្ច សង្គមកិច្ច ហេដ្ឋារចនារូបវ័ន្ត សន្តិសុខសណ្តាប់ធ្នាប់សាធារណៈ

ភ្នំពេញ៖ អភិបាលខេត្តស្ទឹងត្រែង ឯកឧត្ដម ស្វាយ សំអ៊ាង បានគូសបញ្ជាក់ថា ខេត្តស្ទឹងត្រែងបាន និងកំពុងមានការអភិវឌ្ឍឈានឡើងលើគ្រប់វិស័យ ទាំងផ្នែកសេដ្ឋកិច្ច សង្គមកិច្ច ទាំង ផ្នែកហេដ្ឋារចនារូបវ័ន្ត ទាំងផ្នែកសន្តិសុខ សណ្តាប់ធ្នាប់សាធារណៈ បង្កលក្ខណៈងាយស្រួលជូនបងប្អូនប្រជាពលរដ្ឋក្នុងការរស់នៅ និងប្រកបរបរចិញ្ចឹមជីវិតប្រចាំថ្ងៃ ។

ថ្លែងក្នុងពិធីចាប់ឆ្នោតយកដីឡូត៍លំនៅឋាន និងដីឡូត៍កសិកម្ម នៃកម្មវិធីសម្បទានដីសង្គមកិច្ច គម្រោង បែងចែកដីរដើម្បីសង្គមកិច្ច និងការអភិវឌ្ឍរសេដ្ឋកិច្ច ដំណាក់កាលទី៣ (LASED III) នាថ្ងៃទី៧ ខែឧសភា ឆ្នាំ២០២៤នេះ ឯកឧត្ដម ស្វាយ សំអ៊ាង បានសម្តែងនូវការគោរពដឹងគុណដ៏ជ្រាលជ្រៅបំផុត ជូនចំពោះ ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការដឹកនាំតម្រោង LASED III ដែលជានិច្ចកាលតែងតែគាំទ្រ និងលើកទឹកចិត្តដល់ខេត្តស្ទឹងត្រែង ក្នុងការអនុវត្តតម្រោងសម្បទានជូនគ្រួសារកងទ័ពតាមបណ្តោយព្រំដែនកម្ពុជា-ឡាវ និងសម្បទានសង្គមកិច្ចថ្នាក់ មូលដ្ឋាន LASED III ។

ឯកឧត្ដមអភិបាលខេត្ត បញ្ជាក់ថា «ដោយអនុវត្តតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ខេត្តស្ទឹងត្រែងបាន និងកំពុងមានការអភិវឌ្ឍឈានឡើងលើគ្រប់វិស័យ ទាំងផ្នែកសេដ្ឋកិច្ច សង្គមកិច្ច ទាំងផ្នែកហេដ្ឋារចនារូបវ័ន្ត ទាំងផ្នែកសន្តិសុខ សណ្តាប់ធ្នាប់សាធារណៈ បង្កលក្ខណៈងាយស្រួលជូនបងប្អូនប្រជា ពលរដ្ឋក្នុងការរស់នៅ និងប្រកបរបរចិញ្ចឹមជីវិតប្រចាំថ្ងៃ ហើយអ្វីៗទាំងអស់ដែលយើងកំពុងមានសព្វថ្ងៃនេះ គឺផ្តើមចេញពីកត្តា សន្តិភាព ជាចម្បង សូមគោរពដឹងគុណ និងថ្លែងអំណរគុណយ៉ាងខ្ពង់ខ្ពស់បំផុតចំពោះ ស្ថាបនិក និងប្រតិបត្តិករសន្តិភាព អគ្គមគ្គុទេសក៍ឯក ដែលបាននាំមកនូវសុខសន្តិភាពពេញលេញជូនប្រជាជន កម្ពុជា គឺ សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា» ។

ឯកឧត្ដម ស្វាយ សំអ៊ាង លើកឡើងថា តម្លៃនៃសន្តិភាព និងការអភិវឌ្ឍ នៅកម្ពុជា ត្រូវបានបន្តដឹកនាំដោយរាជរដ្ឋាភិបាលកម្ពុជានីតិ កាលទី៧ ដែលមាន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលជាប្រមុខដឹកនាំប្រកបដោយភាពស្វាហាប់ និងគតិបណ្ឌិត គឺបានប្រកាន់ខ្ជាប់ឥតប្រែប្រួលនូវគោលបំណង និងឧត្តមគតិរបស់ជាតិ ដែលផ្សារភ្ជាប់ទៅនឹងគោលការណ៍ប្រជាធិបតេយ្យ ទោះបីត្រូវឆ្លងកាត់ការលំបាក និងបញ្ហាស្លុតស្មាញជាច្រើនយ៉ាងណាក៏ដោយ ក៏រាជរដ្ឋាភិបាល ស្ថិតនៅរួមសុខរួមទុក្ខជាមួយប្រជាជនជានិច្ច និងបានធ្វើអ្វីៗគ្រប់បែបយ៉ាងដើម្បីផលប្រយោជន៍ជាតិ និងប្រជាជនកម្ពុជាគ្រប់ដំណាក់កាល។

ឯកឧត្ដមអភិបាលខេត្ត ថ្លែងទៀតថា គម្រោងបែងចែកដី ដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) នៃកម្មវិធីសម្បទានដីសង្គមកិច្ចថ្នាក់ មូលដ្ឋាន គឺជាយកចិត្តទុកដាក់របស់ប្រមុខរាជរដ្ឋាភិបាល តាមរយៈក្រសួងរៀបចំដែនដី នគរូបនីយកម្ម និងសំណង់ និងក្រសួងកសិកម្ម រុក្ខាប្រមាញ់ និងនេសាទ ព្រមទាំងភាគីម្ចាស់ជំនួយ គឺធនាគារពិភពលោក ដែល តែងតែគិតគូរពីសុខទុក្ខរបស់ប្រជាជន ជាពិសេសបងប្អូនដែលខ្វះដីពិតប្រាកដសម្រាប់ធ្វើលំនៅឋាន និងប្រកប របរកសិកម្មដើម្បីចិញ្ចឹមជីវិត ៕