សម្តេចធិបតី អំពាវនាវតួអង្គពាក់ព័ន្ធទាំងអស់ បន្តការសហការអនុវត្តនូវឯកសារគតិយុត្ត នវានុវត្តន៍ប្រកបដោយតម្លាភាព ប្រសិទ្ធភាព ដើម្បីប្រែក្លាយបញ្ហាប្រឈមនានាឱ្យទៅជាកាលានុវត្តភាព
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រសាសន៍អំពាវនាវតួអង្គពាក់ព័ន្ធទាំងអស់ឱ្យបន្តការសហការគ្នាអនុវត្តនូវឯកសារគតិយុត្ត នវានុវត្តន៍ប្រកបដោយតម្លាភាព ប្រសិទ្ធភាព ដើម្បីប្រែក្លាយបញ្ហាប្រឈមនានាឱ្យទៅជាកាលានុវត្តភាព បង្កើតសក្តានុពលពីការវិវត្តជាវិជ្ជមាននៃបច្ចេកវិទ្យាសំខាន់ៗ បង្កើតបច្ចេកវិទ្យាថ្មីៗទៀត ក្នុងរយៈពេលខ្លី និងមធ្យម ដែលមានលក្ខណៈនវានុវត្តន៍ សម្រាប់ចូលរួមចំណែកអភិវឌ្ឍសេដ្ឋកិច្ចជាតិប្រកបដោយប្រសិទ្ធភាព និងភាពធន់។
សម្តេចធិបតី មានប្រសាសន៍អំពាវនាវបែបនេះ ក្នុងឱកាសដែលសម្តេចបានអញ្ជើញបើកទិវាជាតិ វិទ្យាសាស្ត្រ បច្ចេកវិទ្យា និងនវានុវត្តន៍ លើកទី២ នាព្រឹកថ្ងៃទី២៤ ខែមីនា ឆ្នាំ២០២៤។
សម្តេចធិបតី ហ៊ុន ម៉ាណែត បានថ្លែងថា ដើម្បីសម្រេចបានប្រព័ន្ធអេកូឡូស៉ីជាតិមួយប្រកបដោយនវានុវត្តន៍ បច្ចុប្បន្នកម្ពុជា មានឯកសារគតិយុត្តគោលមួយចំនួន ទាក់ទងនឹងវិទ្យាសាស្ត្រ បច្ចេកវិទ្យា និងនវានុវត្តន៍ ដោយក្នុងនោះមានជាអាទិ៍៖ គោលនយោបាយជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ២០២០-២០២៣០ ផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា ឆ្នាំ២០២០-២០៣០ របៀបវារៈស្រាវជ្រាវជាតិ ២០២៥ និងផែនទីបង្ហាញផ្លូវបច្ចេកវិទ្យាអាទិភាពផ្សេងៗរួមមាន៖ បច្ចេកវិទ្យាកសិកម្ម បច្ចេកវិទ្យាអប់រំ បច្ចេកវិទ្យាសុខាភិបាល ដែលបានអនុម័តព្រមទាំងបណ្តាលឯកសារផែនទីបង្ហាញផ្លូវមួយចំនួនទៀតដែលបានបញ្ចប់សេចក្តីព្រាងរួចរាល់ ដូចជា៖ បច្ចេកវិទ្យាឋាមពល បច្ចេកវិទ្យាទេសចរណ៍ និងបច្ចេកវិទ្យាឌីជីថល សម្រាប់ការអនុវត្តតាមក្រសួង ស្ថាប័នពាក់ព័ន្ធ និងដៃគូក្នុងប្រព័ន្ធនវានុវត្តន៍ជាតិ។
សម្ដេចធិបតី នាយករដ្ឋមន្ត្រី បានបន្តថា ការអភិវឌ្ឍប្រទេសប្រកបដោយបរិយាបន្ន មានតម្លាភាព ធន់ និងចីរភាព គឺចាំបាច់ចូលរួមអនុវត្តន៍កត្តាសំខាន់ៗរួមមាន៖
ទី១-ការជំរុញសកម្មភាពសេដ្ឋកិច្ច ពាណិជ្ជកម្ម និងការវិនិយោគតាមរយៈការជំរុញដោយផ្ទាល់ពីបរទេសទៅលើវិស័យដែលមានបច្ចេកវិទ្យាជាមូលដ្ឋាន មានតម្លៃខ្ពស់ នៅក្នុងក្របខណ្ឌកិច្ចព្រមព្រៀងពាណិជ្ជកម្មសេរីជាដើម។
ទី២-ជំរុញបន្ទាន់ចំពោះការផ្ទេរបច្ចេកវិទ្យា តាមរយៈខ្សែបណ្តោយរវាងសហគ្រាស និងសហគ្រាស។
ទី៣-ការផ្ទេរបច្ចេកវិទ្យាអាទិភាពចំណេះដឹង ចំណេះធ្វើ ការបណ្តុះបណ្តាលជំនាញឡើងវិញ ការលើកម្ពស់ជំនាញ។
ទី៤-ការជំរុញឱ្យមានលំហូរអ្នកមានទេពកោសល្យ និងការជំរុញឌីជីថលនូបនីយកម្ម ប្រកបដោយបរិយាបន្ន ការរៀបចំបរិស្ថានល្អ ដើម្បីរក្សា និងទាក់ទាញអ្នកដែលមានទេពកោសល្យ។ល។
លើសពីនេះ សម្តេចធិបតី នាយករដ្ឋមន្ត្រី បានស្នើឱ្យគ្រឹះស្ថានអប់រំបណ្តុះបណ្តាល ស្រាវជ្រាវ និង វិស័យឯកជន ជាពិសេស សហគ្រាសធុនតូច និងមធ្យម ត្រូវសហការគ្នាជាមួយក្រសួង-ស្ថាប័នរាជរដ្ឋាភិបាល ដើម្បីបង្កើតនូវមូលដ្ឋានរឹងមាំផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ លើគ្រប់វិស័យ។
សម្តេចធិបតី នាយករដ្ឋមន្ត្រី ក៏បានស្នើឱ្យក្រសួង-ស្ថាប័នពាក់ព័ន្ធ បន្តកិច្ចសហការគាំទ្រការដឹកនាំ និងសម្របសម្រួលដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីឱ្យវិស័យអាទិភាពនេះ ក្លាយជាខឿននៃការ អភិវឌ្ឍសង្គម-សេដ្ឋកិច្ចកម្ពុជា បានប្រសើរឡើង ៕
