ឯកឧត្តម សុខ ពុទ្ធិវុធ និងឯកឧត្តម អ៊ូច ភា អញ្ជើញបើកដំណើរការព្រឹត្តិការណ៍សង្រ្កាន្តខេត្តតាកែវ ដែលរៀបចំរយៈពេល០៣ថ្ងៃ នៅសួនច្បារមាត់បឹងតាកែវ
ភ្នំពេញ៖ នៅរសៀលថ្ងៃអាទិត្យ ទី១៤ ខែមេសា ឆ្នាំ២០២៤ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសនីយ៍ និងទូរគមនាគមន៍ និងជាប្រធានសហភាពសហព័ន្ធយុវជនកម្ពុជា ខេត្តតាកែវ និងឯកឧត្តម អ៊ូច ភា អភិបាល នៃគណៈអភិបាលខេត្តតាកែវ រួមជាមួយលោក លោកស្រី អភិបាលរងខេត្ត លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត លោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្ត លោកឧត្តមសេនីយ៍ត្រី នាង សុភារ៉ា មេបញ្ជាការតំបន់ប្រតិបត្តិការសឹករងខេត្ត លោក លោកស្រី ប្រធានមន្ទីរអង្គភាពជុំវិញខេត្ត បានអញ្ជើញបើកព្រឹត្តិការណ៍សង្រ្កាន្តក្រុងដូនកែវ ដែលមានរយៈពេល០៣ថ្ងៃ ចាប់ពីថ្ងៃទី ១៤-១៥-១៦ ខែមេសា ឆ្នាំ២០២៤ ដែលរៀបចំធ្វើឡើងនៅសួនច្បារមាត់បឹងតាកែវ។
នៅក្នុងដំណើរការព្រឹត្តិការណ៍សង្រ្កាន្តរបស់ក្រុងដូនកែវ បេះដូងខេត្តតាកែវ អាជ្ញាធរខេត្តតាកែវ ក៏មានរៀបចំកងកម្លាំងសមត្ថកិច្ច នគរបាល និងអាវុធហត្ថ ត្រៀមការការពារសន្តិសុខ សណ្ដាប់ធ្នាប់ សុខសុវត្ថិភាព ជូនបងប្អូនប្រជាពលរដ្ឋ ដែលចូលមកលេងកម្សាន្តនៅសួនច្បារមាត់បឹងតាកែវ រយៈពេល០៣ថ្ងៃ នៃពិធីបុណ្យចូលឆ្នាំប្រពៃណីយខ្មែរ។
សូមជម្រាបជូនដែរថា ព្រឹត្តិការណ៍សង្រ្កាន្តនេះដែរ ក៏មានរៀបចំលេងល្បែង ប្រជាប្រិយខ្មែរ ទាញព្រ័ត្រ វាយខ្អម លាក់កន្សែង លោតបាវ រាំលេងកម្សាន្ត មានស្ដង់តាំងពិព័ណសមិទ្ធផលនានារបស់ មន្ទីរអង្គភាពជុំវិញខេត្ត និងផលិតផលរបស់ក្រុងស្រុក ជាពិសេសក៏មានការប្រគុំតន្រ្តីរៀបចំដោយ ក្រុមហ៊ុនស្រាបៀរ Cambodia និងមាន DJ ចាក់ភ្លេងរហូតដល់ម៉ោង ២ទាបភ្លឺផងដែរ ៕
