បរទេស៖ នាយករដ្ឋមន្ត្រីអ៊ុយក្រែន លោក Denys Shmyhal បានឲ្យដឹងកាលពីថ្ងៃសុក្រ ទី០៨ ខែមីនា ឆ្នាំ២០២៤ ថាអ៊ុយក្រែននឹងទទួលបាន ៦ពាន់លានអឺរ៉ូពីសហភាពអឺរ៉ុបតាមរយៈឧបករណ៍អ៊ុយក្រែនរយៈពេល ៤ឆ្នាំរបស់ខ្លួនក្នុងរយៈពេល ២ខែខាងមុខ។
លោក Denys Shmyhal បានប្រាប់កិច្ចប្រជុំរដ្ឋាភិបាលថា រដ្ឋាភិបាលរំពឹងថានឹងទទួលបាន ៤.៥ពាន់លានអឺរ៉ូក្នុងខែមីនា និង១.៥ពាន់លានអឺរ៉ូផ្សេងទៀតនៅក្នុងខែមេសា។
លោក Shmyhal បានបន្តថា នៅឆ្នាំនេះ យើងមានបំណងទទួលបានប្រហែល ១៦ពាន់លានអឺរ៉ូពីសហភាពអឺរ៉ុប។ អ៊ុយក្រែននឹងមានធនធានដើម្បីប្រយុទ្ធ និងឈ្នះ។ វាគឺជាគោលបំណងសំខាន់របស់យើង ហើយយើងនឹងធ្វើអ្វីគ្រប់យ៉ាងដែលអាចធ្វើទៅបានសម្រាប់វា។
ជាមួយនឹងសង្គ្រាមប្រឆាំងនឹងរុស្ស៊ីឥឡូវនេះនៅក្នុងឆ្នាំទី៣ របស់ខ្លួន អ៊ុយក្រែនគឺពឹងផ្អែកយ៉ាងខ្លាំងលើការគាំទ្រផ្នែកសេដ្ឋកិច្ច និងយោធាពីសម្ព័ន្ធមិត្តលោកខាងលិចរបស់ខ្លួន។
ជំនួយសេដ្ឋកិច្ចរាប់ពាន់លានក្នុងរយៈពេលពីរឆ្នាំដំបូងនៃសង្រ្គាមបានជួយរដ្ឋាភិបាលក្នុងការរក្សាស្ថិរភាពម៉ាក្រូសេដ្ឋកិច្ច ទប់ទល់នឹងអតិផរណា និងធានាបាននូវការទូទាត់ប្រាក់សោធននិវត្តន៍ទាន់ពេលវេលា និងប្រាក់ឈ្នួលក្នុងវិស័យសាធារណៈ។
អ៊ុយក្រែនបញ្ជូនចំណូលថវិកាក្នុងស្រុកភាគច្រើនរបស់ខ្លួន ដើម្បីផ្តល់មូលនិធិដល់កិច្ចខិតខំប្រឹងប្រែងការពារជាតិរបស់ខ្លួន។
ប្រភព៖ CNA
ប្រែសម្រួលដោយ៖ ឡាយ លីហួ
