ក្រសួងមុខងារសាធារណៈ ជូនដំណឹងពីការទទួលចុះឈ្មោះជាអ្នកសង្កេតការណ៍ក្នុងដំណើរការប្រឡងជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ បម្រើការងារក្នុងក្របខណ្ឌក្រសួងអប់រំ

ភ្នំពេញ៖ ក្រសួងមុខងារសាធារណៈ បានចេញសេចក្តីជូនដំណឹងស្តីពីការទទួលសាធារណជនចុះឈ្មោះជាអ្នកសង្កេតការណ៍ក្នុងដំណើរការប្រឡងប្រជែង ជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ ឱ្យចូលបម្រើការងារក្នុងក្របខណ្ឌ ក្រសួងអប់រំ យុវជន និងកីឡា។

គណៈកម្មការរៀបចំការប្រឡងប្រជែងសូមជម្រាបជូនសាធារណជនមេត្តាជ្រាបថា ការប្រឡងប្រជែង ជ្រើសរើសគ្រូបង្រៀន សម្រាប់បង្រៀននៅអនុវិទ្យាល័យ ឱ្យចូលបម្រើការងារនៅក្នុងក្របខណ្ឌក្រសួងអប់រំ យុវជន និងកីឡា នឹងប្រព្រឹត្តទៅនាសម័យប្រឡង និងនៅមណ្ឌលប្រឡងដូចខាងក្រោម៖

– ថ្ងៃព្រហស្បតិ៍ ទី២ ខែឧសភា ឆ្នាំ២០២៤ នៅមណ្ឌលប្រឡងសាកលវិទ្យាល័យភូមិន្ទភ្នំពេញ

– ថ្ងៃសុក្រ ទី៣ ខែឧសភា ឆ្នាំ២០២៤ នៅមណ្ឌលប្រឡងសាលាភូមិន្ទរដ្ឋបាល និងសាកលវិទ្យាល័យ ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច

– ថ្ងៃសៅរ៍ ទី៤ ខែឧសភា ឆ្នាំ២០២៤ នៅមណ្ឌលប្រឡងសាលាភូមិន្ទរដ្ឋបាល និងសាកលវិទ្យាល័យ ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច

– ថ្ងៃអាទិត្យ ទី៥ ខែឧសភា ឆ្នាំ២០២៤ នៅមណ្ឌលប្រឡងសាលាភូមិន្ទរដ្ឋបាល និងសាកលវិទ្យាល័យ

ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច – ថ្ងៃចន្ទ ទី៦ ខែឧសភា ឆ្នាំ២០២៤ និងថ្ងៃបន្តបន្ទាប់នៅមណ្ឌលកំណែសាលាភូមិន្ទរដ្ឋបាល

ដើម្បីជាការបង្ហាញឱ្យឃើញពិតប្រាកដថា ការប្រឡងប្រជែងជ្រើសរើសគ្រូបង្រៀន សម្រាប់បង្រៀន នៅអនុវិទ្យាល័យ ឱ្យចូលបម្រើការងារនៅក្នុងក្របខណ្ឌក្រសួងអប់រំ យុវជន និងកីឡា ប្រព្រឹត្តទៅប្រកបដោយ គុណាធិបតេយ្យ តម្លាភាព យុត្តិធម៌ បរិយាបន្ន ប្រសិទ្ធភាព គណៈកម្មការរៀបចំការប្រឡងប្រជែង បានអនុញ្ញាតឱ្យ សាធារណជនស្ម័គ្រចិត្តចំនួន ៥០នាក់ ដាក់ពាក្យស្នើសុំចូលរួមសង្កេតការណ៍ដោយផ្ទាល់នៅមណ្ឌលប្រឡងនីមួយៗ តាមកាលបរិច្ឆេទ និងទីតាំងដូចបានបញ្ជាក់ជូនខាងលើ។

អ្នកសង្កេតការណ៍ជាសាធារណជន នឹងត្រូវបានអញ្ជើញឱ្យតាមដានដំណើរការប្រឡងប្រជែង ចាប់តាំងពី ពេលរៀបចំវិញ្ញាសា (ពេលព្រឹក) រហូតដល់ពេលចាប់ផ្តើមប្រឡងនាម៉ោង១២:០០ថ្ងៃត្រង់តទៅ។ អ្នកសង្កេតការណ៍ជា សាធារណជន ក៏ត្រូវចូលរួមសម្រាប់ដំណើរការកំណែនៅមណ្ឌលកំណែសាលាភូមិន្ទរដ្ឋបាល នាថ្ងៃបន្តបន្ទាប់ រហូតដល់ ដំណើរការប្រឡងប្រជែងត្រូវបញ្ចប់ជាស្ថាពរ។

សាធារណជនអាចដាក់ពាក្យតាមរយៈ QR Code ឬ Link ចាប់ពីថ្ងៃផ្សាយដំណឹងរហូតដល់ថ្ងៃទី២៨ ខែមេសា ឆ្នាំ២០២៤ ត្រឹមម៉ោង១២:០០ថ្ងៃត្រង់។

សូមបញ្ជាក់៖ អ្នកដាក់ពាក្យចំនួន៥០នាក់ដំបូងដែលបានបំពេញព័ត៌មានគ្រប់គ្រាន់ និងច្បាស់លាស់នឹង ត្រូវបានជ្រើសរើសធ្វើជាអ្នកសង្កេតការណ៍ជាសាធារណជន៕