ឯកឧត្តម សែម សុវណ្ណនី និងលោកជំទាវ អញ្ជើញអបអរសាទរខួបលើកទី១១៣ ទិវាអន្តរជាតិនារី ៨មីនា ក្រោមមូលបទ «ស្ត្រីនិងក្មេងស្រីក្នុងបរិវតកម្មឌីជីថល»
ភ្នំពេញ៖ ឯកឧត្តម សែម សុវណ្ណនី អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី និងក្រុងរុនតាឯក ខេត្តសៀមរាប និងលោកជំទាវ នៅព្រឹកថ្ងៃទី៨ ខែមីនា ឆ្នាំ២០២៤ អញ្ជើញជាអធិបតី ក្នុងពិធីអបអរសាទរខួបលើកទី១១៣ ទិវាអន្តរជាតិនារី ៨មីនា ២០២៤ ក្រោមមូលបទ «ស្ត្រីនិងក្មេងស្រីក្នុងបរិវតកម្មឌីជីថល»។
មានការអមដំណើរដោយឯកឧត្តម និងលោកជំទាវ ជាអនុប្រធានក្រុមការងារចុះមូលដ្ឋានស្រុកបន្ទាយស្រីផងដែរ។ ក្នុងពិធីនេះ ដែលមានការចូលរួមពីស្រ្តី មកពីឃុំទាំង៥នៃស្រុកបន្ទាយស្រី និងសង្កាត់ចំនួន២នៃក្រុងរុនតាឯក ប្រមាណ៣០០នាក់។
ក្នុងពិធីសំណេះសំណាលនេះ ឯកឧត្តម បាននាំមកនូវការផ្តាំផ្ញើសួរសុខទុក្ខ ពីសំណាក់សម្តេចពិជ័យសេនា ទៀ បាញ់ ប្រធានក្រុមការងារចុះមូលដ្ឋានខេត្តសៀមរាប ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ និងឯកឧត្តម ប្រាក់ សោភណ្ឌ អភិបាលខេត្តសៀមរាប។
ឯកឧត្តម សែម សុវណ្ណនី បានថ្លែងថា ឯកឧត្តម នាយឧត្តមសេនីយ៍ សែម សុវណ្ណនី បានថ្លែងថា “ការរីកចម្រើនយ៉ាងឆាប់រហ័សរបស់បច្ចេកវិទ្យាឌីជីថលនាពេលបច្ចុប្បន្ន បានធ្វើឲ្យជីវិតប្រចាំថ្ងៃរបស់ប្រជាជនទូទាំងសកលលោកមានការផ្លាស់ប្តូរយ៉ាងគំហុក ដែលប្រទេសជាច្រើនបានប្រើប្រាស់បច្ចេកវិទ្យានេះយ៉ាងទូលំទូលាយ ដើម្បីទាញយកផលប្រយោជន៍ផ្នែកនយោបាយ សេដ្ឋកិច្ច និងសង្គម។ ស្របតាមនិន្នាការពិភពលោក រាជរដ្ឋាភិបាលកម្ពុជា បាននឹងកំពុងពន្លឿនការប្រើប្រាស់ បច្ចេកវិទ្យាឌីជីថល ដើម្បីជំរុញការអភិវឌ្ឍ និងការពង្រឹងសមត្ថភាពរបស់កម្ពុជា។ ការចូលរួមរបស់ស្ត្រី និងក្មេងស្រី ក្នុងបរិវត្តកម្មឌីជីថល ពិតជាមានសារៈសំខាន់ណាស់ ដើម្បីរួមចំណែកថែរក្សាសន្តិភាព និង ឆ្ពោះទៅសម្រេចចក្ខុវិស័យកម្ពុជា ជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ក្នុងពិធីសំណេះសំណាលនេះ ឯកឧត្តម ក៏បានដាក់ជាសំណួរ សម្រាប់បងប្អូនជាស្រ្តីដែលចូលរួមឡើងឆ្លើយដើម្បីបានថវិកា១០ម៉ឺនរៀល ក្នុង១ចំលើយផងដែរ។ ជាមួយគ្នាឯកឧត្តម និងលោកជំទាវ បាននាំថវិការបស់សម្តេចបវរធិបតី ចែកជូនស្ត្រីៗបានចូលរួមក្នុងម្នាក់ៗថវិកាចំនួន៥ម៉ឺនរៀល៕
