ជួរភ្នំក្រឡាពស់ កំពុងក្លាយជាកំណប់ទ្រព្យធម្មជាតិ សម្រាប់ពលរដ្ឋខ្មែររស់នៅតំបន់នោះ ពឹងផ្អែកលើការប្រមូលផលអនុផលព្រៃឈើនៃផ្លែសំរង ដើម្បីទទួលបានចំណូលទ្រទ្រង់ជីវភាព
ភ្នំពេញ៖ សំរង គឺជាផ្លែផល្លាព្រៃម្យ៉ាងដែលប្រជាពលរដ្ឋខ្មែរកែច្នៃយកមកធ្វើជាបង្អែមដ៏ឈ្ងុយឆ្ងាញ់ពិសា គេលាយផ្លែសំរងត្រាំទឹកជាមួយទឹកស្ករ ដែលពេញនិយមខ្លាំងសម្រាប់រដូវក្ដៅនេះ។ ជួរភ្នំក្រឡាពស់ ដែលស្ថិតនៅភូមិតាឡាត ឃុំតាឡាត ស្រុកសេសានខេត្តស្ទឹងត្រែង បាននិងកំពុងក្លាយជាកំណប់ទ្រព្យធម្មជាតិសម្រាប់ប្រជាពលរដ្ឋខ្មែររស់នៅតំបន់ជុំវិញនោះ ពឹងផ្អែកលើការដើររើស បេះ ប្រមូលផលអនុផលព្រៃឈើនៃផ្លែសំរង យកទៅលក់ឱ្យឈ្មួញនៅតាមបណ្តាទីផ្សារនានានៅទូទាំងប្រទេស ខណៈផ្លែសំរងស្ងួតអាចលក់បាន៥ម៉ឺនរៀលក្នុងមួយគីឡូក្រាម។
បើតាមឈ្មួញដែលបានដើរប្រមូលទិញផ្លែសំរងស្ងួត ប្រចាំនៅខេត្តស្ទឹងត្រែងថា ដោយសារបច្ចុប្បន្ន អាកាសធាតុនៅប្រទេសកម្ពុជា ថៃ ឡាវ និងវៀតណាម កើនឡើងនៃកម្តៅខ្លាំង ទីផ្សារផ្លែសំរងហាក់ស្ទុះងើបឡើងខ្លាំង ព្រោះមានការបញ្ជាទិញពីពីគ្រប់ខេត្តក្រុងក្នុងប្រទេសកម្ពុជា និងបណ្តាប្រទេសក្បែរខាងដូចជាថៃ និងវៀតណាម ដែលពេញនិយមបរិភោគបង្អែមផ្លែសំរងនេះ ដើម្បីជួយកាត់បន្ថយភាពក្ដៅនៅក្នុងខ្លួន។
ផ្លែសំរងស្ងួត ត្រូវបានគេយកទៅត្រាំទឹកត្រជាក់ឱ្យវាឡើងរីកស្គុយ ហើយសាច់វាស្កាតៗ ប្រើលាយជាមួយទឹកស្ករបរិភោគជាចំណីត្រជាក់។ អ្នកខ្លះបានយកផ្លែឈើព្រៃមួយប្រភេទនេះ ដាក់លាយជាមួយគ្រាប់ជី ឬវល្លិ៍ព្រះក្រុង(ខ្លះហៅប៉ាក្រុង) ដែលធ្វើឱ្យបង្អែមត្រជាក់នេះ កាន់តែមានឱជារសមួយកម្រិតបន្ថែមទៀត និងពិតជាពិសេសណាស់សម្រាប់ការទទួលទាននូវរដូវក្ដៅបែបនេះ ព្រោះរុក្ខជាតិព្រៃទាំងពីរប្រភេទនេះ ជារុក្ខឱសថព្យាបាលរោគក្ដៅក្នុង និងផ្សះក្រពះពោះវៀន ជួយជំនួយឱ្យការរំលាយអាហារមានភាពងាយស្រួល។
ក្នុងសកម្មភាពដើររើសផ្លែសំរងស្ងួតនៅតាមដងព្រៃជួរភ្នំក្រឡាពស់ លោក សាយ ប៊ុនឡាយ ប្រជាពលរដ្ឋរស់នៅភូមិក្របីជ្រុំ ឃុំតាឡាត បានឱ្យដឹងថា នេះជាមុខរបររបស់ប្រជាពលរដ្ឋនៅទីជនបទ បន្ទាប់ទំនេរពីការងារស្រែចម្ការ ដល់រដូវផលអនុផលព្រៃឈើទុំ គឺនាំគ្នាដើររើសផ្លែសំរង បេះផ្លែគុយ ផ្តៅដំបង និងបន្លែស្លឹកឈើព្រៃធម្មជាតិផ្សេងៗទៀត សម្រាប់ធ្វើជាចំណីអាហារបម្រើឱ្យការបរិភោគប្រចាំថ្ងៃផង និងសល់អាចលក់ឱ្យទៅក្រុមឈ្មួញដើរប្រមូលទិញបានប្រាក់ចំណូលបន្ថែមដើម្បីផ្គត់ផ្គង់ជីវភាពផងដែរ។
លោកបន្តថា ផ្លែសំរងនេះ បងប្អូនប្រជាពលរដ្ឋយើងដើររើសក្នុងព្រៃជ្រៅៗបានក្នុងមួយថ្ងៃចាប់ពី៣ទៅ៥គីឡូក្រាម ហើយគាប់ជួនពេលខ្លះបងប្អូនប្រជាពលរដ្ឋយើងអាចដេកផ្លូវ១យប់ ឬ២យប់ក៏មាន ដើម្បីរកឱ្យបានច្រើនជួយជំរុញកត្តាជីវភាពឱ្យកាន់តែល្អប្រសើរ។ ការដើរប្រមូលបានកាន់តែច្រើន គឺអាចលក់បានច្រើន ហើយប្រាក់ចំណូលក៏វាទៅតាមហ្នឹងដែរ ពោលគឺវាអាស្រ័យទៅតាមប្រជាពលរដ្ឋខ្លួនឯងថាមានភាពតស៊ូកម្រិតណា ក្នុងការដើរប្រមូលផលអនុផលព្រៃឈើក្នុងរដូវប្រមូលផលនេះ។
លោកស្រី ភួន ខាំផៃ រស់នៅភូមិស្វាយរៀង ឃុំតាឡាតនេះដែរ បានបញ្ជាក់ថា មុខរបរនេះជាប្រពៃណីមួយដែលប្រជាពលរដ្ឋក្នុងមូលដ្ឋាននៃឃុំតាឡាតប្រកាន់យកមកជាយូរយារមកហើយ ទៅតាមទម្លាប់ដូនតារស់នៅស្រុកស្រែចម្ការនេះឯង។ លោកស្រីបន្តថា បច្ចុប្បន្នផ្លែឈើទាំងនេះមិនសម្បូរច្រើនដូចពីមុនទេទេ ព្រោះព្រៃស្រោងមួយចំនួនដែលប្រជាពលរដ្ឋធ្លាប់ចូលទៅរក ត្រូវបានជនខិលខូចលួចចូលកាប់ទន្ទ្រានរានដីព្រៃរបស់រដ្ឋយកធ្វើអាជីវកម្មផ្សេងៗដូចជា៖ កាប់រានដីដាំដំណាំស្វាយចន្ទី ដាំដំឡូងមីជាដើម។ល។ ធ្វើឱ្យបាត់បង់ធនធានធម្មជាតិអស់មួយចំណែកធំ ខណៈករណីនេះអាជ្ញាធរស្រុកកំពុងមានចំណាត់ការផងដែរ និងគាប់ជួនមានអ្នកដើររកបេះផ្លែផល្លាព្រៃក៏មានកំណើនកើនឡើងជាលំដាប់ ទើបការដើររកប្រមូលផ្លែផល្លាព្រៃទាំងនោះធ្លាក់ចុះខ្លះបែបនេះ។
លោក ឃីត ភិត មេឃុំតាឡាត បានឱ្យដឹងថា លោកគាំទ្រដល់ការប្រឹងប្រែងឧស្សាហ៍ព្យាយាមរបស់បងប្អូនប្រជាពលរដ្ឋយើង ដែលចេះឆ្លៀតឱកាសពីការដើរប្រមូលផលអនុផលព្រៃឈើក្នុងរដូវប្រមូលផលនេះ ព្រោះវាអាចជួយទ្រទ្រង់ជីវភាពប្រចាំថ្ងៃរបស់បងប្អូនបានមួយកម្រិតដែរ ប៉ុន្តែការចូលព្រៃទៅរកបេះផល្លានុផលព្រៃឈើនៅតាមតំបន់ជួរភ្នំក្រឡាពស់នេះ សម្រាប់អ្នកដេកផ្លូវត្រូវផ្តល់ដំណឹងមកអាជ្ញាធរមូលដ្ឋានដូចជា៖ មេភូមិ ឬមន្ត្រីនគរបាលប៉ុស្តិ៍ ឱ្យបានដឹងជាមុន ដើម្បីយើងងាយស្រួលក្នុងការជួយគ្នានៅពេលមានហានិភ័យណាមួយកើតឡើងជាយថាហេតុ។
សូមបញ្ជាក់ថា ផ្លែសំរងនេះ មានអ្នកប្រមូលទិញនៅតាមភូមិ ដោយក្នុងមួយគីឡូក្រាមតម្លៃ៥ម៉ឺនរៀល ហើយលក់ចេញនៅទីផ្សារមានតម្លៃ៦ម៉ឺនរៀលសម្រាប់ផ្លែដែលមានគុណភាពលេខមួយ។ សម្រាប់ផ្លែណាមិនសូវល្អ ក៏ឈ្មួញទិញដែរ តែតម្លៃទាបជាងបន្តិច ហើយអតិថិជននិយមបរិភោគផ្លែផល្លាព្រៃមួយប្រភេទនេះណាស់ ព្រោះវាជាប្រភេទផ្លែឈើមានជាតិឱសថជួយទ្រទ្រង់ដល់ផ្នែកសុខភាព ៕
