រដ្ឋមន្ត្រីក្រសួងរ៉ែ អញ្ជើញចុះសំណេះសំណាលសួរសុខទុក្ខ ដល់នាយទាហាន ពលទាហាន មជ្ឈមណ្ឌលហ្វឹកហ្វឺនកងទ័ពជើងគោក

ភ្នំពេញ៖ ឯកឧត្តម កែវ រតនៈ រដ្ឋមន្ត្រីក្រសួង រ៉ែ និង ថាមពល នាថ្ងៃទី២១ ខែមីនា ឆ្នាំ២០២៤ បានអញ្ជើញចុះសំណេះសំណាលសួរសុខទុក្ខ ដល់នាយ ពលទាហាន មជ្ឈមណ្ឌលហ្វឹកហ្វឺនកងទ័ពជើងគោក ដែល ប្រព្រឹត្តទៅ នៅមជ្ឈមណ្ឌលហ្វឹកហ្វឺនកងទ័ពជើងគោក ។

ឧត្តមសេនីយ៍ទោ មួង វុទ្ធា នាយសេនាធិការរង នាយក មជ្ឈមណ្ឌលហ្វឹកហ្វឺនកងទ័ពជើងគោក បានថ្លែងអំណរគុណយ៉ាងជ្រាវជ្រៅបំផុតដល់ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និង ថាមពល ដែលតែងតែយកចិត្តទុក ដាក់ឧបត្ថម្ភគ្រឿងឧបភោគ បរិភោគ ដល់បងប្អូនកងទ័ព ដែលជាសម្ព័ន្ធមេត្រីភាព ។ យើងខ្ញុំទាំងអស់គ្នាជានាយក នាយករង និង នាយ ពលទាហាន សូមប្រសិទ្ធិពរជ័យជូនដល់ ឯកឧត្តម រដ្ឋមន្ត្រីក្រសួង រ៉ែ និង ថាមពល ព្រមទាំងប្រតិភូអមដំណើរ និង ក្រុមការងារជួបប្រទះពុទ្ធពរទាំង ៤ ប្រការគឺ អាយុ វណ្ណៈ សុខៈ ពលៈ កុំបីឃ្លាងឃ្លាតឡើយ។

អញ្ជើញមានមតិសំណេះសំណាល ឯកឧត្តម កែវ រតនៈ
បានពាំនាំនូវការផ្ដាំផ្ញើរសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សម្តេចមហាបវរធិបតី ហ៊ុន ម៉ាណែត និង លោកជំទាវ ជូនដល់ នាយ ពលទាហាន នៅមជ្ឈមណ្ឌលហ្វឹកហ្វឺនកងទ័ពជើងគោកផងដែរ។

ឯកឧត្តម កែវ រតនៈ បាននាំយកនូវអំណោយគ្រឿងបរិភោគមួយចំនួនធំ ជូនយោធិនរួមមាន អង្ករចំនួន ២តោន មីចំនួន១០កេសធំ ត្រីខចំនួន១០កេសធំ ទឹកក្រូច៥០កេះ ទឹកសុទ្ធ៥០កេះ ប៊ីចេង៣កេះ ថវិកា ១នាក់១០ម៉ឺនរៀល និងថវិកា៦លានរៀលសម្រាប់អង្គភាព ៕