ឧត្តមសេនីយ៍ទោ ប៊ន សំអាត ចេញសារសូមទោសជាសាធារណៈ ចំពោះកំហុសដោយអចេតនា ពុំបានដោះស្បែកជើង ពេលជួបជុំជាមួយលោកយាយ លោកតានៅក្នុងសាលាឆទាន

ភ្នំពេញ៖ លោកឧត្តមសេនីយ៍ទោ ប៊ន សំអាត ឋានៈអនុប្រធាននាយកដ្ឋានព្រហ្មទណ្ឌនៃអគ្គស្នងការដ្ឋាន នគរបាលជាតិ ក្រសួងមហាផ្ទៃ បានចេញសារសូមទោសជាសាធារណៈ ចំពោះព្រះសង្ឃគ្រប់ព្រះអង្គ, សម្តេចអគ្គមហាសេនាបតីតេជោ ហ៊ុន សែន ប្រធានឧត្តមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងថ្នាក់ដឹកនាំគ្រប់លំដាប់ថ្នាក់ ពុទ្ធបរិស័ទ្ធ និងសាធារណជនទាំងអស់។

លោកឧត្តមសេនីយ៍ទោ ប៊ន សំអាត សូមប្រគេនព្រះសង្ឃគ្រប់ព្រះអង្គនិងគោរពជម្រាបជូនសម្តេច ឯកឧត្តម លោកជំទាវ ព្រមទាំង សាធារណជនទាំងអស់មេត្តាជ្រាបថា នៅថ្ងៃទី០២ ខែកុម្ភៈ ឆ្នាំ២០១៩ ខ្ញុំបាទបានបរិច្ចាគដីផ្ទាល់ខ្លួនមានតម្លៃជាង ១០ម៉ឺនដុល្លារ មួយកន្លែងនៅភូមិ ប្រស់ ឃុំរអាន ស្រុកកំពង់សៀម ខេត្តកំពង់ចាម ទំហំ ៥០ម x ២០ម ដើម្បីធ្វើ សាលាឆទានសំរាប់ជូនយាយតានិងបងប្អូនប្រជាពលរដ្ឋក្នុងភូមិ ដែលជាស្រុកកំណើតរបស់ខ្ញុំបាទសំរាប់ជួយក្នុង វិស័យពុទ្ធចក្រអាណាចក្រដែលជាថវិការរបស់ខ្ញុំបាទផ្ទាល់ជាអ្នកកសាងសរុបចំនួន ៨ម៉ឺនដុល្លារអាមេរិក។

សូមបញ្ជាក់ជូនថា កាលពីថ្ងៃទី២២ ខែកុម្ភៈ ឆ្នាំ២០២៣ លោកឧត្តមសេនីយ៍ទោ ប៊ន សំអាត បានអញ្ជើញលោកយាយ លោកតា ក្នុងភូមិចំនួន ជិត១០០នាក់ មក ពិសារនំបញ្ចុកនៅក្នុងសាលាឆទានហើយនិងចែកថវិការចំនួន ២មុឺនរៀល និងសារ៉ុងមួយសំរាប់លោកយាយម្នាក់ៗ ចំនួន ២មុឺនរៀល និងអាវអាចារ្យមួយកំប្លេសំរាប់លោកតាម្នាក់ៗ។

លោកឧត្តមសេនីយ៍ទោ ប៊ន សំអាត មានការសោកស្តាយយ៉ាងខ្លាំង និងទទួលស្គាល់កំហុសឆ្គងដែលកើតឡើងដោយអចេតនា ដោយខ្ញុំ បាទពុំបានដោះស្បែកជើង ពេលជួបជុំសំណេះសំណាលជាមួយលោកយាយ លោកតានៅក្នុងសាលាឆទាន។

លោកឧត្តមសេនីយ៍ទោ ប៊ន សំអាត ក៏សូមគោរព សុំខមាទោស ដោយស្មោះចំពោះព្រះសង្ឃគ្រប់ព្រះអង្គ សម្តេចតេជោ ហ៊ុន សែន និងសម្តេចបវរធិបតី ហ៊ុន ម៉ាណែត ថ្នាក់ដឹកនាំគ្រប់ជាន់ថ្នាក់ និងសាធារណជនទាំងអស់ ខ្ញុំបាទសន្យាថានឹងមិនឲ្យ កើតមានកំហុសឆ្គងបែបនេះបន្តទៀតឡើយ ក្នុងនោះដែរខ្ញុំបាទ និងខិតខំប្រត្តិបត្តិ ទៅតាមធម៌និងវិន័យ គន្លងព្រះ ពុទ្ធសាសនាឲ្យបានល្អ។

សូមសម្តេចថ្នាក់ដឹកនាំគ្រប់ជាន់ថ្នាក់ ព្រមទាំងសាធារណជនទាំងអស់ទទួលនូវការគោរពដ៏ខ្ពង់ខ្ពស់អំពីខ្ញុំបាទ ឧត្តមសេនីយ៍ទោ ប៊ន សំអាត ៕