សម្តេចធិបតី៖ រាជរដ្ឋាភិបាល អាចបន្តរក្សាបាន ចលនការរឹងមាំនៃសុខសន្តិភាព និងលើកកម្ពស់កំណើនសេដ្ឋកិច្ច
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា តាមរយៈការដាក់ចេញនូវយុទ្ធសាស្រ្តដ៏មុតស្រួចនេះ រាជរដ្ឋាភិបាល អាចបន្តរក្សាបាននូវចលនការរឹងមាំនៃសុខសន្តិភាពនិងលើកកម្ពស់កំណើនសេដ្ឋកិច្ច ក៏ដូចជាសម្ទុះនៃកិច្ចអភិវឌ្ឍ ប្រទេសជាតិ ក្នុងការឆ្លើយតបទៅនឹងបដិវត្តន៍ឧស្សាហកម្មទី៤ និងការកសាងភាពធន់នៅក្នុងវិស័យសាធារណៈ ហិរញ្ញវត្ថុ សេដ្ឋកិច្ច សង្គម និងបរិស្ថាន ។
ក្នុងពិធីបិទសន្និបាតបូកសរុបការងាររបស់ក្រសួងធនធានទឹកនិងឧតុនិយម គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប ក្នុងក្របខណ្ឌទូទាំងប្រទេសប្រចាំឆ្នាំ២០២៣ និងលើកទិសដៅអនុវត្តឆ្នាំ២០២៤ នៅថ្ងៃទី១០ ខែមេសា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលនីតិកាលទី៧នៃរដ្ឋសភា បានដាក់ចេញនូវយុទ្ធសាស្រ្តបញ្ចកោណ-ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ដោយកំណត់យកអាទិភាពគន្លឹះចំនួន៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ៕
