ឯកឧត្តមអគ្គនាយក ប.ស.ស.ស្ដីទី ដឹកនាំកិច្ចប្រជុំណែនាំស្ដីពីការធ្វើបច្ចុប្បន្នភាព នៃការងារចុះធ្វើអធិការកិច្ចសន្ដិសុខសង្គម នៅតាមបណ្ដាសហគ្រាស គ្រឹះស្ថាន
ភ្នំពេញ៖ នៅសាលប្រជុំក្រុមប្រឹក្សាភិបាល ស្នាក់ការកណ្ដាល ប.ស.ស. រាជធានីភ្នំពេញ នាព្រឹកថ្ងៃទី២៥ ខែមេសា ឆ្នាំ២០២៤ នេះ ឯកឧត្តម ម៉េង ហុង អគ្គនាយក ប.ស.ស.ស្ដីទី នៃក្រសួងការងារ និងបណ្ដុះបណ្ដាលវិជ្ជាជីវៈ បានអញ្ជើញដឹកនាំកិច្ចប្រជុំផ្ទៃក្នុងស្តីពីការធ្វើបច្ចុប្បន្នភាព និងណែនាំពាក់ព័ន្ធបែបបទ និងនីតិវិធីសំខាន់ៗមួយចំនួន នៃការងារអធិការកិច្ចសន្ដិសុខសង្គម នៅតាមសហគ្រាស គ្រឹះស្ថាន ជូនដល់ថ្នាក់ដឹកនាំ មន្រ្ដីអធិការកិច្ចសន្ដិសុខសង្គម និង លោក – លោកស្រីជាប្រធានសាខា ប.ស.ស. ខេត្ត ក្រុង ខណ្ឌទាំង២៨ ទាំងចូលរួមដោយផ្ទាល់ និងតាមរយៈអនឡាញ សរុបប្រមាណជាង ៨០ រូប។
ក្នុងកិច្ចប្រជុំនេះ ឯកឧត្តមអគ្គនាយក ប.ស.ស.ស្ដីទី បានជំរុញដល់នាយកដ្ឋានអធិការកិច្ចសន្តិសុខសង្គម និងលោក លោកស្រីប្រធានសាខា ប.ស.ស. ខេត្ត ក្រុង ខណ្ឌ ទាំងអស់ត្រូវពង្រឹងបន្ថែមលើការងារចុះអធិការកិច្ចនេះ ធ្វើយ៉ាងណាពិនិត្យឱ្យបានគ្រប់ជ្រុងជ្រោយនូវរាល់ចន្លោះខ្វះខាតនានា និងចាត់វិធានការភ្លាមៗចំពោះករណីល្មើសណាមួយដែលបានកើតឡើងក្នុងសហគ្រាស គ្រឹះស្ថាននីមួយៗ ទាក់ទងទៅនឹងការចុះបញ្ជិកា ឬបង់ភាគទានមិនបានត្រឹមត្រូវ ឬរាយការណ៍ពីស្ថានភាព នៃសហគ្រាស គ្រឹះស្ថានទាំងនោះ មិនបានត្រឹមត្រូវតាមច្បាប់ស្ដីពីរបបសន្តិសុខសង្គម និងលិខិតបទដ្ឋានគតិយុត្តជាធរមាន ដែលជាហេតុធ្វើឱ្យបាត់បង់ផលប្រយោជន៍របស់បងប្អូនកម្មករនិយោជិត។
ជាមួយគ្នានេះ ឯកឧត្តមអគ្គនាយក ប.ស.ស.ស្ដីទី បានណែនាំដល់ក្រុមការងារអធិការកិច្ចសន្ដិសុខសង្គម ស្របពេលការចុះធ្វើអធិការកិច្ចនេះ យើងទាំងអស់ត្រូវព្យាយាមអត់ធ្មត់ រក្សានូវឥរិយាបទរបស់ខ្លួនប្រកបដោយភាពទន់ភ្លន់ ម៉ឺងម៉ាត់ និងហ្មត់ចត់ ជាពិសេសត្រូវបង្កើនការផ្សព្វផ្សាយស្តីពីអត្ថប្រយោជន៍ ប.ស.ស. ឱ្យបានទូលំទូលាយដល់និយោជក តំណាងនិយោជក ឱ្យយល់កាន់តែច្បាស់បន្ថែមទៀត ដើម្បីធានាបាននូវអត្ថប្រយោជន៍នានារបស់បងប្អូនកម្មករនិយោជិតគ្រប់ៗគ្នា៕
