ឯកឧត្តមរដ្ឋមន្ត្រី ថោ ជេដ្ឋា សម្រេចផ្ទេរតំណែង ប្រធានមន្ទីរធនធានទឹកខេត្តកំពង់ធំចេញ ដោយចាត់តាំងអនុប្រធានមន្ទីរ ទទួលបន្ទុកក្តាប់ការងាររួមវិញ

ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម សម្រេចរុះរើផ្ទេរភារកិច្ចប្រធានមន្ទីរធនធានទឹក និងឧតុនិយមខេត្តកំពង់ធំចេញ ដោយចាត់តាំងអនុប្រធានមន្ទីរទទួលបន្ទុកក្តាប់ការងាររួមវិញ។

តាមរយៈសេចក្តីប្រកាស ស្តីពីការតែងតាំងមន្ត្រីរាជការរបស់ក្រសួងធនធានទឹក កាលពីថ្ងៃទី១៨ ខែមីនា ឆ្នាំ២០២៤ ឯកឧត្តមរដ្ឋមន្ត្រី បានសម្រេចប្តូភារកិច្ច លោក យូ ឡា ឋានន្តរស័ក្តិឧត្តមមន្ត្រីថ្នាក់លេខ១ ពីប្រធានមន្ទីរធនធានទឹកខេត្តកំពង់ធំ ឱ្យមកបម្រើការងារនៅទីស្តីការក្រសួងធនធានទឹកវិញ។ ទន្ទឹមនឹងនោះ ឯកឧត្តមរដ្ឋមន្ត្រីរូបនេះ ក៏បានចាត់តាំង លោក នួន បូរ៉ាវ័ន្ត ឋានន្តរស័ក្តិក្រមការដើមខ្សែថ្នាក់លេខ៤ ជាអនុប្រធានមន្ទីរធនធានទឹកខេត្តកំពង់ធំ ទទួលបន្ទុកក្តាប់រួម។

ជាមួយគ្នានោះលិខិតដដែលបន្ថែមថា បទប្បញ្ញត្តិទាំងហ្លាយណា ដែលមានខ្លឹមសារផ្ទុយនឹងប្រកាសនេះ ត្រូវចាត់ទុកជានិរាករណ៍។ ដូច្នេះអគ្គនាយក អគ្គាធិការ ប្រធានគ្រប់អង្គភាពចំណុះក្រសួង និងសាមីជន ត្រូវទទួលបន្ទុកអនុវត្តប្រកាសនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ។
សូមរំរឭកថា នេះមិនមែនជាការផ្ទេរតំណែកមន្ត្រីរាជការក្នុងមូលដ្ឋានខេត្តកំពង់ធំលើកទី១នោះទេ ខណៈគេចាំបានថា កន្លងមក សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ក៏ធ្លាប់រុះរើមន្ត្រីគណបក្សប្រជាជន ចុះមូលដ្ឋានខេត្តនេះពីរលើករួចមកហើយ គិតចាប់ពីពេលដែល សម្តេចមហាបវរធិបតី ហ៊ុន ម៉ាណែត ឡើងកាន់តំណែងជានាយករដ្ឋមន្រ្តីថ្មីនៃកម្ពុជា ៕