ថ្នាក់ដឹកនាំខេត្តកណ្ដាល ចូលរួមពិធីសូត្រមន្តចម្រើនព្រះបរិត្តលើករាសី នាឱកាសបុណ្យចូលឆ្នាំថ្មី ឆ្នាំរោង ឆស័ក ព.ស ២៥៦៨

ភ្នំពេញ៖ ឯកឧត្ដម នូ សាខន ប្រធានក្រុមប្រឹក្សាខេត្តកណ្តាល និងលោកជំទាវ និងឯកឧត្តម គង់ សោភ័ណ្ឌ អភិបាល នៃគណ:អភិបាលខេត្តកណ្ដាល និងលោកជំទាវ ព្រមទាំងមន្ត្រីអ្នកមុខអ្នកការ ជាច្រើនរូបទៀតបានចូលរួមក្នុងពិធីសូត្រមន្តចម្រើនព្រះបរិត្ត លើករាសី ដើម្បីប្រសិទ្ធពរជ័យ សិរិសួស្តី ជ័យមង្គល វិបុលសុខ ក្នុងឱកាសបុណ្យចូលឆ្នាំថ្មី ប្រពៃណីជាតិ ឆ្នាំរោងឆសក័ ព.ស.២៥៦៨ ស្ថិតនៅសួនច្បារមាត់ទន្លេបាសាក់ក្រុងតាខ្មៅ។

ឯកឧត្តម គង់ សោភ័ណ្ឌ អភិបាលខេត្ត បានលំឱនកាយវាចាចិត្តបួងដល់គុណបុណ្យព្រះរតនត្រ័យ វត្ថុស័ក្ដិសិទ្ធិក្នុងលោក ជាពិសេស ទេវតាឆ្នាំថ្មី ព្រះនាម «មហោទរាទេវី» ព្រះរាជបុត្រី ទី៧ កបិលមហាព្រហ្មសូមប្រទាននូវពរជ័យបវរមហាប្រសើរជូន ឯកឧត្តម និងលោកជំទាវ លោក លោកស្រី មន្ត្រីរាជការ បងប្អូនប្រជាពលរដ្ឋគ្រប់ស្រទាប់វណ្ណ:ក្នុងខេត្តកណ្ដាល សូមមានសុខភាពល្អបរិបូរណ៍ ពលានុភាពមាំមួន និងសូមបួងសួងដល់វត្ថុស័ក្តិសិទ្ធិទេវតាថែរក្សាទឹកដី នៃព្រះរាជាណាចក្រកម្ពុជា សូមតាមជួយបីបាច់ថែរក្សា អភិបាលប្រោះព្រំសព្ទសាធុការពរ សូមបានប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕