ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា តម្លៃទីផ្សារកសិផលប្រែប្រួលមិនទៀងទាត់នោះឡើយ ពីមួយឆ្នាំទៅមួយឆ្នាំ ដោយមិនអាចធានាបាន តែទោះបីជាយ៉ាងណា រាជរដ្ឋាភិបាល និងក្រសួងកសិកម្ម នឹងប្រឹងប្រែងក្នុងការរក្សាលំនឹងទីផ្សារកសិផល ជាពិសេសការកាត់បន្ថយថ្លៃដើមផលិត ដើម្បីឱ្យកសិករទទួលបានផលចំណេញខ្ពស់។
ក្នុងឱកាសអញ្ជើញសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតភូមិឱភាសាំង ឃុំកណ្តឹង ស្រុកបាទី ខេត្តតាកែវ នាថ្ងៃទី១១ ខែមេសា ឆ្នាំ២០២៤ សម្តេចធិបតីបានមានប្រសាសន៍ថា វិស័យកសិកម្មនៅតែដើរតួនាទីយ៉ាងសំខាន់ក្នុងសេដ្ឋកិច្ចកម្ពុជា ហេតុនេះហើយរាជរដ្ឋាភិបាលនៅតែបន្តយកចិត្តទុកដាក់ ជំរុញការផលិតឱ្យមានគុណភាពល្អ និងខិតខំរក្សាលំនឹងទីផ្សារកសិផល ជាពិសេសដំណាំយុទ្ធសាស្រ្ត។
សម្តេចធិបតីបញ្ជាក់ថា «ពិតណាស់ផលិតផលកសិកម្ម គឺឡើងចុះយើងពិបាកធានា ក្នុងមួយឆ្នាំៗជួលកាលឆ្នាំនេះ ស្រូវឡើងថ្លៃ ឆ្នាំក្រោយតាង៉ែនឡើងថ្លៃ ជួនកាលស្វាយចន្ទីឡើងថ្លៃ ជួនកាលកៅស៊ូឡើងថ្លៃ ជាទីផ្សារពិភពលោក ប៉ុន្តែអ្វីដែលជាវិញ្ញាសារនេះរាជរដ្ឋាភិបាល ក្រសួងកសិកម្ម រុក្ខាប្រម៉ាញ់ ខិតខំធ្វើយ៉ាងណា ដើម្បីធានាឱ្យបានអស់លទ្ធភាពនូវទីផ្សារ និងតម្លៃថេរមួយចំនួន ចំពោះផលិតផលយុទ្ធសាស្រ្តមួយចំនួន ដែលរាជរដ្ឋាភិបាលអាណិត្តទី៧នេះ យើងដាក់ចេញគោលនយោបាយ យើងដាក់ចេញនូវកញ្ចប់ថវិកា១០០លានដុល្លារ ដើម្បីត្រៀមអន្តរាគមន៍សម្រាប់កសិផល»។
សម្តេចធិបតីលើកឡើងថា គោលនយោបាយរបស់រាជរដ្ឋាភិបាល គឺមិនគិតតែលើអ្វីដែលកសិករដាំនោះទេ អ្វីដែលសំខាន់ គឺផលដែលកសិករទទួលបាន នោះគឺចំណូល និងផលចំណេញច្រើន ដូច្នេះហើយទាមទារឱ្យមាននូវបច្ចេកវិទ្យា ដើម្បីជួយកាត់បន្ថយនូវថ្លៃដើមផលិត និងបង្កើនទិន្នផលខ្ពស់។ សម្តេចថា ក្នុងមួយឆ្នាំកម្ពុជាបាននាំចូលផលិតផលទាក់ទងទឹកដោះគោចំនួន ៩៨ពាន់តោនក្នុងមួយឆ្នាំ ដែលគិតជាថវិកាសរុប ៧៣៩លានដុល្លារ៕
