កាកបាទក្រហមកម្ពុជា បើកវគ្គបណ្តុះបណ្តាលស្តីពីការធ្វើចំណាកស្រុកប្រកបដោយសុវត្ថិភាពជូនអ្នកស្ម័គ្រចិត្តក្នុងស្រុកបរសេដ្ឋ
ភ្នំពេញ៖ កាកបាទក្រហមកម្ពុជាទីស្នាក់ការកណ្តាល រួមជាមួយសាខាកាកបាទក្រហមកម្ពុជាខេត្តកំពង់ស្ពឺ ដោយមានការគាំទ្រពី អាយ.សុី.អរ.សុី. បានរៀបចំវគ្គបណ្តុះបណ្តាលស្តីពីការធ្វើចំណាកស្រុកប្រកបដោយសុវត្ថិភាព ការជួញដូរមនុស្ស គោលការណ៍គ្រឹះទាំង៧ប្រការរបស់ចលនា និងការបណ្តុះបណ្តាលវិជ្ជាសង្គ្រោះបឋម ជូនអ្នកស្ម័គ្រចិត្តដែលទើបតែជ្រើសរើសថ្មីចំនួន ២៥នាក់ ដែលមកពី១៤ភូមិ នៅក្នុងឃុំកក់ ស្រុកបរសេដ្ឋ ខេត្តកំពង់ស្ពឺ ចាប់ពីថ្ងៃទី២០ ដល់២១ ខែមីនា ឆ្នាំ២០២៤។
វគ្គបណ្តុះបណ្តាលនេះធ្វើឡើងដើម្បីផ្សព្វផ្សាយការងារស្តារទំនាក់ទំនងគ្រួសារ លើកកម្ពស់ការយល់ដឹងអំពីការធ្វើចំណាកស្រុកដោយសុវត្ថិភាព ការទប់ស្កាត់ការជួញដូរមនុស្ស បញ្ជ្រាបអំពីវិជ្ជាសង្គ្រោះបឋមនិងគោលការគ្រឹះទាំង៧របស់ចលនា ជូនដល់អ្នកស្ម័គ្រចិត្តឱ្យមានការយល់ដឹងកាន់តែច្បាស់និងផ្សព្វផ្សាយបន្តទៅដល់ប្រជាពលរដ្ឋនៅក្នុងសហគមន៍របស់ខ្លួន។
គួបញ្ជាក់ថា ការចូលរួមរបស់អ្នកស្ម័គ្រចិត្តពិតជាមានសារៈសំខាន់មិនអាចខ្វះបាន ក្នុងការជួយពង្រឹងពង្រីកការអនុវត្តសកម្មភាពផ្សព្វផ្សាយសារអប់រំការធ្វើចំណាកស្រុកប្រកបដោយសុវត្ថិភាព ទប់ស្កាត់ការជួញដូរមនុស្ស ធានាបានថាប្រជាពលរដ្ឋចំណាកស្រុកដោយស្របច្បាប់ មិនត្រូវបានចាញ់បោក ឬជួញដូរកម្លាំងពលកម្ម ការជួញដូរផ្លូវភេទ។
បន្ថែមលើនេះវិជ្ជាសង្រ្គោះបឋមក៏មានសារៈសំខាន់ក្នុងការជួយសង្គ្រោះប្រជាពលរដ្ឋនៅតាមមូលដ្ឋានធ្វើយ៉ាងណាឱ្យប្រជាពលម្នាក់ចេះវិជ្ជាសង្គ្រោះបឋម ដើម្បីជួយសង្គ្រោះជនរងគ្រោះកាត់បន្ថយនូវការរងរបួសធ្ងន់ធ្ងរ ឬបាត់បង់អាយុជីវិតជាដើម៕
