គណៈកម្មការទី៣ នៃរដ្ឋសភា ចុះពិនិត្យសិក្សាប្រព័ន្ធធារាសាស្ត្រដំណាក់ឈើក្រំ ភូមិព្រែកមួយ ស្រុកតាលោសែនជ័យ
ភ្នំពេញ៖ គណៈប្រតិភូគណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយម នៃរដ្ឋសភា ដឹកនាំដោយ ឯកឧត្តមសន្តិបណ្ឌិត ឡូយ សុផាត ប្រធានគណៈកម្មការ នាថ្ងៃទី២២ ខែមីនា ឆ្នាំ២០២៤ បានអញ្ជើញចុះពិនិត្យសិក្សាប្រព័ន្ធធារាសាស្ត្រដំណាក់ឈើក្រំ ស្ថិតនៅភូមិព្រែកមួយ ឃុំសំរោង ស្រុកតាលោសែនជ័យ និងប្រព័ន្ធធារាសាស្ត្រដំណាក់អំពិល ស្ថិតនៅភូមិដំណាក់អំពិល សង្កាត់លលកសរ ក្រុងពោធិ៍សាត់ ខេត្តពោធិ៍សាត់។
តាមប្រសាសន៍លោកប្រធានមន្ទីរធនធានទឹកខេត្តពោធិ៍សាត់ បានឱ្យដឹងថា ប្រព័ន្ធធារាសាស្រ្តដំណាក់ឈើក្រំអាចផ្ទុកទឹកបាន១០លានម៉ែត្រគូប ហើយអាចផ្គត់ផ្គង់ទឹកដល់ប្រជាកសិករធ្វើស្រែប្រាំងបាន២ដងក្នុងផ្ទៃដី១ម៉ឺនហិកតា។ ចំពោះប្រព័ន្ធធារាសាស្រ្តដំណាក់អំពិលស្តុកទឹកបាន២៧០០០ពាន់ម៉ែត្រគូប ហើយបែងចែកទឹកទៅតាមប្រឡាយមេ ដែលស្រោចស្របដល់ផ្ទៃដីធ្វើស្រែ៩០.០០០ហិកតា ក្នុងនោះប្រជាកសិករធ្វើស្រែប្រាំងបាន៣ដងក្នុងមួយឆ្នាំ។
លោកប្រធានមន្ទីរបានបន្តថា មន្ទីរធនធានទឹកខេត្តបានដាក់ចេញនៅចក្ខុវិស័យរបស់ធនធានទឹកគឺសន្តិសុខទឹកទុក៣០% សម្រាប់ទឹកស្អាតក្រុង និង៧០% សម្រាប់ជួយដល់ប្រជាកសិករធ្វើស្រែប្រាំង។ រីឯទំនប់បង្ហៀរទឹកក្បាលហុងនៅក្នុងស្ទឹងពោធិ៍សាត់ ក្រុងពោធិ៍សាត់ ដែលមានក្រុមហ៊ុនជប៉ុនគ្រោងធ្វើទំនប់បង្ហៀរទឹកក្បាលហុងថ្មីកម្ពស់៤.៥ម៉ែត្រ និងគម្លាតចំងាយពីក្បាលហុងចាស់ពី៣០ម៉ែត្រ ទៅ១០០ម៉ែត្រ។
ឯកឧត្តមសន្តិបណ្ឌិត ឡូយ សុផាត ក៏បានបង្ហាញនូវក្តីសង្ឃឹម និងជំនឿជឿជាក់យ៉ាងមុតមាំថា ប្រព័ន្ធធារាសាស្ត្រនៅក្នុងខេត្តពោធិ៍សាត់ និងអាចផ្តល់ទឹកស្រោចស្រពដល់ប្រជាកសិករបានគ្រប់គ្រាន់។
ឯកឧត្តមសន្តិបណ្ឌិតបន្តថា បើសិនជាទំនប់ក្បាលហុងធ្វើហើយនោះ ខេត្តពោធិ៍សាត់នឹងទទួលបាននូវភ្ញៀវទេសចរណ៍មកលេងកំសាន្តជាច្រើន។ ដើម្បីឱ្យស្របទៅតាមទិសដៅជាយុទ្ធសាស្រ្ត និងផែនការសកម្មភាពជាអាទិភាពដែលក្រសួងបានដាក់ចេញសម្រាប់នីតិកាលទី៧នៃរដ្ឋសភា ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងធ្វើឲ្យវិស័យធនធានទឹក ដើរតួនាទីកាន់តែសំខាន់ថែមទៀត ក្នុងដំណើរការទ្រទ្រង់ការអភិវឌ្ឍសេដ្ឋកិច្ចសង្គមប្រកបដោយចីរភាព ៕
