កម្មវិធីចង្ក្រានសប្បុរស លើកទី២៥ នាំយក អំណោយទៅចែកជូន ប្រជាពលរដ្ឋជួបការលំបាក១០០គ្រួសារ នៅសង្កាត់បឹងកក់ទី១

ភ្នំពេញ៖ ប្រជាពលរដ្ឋ ជួបការលំបាក ប្រមាណ ១០០គ្រួសារ ដែលរស់នៅ សង្កាត់បឹងកក់ទី១ ខណ្ឌទួលគោក រាជធានីភ្នំពេញ បានទទួលអំណោយ ពីកម្មវិធីចង្ក្រានសប្បុរស របស់ឯកឧត្តម លី ច័ន្ទតុលា និងលោកជំទាវ ឈីវ ភិរម្យ រួមជាមួយនិង សប្បុរសជនជាមេធាវី មិនមែនមេធាវី និង ក្រុមហ៊ុន ឯកជន។

កម្មវិធីចង្ក្រានសប្បុរស លើកទី២៥ បានរៀបចំឡើង នៅសាលាបឋមសិក្សា ទួលគោក ក្រោយអធិបតីភាព ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ និងជាប្រធាន ក្រុមការងារថ្នាក់ជាតិ ចុះជួយខណ្ឌទួលគោក និងឯកឧត្ដម លី ច័ន្ទតុលា ប្រធាន គណៈមេធាវី នៃព្រះរាជាណាចក្រកម្ពុជា ព្រមជាមួយលោកជំទាវ ឈីវ ភិរម្យ ស្ថាបនិកនៃ កម្មវិធីចង្ក្រានសប្បុរស រួមជាមួយសប្បុរសជន ជាមេធាវី មិនមែនមេធាវី និង ក្រុមហ៊ុន ឯកជន កាលពីថ្ងៃទី០៧ ខែមេសា ឆ្នាំ២០២៤ ។

ឯកឧត្ដម លី ច័ន្ទតុលា ប្រធាន គណៈមេធាវី នៃព្រះរាជាណាចក្រកម្ពុជា បានលើកឡើងថា កម្មវិធីចង្ក្រានសប្បុរស លើកទី២៤ ត្រូវបានបង្កើតឡើង នៅឆ្នាំ២០២១ នៅក្នុងកំឡុងពេលដែលកម្ពុជា រងនូវជំងឺកូវីដ១៩ ខណៈពេលដែលបិទខ្ទប់ ហើយក៏បានបន្ត រហូតមកដល់បច្ចុប្បន្ន ដែលបានចែកជូនអាហារឆ្ងាញ់មួយពេល បានប្រមាណជាង ៩៤៩០ គ្រួសារ គិតតាំង ពីលើកទី១ នៅក្នុងខែមេសា ឆ្នាំ២០២១មក។។

ឯកឧត្តម លី ច័ន្ទតុលា បានលើកឡើងថា ក្នុងពេលបច្ចុប្បន្ន ដែលប្រទេសមាន សន្តិភាពគ្រប់គ្រាន់ ប្រជាពលរដ្ឋទាំងអស់ មិនខ្វះហូបដូច ក្នុងរបបប៉ុលពត ឬ នៅក្នុងពេលសង្រ្គាមទៀតនោះទេ តែអចស្ទើរឆ្ងាញ់បន្តិច ឬ អាចឆ្ងាញ់បានមិនសូវច្រើនពេល។ កម្មវិធីចង្ក្រានសប្បុរស មានគោលបំណងជូនឆ្ងាញ់ មួយពេល ដល់ប្រជាពលរដ្ឋ ដែលមានជីវភាពខ្វះខាត រួមជាមួយ និងគ្រឿងទេសមួយចំនួន។

ជាមួយកម្មវិធីចង្ក្រានសប្បុរស លើកទី២៥នេះផងដែរ ឯកឧត្តម លី ច័ន្ទតុលា បានស្នើសុំបងប្អូន ប្រជាពលរដ្ឋ ដែលមកទទួលអំណោយ អោយចូលរួមអនុវត្ត គោលការណ៌កម្មវិធី ចង្ក្រានចំនួន ៣ ចំនូច។ ទី១គឺ សុំអោយបងប្អូនប្រជាពលរដ្ឋ ប្រឹងប្រែង បញ្ជូនកូនចៅ សមាជិកគ្រួសារ អោយបានទៅរៀន រៀនអោយបានពូកែ រៀនអោយបានខ្ពស់ អោយអស់លទ្ធភាពពីខ្លួន។ ទី២ សុំអោយបងប្អូនប្រជាពលរដ្ឋមានកតញ្ញូតាធម៌ ដឹងគុណសន្តិភាព និង នឹករលឹកដឹងគុណដល់ស្ថាបនិកនៃសន្តិភាព នោះគឺសម្តេចតេជោហ៊ុនសែន ដែលបានប្តូរជីវិត ទៅយកសន្តិភាពមក ហើយនិងបាន ថែរក្សាសន្តិភាព មកដល់បច្ចុប្បន្ន។ ទី៣ ឯឧ លី ច័ន្ទតុលា លើកទឹកចិត្តបងប្អូនប្រជាពលរដ្ឋ ដែលមកទទួលអំណោយ ចូលរួមសកម្មភាព ចែករំលែកបន្ត តាមលទ្ធភាពដែលអាចធ្វើបាន។

ថ្លែងក្នុងកម្មវិធីចង្ក្រានសប្បុរស លើកទី២៥ នៅសាលាបឋមសិក្សា ទួលគោក ឯកឧត្តម កិត្តិនីតិកោសលបណ្ឌិត ឱម យ៉ិនទៀង មានប្រសាសន៍ កោតសរសើរចំពោះ ឯកឧត្ដម លី ច័ន្ទតុលា ប្រធានគណៈមេធាវី នៃព្រះរាជាណាចក្រកម្ពុជា ព្រមជាមួយលោកជំទាវ ឈីវ ភិរម្យ ស្ថាបនិកនៃ កម្មវិធីចង្ក្រានសប្បុរស ដែលបានដឹកនាំ ក្រុមការងារជា មេធាវី រួមជាមួយ និងសប្បុរសជន នៃក្រុមហ៊ុនឯកជន ក្នុងការចុះជួយ ដល់បងប្អូនប្រជាពលរដ្ឋ ខ្វះខាត។

ជាចុងក្រោយ ឯកឧត្តម កិត្តិនីតិកោសលបណ្ឌិត ក៏បានជូន នូវ ពុទ្ធពរ ៤ ប្រការ គឺ អាយុ វណ្ណៈ សុខៈ ពលៈ បានជូននូវពររបស់សម្តេចសង្ឃជួនណាត នោះគឺ បដិភាណៈ និង ពរទាំងពីរ ២ប្រការរបស់សម្តេចហ៊ុនសែន នោះគឺ សន្តិភាព និង ការអភិវឌ្ឍន៌ ជូនទៅក្រុមការងារចង្ក្រានសប្បុរស ក្រុមការងារចុះជួយសង្កាត់ អាជ្ញាធរមូលដ្ឋានគ្រប់ជាន់ថ្នាក់ និងអ្នកចូលរួមទាំងអស់។

កម្មវិធីបានបញ្ចប់ទៅដោយភាពរីករាយ និង ស្និតស្នាលជាទីបំផុត ជាមួយនឹងស្នាមញញឹមចេញពីចិត្តរបស់ប្រជាពលរដ្ឋ អ្នកចូលរួមទាំង១០០ គ្រួសារ។

សូមបញ្ចាក់ថា កម្មវិធីចង្ក្រានសប្បុរស លើកទី២៥ បាននាំយកអំណោយទៅចែកជូន ប្រជាពលរដ្ឋ ជួបការលំបាក១០០គ្រួសារ នៅសង្កាត់បឹងកក់ទី១ ខណ្ឌទួលគោក ឯកឧត្តម កិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ និងជាប្រធាន ក្រុមការងារថ្នាក់ជាតិ ចុះជួយខណ្ឌទួលគោក និងឯកឧត្ដម លី ច័ន្ទតុលា ប្រធាន គណៈមេធាវី នៃព្រះរាជាណាចក្រកម្ពុជា ព្រមជាមួយលោកជំទាវ ឈីវ ភិរម្យ ស្ថាបនិកនៃ កម្មវិធីចង្ក្រានសប្បុរស បានរៀបចំ លេងល្បែងប្រជាប្រិយខ្មែរ រួមមាន ល្បែង វាយក្អម គឺជាល្បែងពេញនិយមមួយ ក្នុងចំណោម ល្បែងប្រជាប្រិយខ្មែរ ជាច្រើន រាំទូលក្អម តាមចង្វាក់ភ្លេងយ៉ាងសប្បាយ ទាញ់ព្រ័ត្រ និងរាំម៉ាទីសុន ដើម្បីបង្ហាញពីប្រពៃណី វប្បធម៌ និងទំនៀមទម្លាប់ខ្មែរ ក្នុងឱកាសបុណ្យចូលឆ្នាំ៕