ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក បន្តរួមដំណើរចុះបេសកកម្មជាមួយប្រតិភូគណៈកម្មការទី៣ នៃរដ្ឋសភា នៅខេត្តពោធិ៍សាត់

ភ្នំពេញ៖ នៅថ្ងៃសុក្រ ១៣កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២២ ខែមីនា ឆ្នាំ២០២៤ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្រសួងធនធានទឹក និងឧតុនិយម អមដំណើរដោយឯកឧត្តមថ្នាក់ដឹកនាំ លោកប្រធាននាយកដ្ឋានធារាសាស្ត្រកសិកម្ម មន្រ្តីបច្ចេកទេសក្រសួង និងប្រធានមន្ទីរធនធានទឹក និងឧតុនិយមខេត្តពោធិ៍សាត់ បានអញ្ជើញចូលរួមដំណើរបេសកកម្មជាមួយប្រតិភូគណៈកម្មការទី៣ នៃរដ្ឋសភា ដឹកនាំដោយឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ ដើម្បីសិក្សាឈ្វេងយល់អំពីការអភិវឌ្ឍ និងបញ្ហាប្រឈមនានារបស់រដ្ឋបាលខេត្តពោធិ៍សាត់ និងមន្ទីរអង្គភាពជំនាញដែលពាក់ព័ន្ធនឹងសមត្ថកិច្ចរបស់គណៈកម្មការទី៣ នៃរដ្ឋសភា នៅក្នុងការអនុវត្តកម្មវិធីនយោបាយ និងយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា។

ក្នុងឱកាសនោះ ប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម (គណៈកម្មការទី៣) នៃរដ្ឋសភា ដឹកនាំដោយឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ រួមជាមួយឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានអញ្ជើញចុះពិនិត្យមើលពីសក្តានុពលប្រព័ន្ធធារាសាស្ត្រដំណាក់ឈើក្រំ ស្ថិតនៅភូមិព្រែកមួយ ឃុំសំរោង ស្រុកតាលោសែនជ័យ និងប្រព័ន្ធធារាសាស្រ្តដំណាក់អំពិល ស្ថិតនៅភូមិដំណាក់អំពិល សង្កាត់លលកសរ ក្រុងពោធិ៍សាត់ ខេត្តពោធិ៍សាត់។ ជាមួយគ្នានេះ គណៈប្រតិភូក៏បានស្វែងយល់ពីការខ្វះខាតទឹក ការប្រើប្រាស់ទឹក និងបញ្ហាប្រឈមនានាទាក់ទងនឹងសន្តិសុខទឹកក្នុងខេត្តពោធិ៍សាត់ផងដែរ។

សូមជម្រាបថា ប្រព័ន្ធស្រោចស្រពដំណាក់ឈើក្រំ ដែលស្ថិតនៅចម្ងាយ ៣០គីឡូម៉ែត្រពីក្រុងពោធិ៍សាត់ ទទួលប្រភពទឹកពីតំបន់ជួរភ្នំក្រវាញតាមដងស្ទឹងធំមកពីស្រុកវាលវែង បម្រើឱ្យការស្រោចស្រពក្នុងឃុំចំនួនបួន នៃស្រុកចំនួនពីរ គឺស្រុកភ្នំក្រវាញ និងស្រុកតាលោសែនជ័យ មានសក្តានុពលស្រោចស្រពលើផ្ទៃដីស្រូវរដូវវស្សាចំនួន ១៦,១០០ហិកតា និង ស្រូវរដូវប្រាំងចំនួន ៤,៥០០ហិកតា និងមានប្រជាពលរដ្ឋទទួលផលចំនួន ៩,២៦០គ្រួសារ។ ដោយឡែក ប្រព័ន្ធស្រោចស្រពដំណាក់អំពិល ស្ថិតនៅចម្ងាយ ១៨គម ពីក្រុងពោធិ៍សាត់ ទទួលប្រភពទឹកពីតំបន់ជួរភ្នំក្រវាញតាមដងស្ទឹងពោធិ៍សាត់ និងអាងទឹកនៃ ទំនប់ទី៣ និងទំនប់ទី៥ នៅស្រុកភ្នំក្រវាញ បម្រើឱ្យការស្រោចស្រពក្នុងឃុំចំនួន១១ នៃក្រុង ស្រុក ចំនួន៣ គឺក្រុងពោធិ៍សាត់ ស្រុកភ្នំក្រវាញ និងស្រុកបាកាន មានសក្តានុពលស្រោចស្រពលើផ្ទៃដីស្រូវវស្សាពី ២៧,០០០ហិកតា ទៅ៥០,០០០ហិកតា និងស្រូវប្រាំងពី ៣,៥០០ហិកតា ទៅ១០,០០០ហិកតា និងមានប្រជាពលរដ្ឋទទួលផលចំនួន ៧,៨៦០គ្រួសារ។

បន្ទាប់ពីបានចុះឈ្វេងយល់ពីសក្តានុពលប្រព័ន្ធធារាសាស្រ្តរបស់ខេត្តពោធិ៍សាត់រួចមក ប្រតិភូគណៈកម្មការទី៣ នៃរដ្ឋសភា បានអញ្ជើញចូលរួមកិច្ចប្រជុំនៅសាលាខេត្តពោធិ៍សាត់ ដើម្បីស្វែងយល់បន្ថែម តាមរយៈរបាយការណ៍សង្ខេបរបស់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ អំពីសភាពការណ៍រួមរបស់វិស័យពាក់ព័ន្ធនានា សក្តានុពល វឌ្ឍនភាព និងបញ្ហាប្រឈមនានារបស់រដ្ឋបាលខេត្ត និងមន្ទីរ អង្គភាពជំនាញដែលពាក់ព័ន្ធនឹងសមត្ថកិច្ចរបស់គណៈកម្មការទី៣ នៃរដ្ឋសភា។

ឯកឧត្តមសន្តិបណ្ឌិតប្រធានប្រតិភូបានថ្លែងនូវការកោតសរសើរដល់ការរីកចម្រើនយ៉ាងឆាប់រហ័ស លើគ្រប់វិស័យនៅក្នុងខេត្តពោធិ៍សាត់ និងបានវាយតម្លៃខ្ពស់ចំពោះកិច្ចខិតខំប្រឹងប្រែងបំពេញភារកិច្ចយ៉ាងសកម្មរបស់ខេត្ត និងមន្ទីរ អង្គភាពពាក់ព័ន្ធរហូតសម្រេចបានលទ្ធផលត្រចះត្រចង់ជូនប្រជាពលរដ្ឋនៅក្នុងខេត្តទាំងមូល ៕