ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសគាំទ្រការយកសូត្រ ហូល ផាមួងកាត់ជាអាវធំ ។
ក្នុងឱកាសអញ្ជើញជាអធិបតី ក្នុងពិធីពិសាអាហារសាមគ្គី និងបំពាក់គ្រឿងឥស្សរិយយសជូនលោកគ្រូ អ្នកគ្រូ សិល្បករ និងសិល្បការិនី នៅថ្ងៃទី២៥ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត បញ្ជាក់ថា «ខ្ញុំឃើញនៅលើ Facebook គាត់លក់ខោអាវ គាត់ច្នៃប្រឌិត ប៉ុន្តែ នៅប្រើសូត្រ ហូលផាមួងរបស់ខ្មែរ អ្នកខ្លះកាត់អាវធំ តែយកផាមួង មកកាត់ទៅហើយ ខ្ញុំគិតថាប្រពន្ធគួរតែកាត់ឱ្យប្តីម៉ាកំប្លេដែលទៅ កំពុងចរចាគាត់ នេះជាការច្នៃប្រឌិតបែបនេះដែលយើងត្រូវធ្វើ»។
សម្តេចធិបតី មានប្រសាសន៍ថា ការអភិរក្សដែលសម្តេចបានប្រាប់ពីអ្វីដែលត្រូវផ្សព្វផ្សាយពីកម្ពុជា របាំអប្សរា របាំជូនពរដែលគ្រងគ្រឿងជាអប្សរា ប៉ុន្តែ មិនចាំបាច់រាំតែមួយវិធីនោះទេ ប៉ុន្តែ យើងអាចច្នៃប្រឌិត វប្បធម៌ទំនើប។ ខណៈប្រទេសមួយចំនួនឧទាហរណ៍ប្រទេសកូរ៉េខាងត្បូង ការផ្សព្វផ្សាយវប្បធម៌ គឺមិនមែនប្រពៃណីដើមនោះទេ ប៉ុន្តែ គឺ KPOP ដែលជាវប្បធម៌ថ្មីរបស់កូរ៉េ កើតចេញពីការច្នៃប្រឌិត និងមានក្តីជំនឿថា សិល្បករ សិល្បការិនីកម្ពុជា ដែលច្នៃប្រឌិតបែបទំនើបនេះអាចធ្វើបានផងដែរ។
សម្តេចធិបតី លើកឡើងថា ផលិតផលដូចគ្នា ប៉ុន្តែពេលខ្លះសម្រាប់អ្នកទស្សនានៅក្នុងប្រទេស តែមានការច្នៃប្រឌិត ឱ្យស្របតាមស្តងដារអន្តរជាតិ តែមិននៅរក្សាបានអន្តសញ្ញាណខ្មែរ រៀបរាប់ពីរឿងអក្សរសិល្ប៍របស់ខ្មែរ ចំណុចនេះ គឺជាការរុញវប្បធម៌របស់ខ្មែរ ទៅកាន់ឆាកអន្តរជាតិបន្ថែមទៀត។
សម្តេចធិបតី គូសបញ្ជាក់ថា ការអភិរក្ស និងការអភិវឌ្ឍត្រូវការដើរទន្ទឹមគ្នា ដើម្បីធ្វើយ៉ាងណាឱ្យវប្បធម៌ សិល្បៈរបស់ខ្មែរ នៅគង់វង្ស ថិតថេររាប់ពាន់ឆ្នាំ ចំណុចនេះគឺជាអ្វីដែលកម្ពុជា ត្រូវបន្តធ្វើ យើងប្រែប្រួលទៅតាមរបត់ ប៉ុន្តែ មិនឱ្យបាត់បង់អត្តសញ្ញាណជាតិខ្មែរនោះទេ។
សម្តេចធិបតី ហ៊ុន ម៉ាណែត ក៏បានណែនាំឱ្យមានការកត់ត្រាឱ្យបានច្បាស់លាស់ ដើម្បីរក្សាអត្តសញ្ញាណវប្បធម៌សិល្បៈរបស់ខ្មែរ ឱ្យបានពិតប្រាកដ។ ការអភិវឌ្ឍផ្នែកសិល្បៈ ត្រូវផ្សារភ្ជាប់នូវទម្រង់ដែលជាអត្តសញ្ញាណរបស់ខ្មែរ ៕
