ញូវដែលី៖ រដ្ឋមន្ត្រីការបរទេសអ៊ុយក្រែន លោក Dmytro Kuleba បានជំរុញឲ្យឥណ្ឌាពិចារណាឡើងវិញនូវទំនាក់ទំនងជាប្រវត្តិសាស្ត្រជាមួយរុស្ស៊ី ដោយលើកឡើងពីការធ្លាក់ចុះនៃកេរ្តិ៍ដំណែលសូវៀត។
យោងតាមរបាយការណ៍ពី Financial Times ការអង្វររបស់លោក Kuleba កើតឡើងចំពេលដែលឥណ្ឌាមានសម្ព័ន្ធភាពសេដ្ឋកិច្ច និងការពារជាតិយូរអង្វែងជាមួយទីក្រុងមូស្គូ ចំពេលមានសង្រ្គាមរបស់រុស្ស៊ីនៅអ៊ុយក្រែនចាប់តាំងពីខែកុម្ភៈ ឆ្នាំ២០២២។
លោក Kuleba បានបន្តថា កិច្ចសហប្រតិបត្តិការរវាងឥណ្ឌា និងរុស្ស៊ី ភាគច្រើនផ្អែកលើកេរ្តិ៍ដំណែលសូវៀត ប៉ុន្តែនេះមិនមែនជាកេរដំណែលដែលនឹងត្រូវរក្សាទុករាប់សតវត្សន៍នោះទេ វាគឺជាកេរដំណែលដែលកំពុងតែរសាត់បាត់ទៅហើយ។
ក្នុងដំណើរទស្សនកិច្ចរយៈពេលពីរថ្ងៃរបស់គាត់ទៅកាន់ប្រទេសឥណ្ឌា លោក Kuleba បានសង្កត់ធ្ងន់លើអត្ថប្រយោជន៍សក្តានុពលនៃការជំរុញភាពជាដៃគូពាណិជ្ជកម្ម និងបច្ចេកវិទ្យារវាងប្រជាជាតិទាំងពីរ។
លោកបានបង្ហាញចំណាប់អារម្មណ៍របស់អ៊ុយក្រែនក្នុងការនាំចូលគ្រឿងយន្តធុនធ្ងន់ជាច្រើនដែលផលិតនៅក្នុងប្រទេសឥណ្ឌាក្នុងគោលបំណងស្តារទំនាក់ទំនងពាណិជ្ជកម្មឡើងវិញ ជាពិសេសផលិតផលកសិកម្មដូចជាប្រេងផ្កាឈូករ័ត្នជាដើម។
លើសពីនេះទៀតលោក Kuleba បានបន្តការអញ្ជើញក្រុមហ៊ុនឥណ្ឌាឱ្យចូលរួមក្នុងកិច្ចខិតខំប្រឹងប្រែងកសាងឡើងវិញក្រោយសង្គ្រាមរបស់អ៊ុយក្រែន។
អ៊ុយក្រែនមានបំណងរៀបចំកិច្ចប្រជុំកំពូលនៃមេដឹកនាំពិភពលោក ដោយមិនរាប់បញ្ចូលរុស្ស៊ី ដើម្បីជំរុញរបៀបវារៈសន្តិភាពរបស់ខ្លួន ដែលរួមមានការដកកងកម្លាំងរុស្ស៊ីចេញពីទឹកដីអ៊ុយក្រែន។
លោក Kuleba បានបញ្ជាក់យ៉ាងច្បាស់ថា អ៊ុយក្រែនមិនប្រឆាំងនឹងកិច្ចសហការរវាងឥណ្ឌា និងរុស្ស៊ីនោះទេ ប៉ុន្តែបានសង្កត់ធ្ងន់លើសារៈសំខាន់នៃការយល់ដឹងរបស់ឥណ្ឌាអំពីគោលជំហររបស់អ៊ុយក្រែនទាក់ទងនឹងការគាំទ្រចំពោះសកម្មភាពយោធារបស់រុស្ស៊ី។
លោក Kuleba បានគូសបញ្ជាក់អំពីការកើនឡើងនៃទំនាក់ទំនងរវាងទីក្រុង New Delhi និង Kyiv ចាប់តាំងពីការចាប់ផ្តើមនៃជម្លោះជាមួយរុស្ស៊ី។
យ៉ាងណាមិញ រុស្ស៊ីបានច្រានចោលកិច្ចខិតខំប្រឹងប្រែងការទូតរបស់អ៊ុយក្រែនថាមិនអាចសម្រេចបាន។
