នាយសេនាធិការរងយោធភូមិភាគទី៥ បេជ្ញាគាំទ្រយ៉ាងពេញទំហឹង នូវបទបញ្ជារបស់រាជរដ្ឋាភិបាល ដែលមានសម្តេចធិបតី ហ៊ុន ម៉ាណែត ជាប្រមុខដឹកនាំ

ភ្នំពេញ៖ ឧត្តមសេនីយ៍ត្រី ហូ ភូរិន្រ្ទ នាយសេនាធិការរង យោធភូមិភាគទី៥ នាថ្ងៃទី៧ ខែមីនា ឆ្នាំ២០២៤ បានអញ្ជើញដឹកនាំកិច្ចប្រជុំ បូកសរុបលទ្ធផលការងារយោធាសន្តិសុខឆ្នាំ២០២៣ និងផ្សព្វផ្សាយផែនការសកម្មភាពការងារសន្តិសុខឆ្នាំ២០២៤ របស់វរសេនាតូចស៊ើបការណ៍ យោធភូមិភាគទី៥ នៅទីបញ្ជាការវរសេនាតូចស៉ើបការណ៍ ស្ថិតនៅឃុំធិបតី ស្រុកគាស់ក្រឡ ខេត្តបាត់ដំបង។

ពិធីមានការអញ្ជើញចូលរួមពី នាយ នាយរងការិយាល័យ យោធភូមិភាគទី៥ មេបញ្ជាការ មេបញ្ជាការរង នាយទាហាន នាយទាហានរង ពលទាហាន វរសេនាតូចស៊ើបការណ៍។

ក្នុងឱកាសនោះឧត្តមសេនីយ៍ត្រី ហូ ភូរិន្រ្ទ មានប្រសាសន៍បូកសរុបវាយតម្លៃ និងកោតសរសើរដល់ការខិតខំប្រឹងប្រែងរបស់អង្គភាព ដែលសម្រេចបានការងារល្អប្រសើរ ក្នុងរយៈពេលមួយឆ្នាំកន្លងមកនេះ។

ឧត្តមសេនីយ៍ត្រី ហូ ភូរិន្រ្ទ បានបន្តថាត្រូវបន្តអនុវត្តឱ្យបាននូវអភិក្រម ៥យ៉ាង របស់សម្ដេចគឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ហើយត្រូវបង្កើននូវការសហការរវាងកម្លាំងប្រដាប់អាវុធគ្រប់ប្រភេទធានាឲ្យបាននូវភូមិឃុំមានសុវត្ថិភាពជូនប្រជាពលរដ្ឋ ត្រូវបន្តពង្រឹង ពង្រីកនូវការហ្វឹកហ្វឺនរៀនសូត្រ ការកសាងពង្រឹងអង្គភាពរឹងមាំលើគ្រប់វិស័យដើម្បីធានាបាននូវការរស់នៅរបស់កងទ័ពឲ្យមានភាពល្អប្រសើរថែមទៀត និងបេជ្ញាគាំទ្រយ៉ាងពេញទំហឹងនូវ បទបញ្ជារបស់រាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ស្ដីពី «ការដាក់ចេញវិធានការម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ» ។

ជាចុងបញ្ចប់ ឧត្តមសេនីយ៍ត្រី ក៏បានជូនប័ណ្ណសរសើរ លិខិតសរសើរ ដល់នាយទាហាន ពលទាហាន ដែលមានស្នាដៃក្នុងរយៈពេលមួយឆ្នាំកន្លងមក និងឧបត្ថម្ភថវិការរបស់ ឯកឧត្តម មេបញ្ជាការររងកងទ័ពជើងគោក មេបញ្ជាការយោធភូមិភាគទី៥ ក្នុងកម្មវិធី ចំនួន ១.០០០.០០០ រៀលផងដែរ៕