ស្រ្តីបានរួមចំណែកយ៉ាងសកម្ម ក្នុងកិច្ចការអនុវត្តន៍កម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលបានយ៉ាងល្អ
ភ្នំពេញ៖ ឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ នាថ្ងៃទី៧ ខែមីនា ឆ្នាំ២០២៤បាអញ្ជើញជួបសំណេះសំណាលជាមួយយោធិននារី ក្នុងឱកាស ទិវានារីអន្តរជាតិ ៨ មីនា ឆ្នាំ២០២៤ ខួបលើកទី១១៣ ក្រោមមូលបទ«ស្រ្តី និងក្មេងស្រី ក្នុងបរិវត្តកម្មឌីជីថល» នៅទីបញ្ជាការកងពលតូចអន្តរាគមន៍លេខ១២៨ យោធភូមិភាគទី១ ។
មេបញ្ជាការកងពល បានមានមតិផ្តាំផ្ញើថា ទិវានារីអន្តរជាតិ ៨ មីនា គឺដើម្បីរំលឹកពីការតស៊ូទាមទារសិទ្ធិ សេរីភាព និងឆ្លុះបញ្ចាំងអំពីវឌ្ឍនៈភាព សមិទ្ធផល បញ្ហាប្រឈម ការប្តេជ្ញាចិត្ត និងវិធានការសំខាន់ៗ ក្នុងគោលបំណងបង្កើនភាពអង់អាចរបស់ស្ត្រី និងដើម្បីឈានទៅសម្រេចបាននូវសមភាពយេនឌ័រ។ ជាពិសេស ដើម្បីបញ្ជាក់យ៉ាងច្បាស់ អំពីសារៈសំខាន់របស់ស្ត្រី ក្នុងការរក្សាសុខសន្តិភាព និងការអភិវឌ្ឍន៍សេដ្ឋកិច្ច និងសង្គមជាតិនាពេលកន្លងមក។ ក្នុងនោះដែរស្រ្តីក៏បានចូលរួមចំណែកយ៉ាងសកម្មផងដែរ ក្នុងកិច្ចការ អនុវត្តន៍កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ បានយ៉ាងល្អ ។
ជាចុងបញ្ចប់ លោកមេបញ្ជាការកងពល ក៏បានបានថ្លែងអំណរគុណ និងកោតសរសើរដល់យោធិននារីទាំងអស់ ដែលបានខិតខំប្រឹងប្រែងអស់ពីកំលាំងកាយចិត្ត ប្រាជ្ញា ស្មារតីប្រកបដោយភាពអំណត់ព្យាយាមពុះពារការលំបាក ដើម្បីចូលរួមចំណែកក្នុងបុព្វហេតុការពារឯករាជ្យជាតិ អធិតេយ្យភាពបូរណភាពដែនដី និងអភិវឌ្ឍន៍ជាតិមាតុភូមិបានយ៉ាងល្អប្រសើរនាពេលកន្លងមក ។
ឆ្លៀតក្នុងឱកាសនោះដែរ លោកឧត្តមសេនីយ៍ទោ មៀច សាមុត មេបញ្ជាការកងពលតូចអន្តរាគមន៍លេខ១២៨ និងភរិយា ក៏បានឧបត្តម្ភ លើកទឹកចិត្ត ដល់យោធិននារី រួមមាន ៖ ថវិកា អង្ករ មី និងត្រីខ មួយចំនួនផងដែរ ៕
