សហព័ន្ធខ្មែរកីឡាហាប់គីដូ រៀបចំការប្រឡងខ្សែក្រវាត់ និងឧបត្ថម្ភថវិកាលើកទឹកចិត្ត ជូនដល់សិស្សគុន
ភ្នំពេញ៖ សហព័ន្ធខ្មែរកីឡាហាប់គីដូបានរៀបចំការប្រឡងសមត្ថភាពឡើងខ្សែក្រវាត់តាមកម្រិតនីមួយៗរបស់កីឡាករ កីឡាការិនី និងឧបត្ថម្ភថវិកាលើកទឹកចិត្តដល់កីឡាករ កីឡាការិនីមួយចំនួន ផងដែរ។
លោក គង់ ចាន់ធីណា អគ្គលេខាធិការ សហព័ន្ធខ្មែរកីឡាហាប់គីដូគូសបញ្ជាក់ថា ដោយទទួលបានការអនុញ្ញាតពីលោកឧកញ៉ា សៅ សេងហាក់ ប្រធានសហព័ន្ធខ្មែរកីឡាហាប់គីដូបានឱ្យគ្រូបង្វឹករៀបចំការប្រឡងឡើងខ្សែក្រវាត់តាមកម្រិតដាន់នីមួយៗ ដែលជាការលើកទឹកចិត្តដល់សិស្សគុនទាំងអស់នោះ ដែលបានប្រឹងប្រែងហ្វឹកហាត់យ៉ាងយកចិត្តទុកដាក់នាពេលកន្លងមក។
ជាមួយគ្នានេះ លោកឧកញ៉ា សៅ សេងហាក់ ក៏បានឧបត្ថម្ភលើកទឹកចិត្តជូនដល់កីឡាករ កីឡាការិនីវ័យក្មេង ដែលបានចូលរួមសម្តែងកីឡាហាប់គីដូ ក្នុងព្រឹត្តិការណ៍បើកការប្រកួតកីឡាបាល់ទាត់ពានរង្វាន់ក្រសួងមហាផ្ទៃ កាលពីថ្ងៃទី០១ ខែមីនា ឆ្នាំ២០២៤ កន្លងទៅថ្មីៗនេះ។ ចំពោះគ្រូជំនួយមួយចំនួនក៏ទទួលបានការឧបត្ថម្ភជាថវិកាលើកទឹកចិត្តជូនដល់ពួកគាត់ ដោយគ្រូជំនួយទាំងនោះបានជួយបង្ហាត់បង្រៀនសិស្សគុន នៅក្នុងសហព័ន្ធកីឡាហាប់គីដូ។
ការប្រឡងឡើងខ្សែក្រវាត់នេះមានសិស្សគុនចូលរួមចំនួន ៣០នាក់ ដែលប្រឡងពីកម្រិតខ្សែក្រវាត់ពី ស ឡើង សឆ្នូត ពីសឆ្នូត ឡើងលឿង ពីលឿង ឡើង លឿងឆ្នូត និងពីលឿងឆ្នូតទៅខ្សែក្រវាត់ពណ៌ទឹកក្រូច និងពីខ្សែក្រវាត់ពីពណ៌បៃតងទៅ បៃតងឆ្នូតជាដើម។
ជាមួយនឹងការរៀបចំឱ្យមានការប្រឡង រួមទាំងការជួយឧបត្ថម្ភថវិកាលើកទឹកចិត្តពីលោកឧកញ៉ាប្រធានសហព័ន្ធ និងថ្នាក់ដឹកនាំសហព័ន្ធ ក្នុងពេលនេះ ត្រូវបានលោកអគ្គលេខាធិការ គង់ ចាន់ធីណា អះអាងថាជាការលើកទឹកចិត្ត ដើម្បីជំរុញដល់ការលើកកម្ពស់ក្បាច់គុន និងអភិវឌ្ឍជំនាញកីឡាមួយនេះ នៅកម្ពុជាឱ្យកាន់តែរីកចម្រើនបន្ថែមទៀត។
ជាមួយគ្នានេះ លោកអគ្គលេខាធិការ តំណាងឱ្យគ្រូជំនួយ កីឡាករ កីឡាការិនីទាំងអស់សូមថ្លែងអំណរគុណចំពោះថ្នាក់ដឹកនាំសហព័ន្ធ ដែលយកចិត្តទុកដាក់លើកទឹកចិត្តជូនដល់ពួកគាត់ តាមរយៈការចំណាយថវិកាផ្ទាល់ខ្លួនរបស់ថ្នាក់ដឹកនាំគ្រប់ៗរូប រួមទាំងឯកឧត្តម យិត ភីរៈ អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ដែលបានជួយជ្រោមជ្រែងផ្តល់ទីតាំង និងតម្រូវការមួយចំនួនទៀត ក្នុងគោលដៅជួយជំរុញការអភិវឌ្ឍវិស័យកីឡាហាប់គីដូកម្ពុជាឱ្យបោះជំហានទៅមុខជាបន្តបន្ទាប់ទៀត៕
