ជម្លោះរវាងម្តាយ និងកូនស្រីបង្កើតករណីដីស្រែអំបិលជាង៣១ហិកតា នៅស្រុកទឹកឈូ ត្រូវបានតុលាការសម្រេចឱ្យម្តាយអាយុជាង៨៥ឆ្នាំឈ្នះក្តី
ភ្នំពេញ៖ តុលាការខេត្តកំពត បានចុះអនុវត្តសាលក្រមរដ្ឋប្បវេណីស្ថាពរខាងលើ ដែលបានសម្រេចឱ្យម្ដាយបង្កើតជាដើមចោទ ឈ្មោះ ឈុន ហឹង អាយុ ៨៥ឆ្នាំ ជនជាតិខ្មែរ មានទីលំនៅភូមិសុវណ្ណសាគរ សង្កាត់កំពង់កណ្ដាល ក្រុងកំពត ខេត្តកំពត មានអត្ថិភាពនៃសិទ្ធិលើកម្មសិទ្ធិលើដីទំហំ ៣១.៥៩ហិកតា ដែលមានព្រំប្រទល់ ខាងជើងទល់នឹងព្រែក, ខាងត្បូងទល់នឹងផ្លូវរថភ្លើង+ព្រែក, ខាងកើតទល់នឹងព្រែក, ខាងលិចទល់នឹងដីស្រែប្រជាពលរដ្ឋ ដែលមានទីតាំងស្ថិតនៅភូមិកំពង់សំរោង ឃុំកំពង់សំរោង ស្រុកទឹកឈូ ខេត្តកំពត។
បន្ថែមពីនេះ តុលាការបង្គាប់ឱ្យចុងចម្លើយជាកូនប្រសារ ឈ្មោះ ណុប សារ៉េត ភេទប្រុស អាយុ៥៦ឆ្នាំ ជនជាតិខ្មែរ និងប្រពន្ធត្រូវជាកូនស្រីបង្កើតរបស់ដើមចោទ ឈ្មោះ ហោ សឺយ មានទីលំនៅភូមិសុវណ្ណសាគរ សង្កាត់កំពុងកណ្ដាល ក្រុងកំពត ខេត្តកំពត ត្រូវចាកចេញពីទំហំដី ៣១.៥៩ហិកតា ស្ថិតក្នុងទីតាំងភូមិសាស្ត្រខាងលើ។
សាលក្រមស្ថាពររបស់សាលាដំបូងខេត្តកំពត ក៏ត្រូវបង្គាប់ឱ្យចុងចម្លើយឈ្មោះ ណុប សារ៉េត និងប្រពន្ធឈ្មោះ ហោ សឺយ ប្រគល់ដីទំហំ ៣១.៥៩ហិកតា មានទីតាំងក្នុងភូមិសាស្ត្រខាងលើទៅឱ្យដើមចោទជាម្ដាយឈ្មោះ ឈុន ហុឹង វិញដែរ។
ការចុះអនុវត្តសាលក្រមនេះ ប្រជាពលរដ្ឋរស់នៅក្នុងភូមិកំពង់សំរោងភាគច្រើន មានការគាំទ្រ និងអបអរសាទរពាក់ព័ន្ធនឹងចំណាត់ការនៃសាលក្រម មានភាពត្រឹមត្រូវ យុត្តិធម៌របស់តុលាការ ដែលបានរកយុត្តិធម៌ជូនលោកយាយជាដើមចោទ អាយុ៨៥ឆ្នាំ មានភាពចាស់ជរា ហើយត្រូវជាម្ដាយបង្កើតរបស់ចុងចោទជាប្ដីប្រពន្ធផងដែរ៕
