បាក់ស្រុតច្រាំងស្ទឹងសង្កែក្នុងក្រុងបាត់ដំបងមិនបង្កផលប៉ះពាល់ធ្ងន់ធ្ងរនោះទេ ខណៈក្រុមហ៊ុននឹងបន្តសិក្សាលក្ខណៈបច្ចេកទេសជួសជុលឡើងវិញ

ភ្នំពេញ៖ ប្រធានការិយាល័យសាធារណៈការ និងដឹកជញ្ជូន អនាម័យបរិស្ថាន និងសណ្តាប់ធ្នាប់សាធារណៈក្រុងបាត់ដំបង និងជាចាស់ព្រឹទ្ធាចារ្យមួយរូបនៅក្រុងបាត់ដំបង លោក លោក សុង ស៊ើង បានបញ្ជាក់ថា ករណីបាក់ស្រុតច្រាំងស្ទឹងសង្កែក្នុងភូមិសាស្រ្តក្រុងបាត់ដំបងមិនបង្កផលប៉ះពាល់អ្វីធ្ងន់ធ្ងរនោះទេ ខណៈច្រាំងស្ទឹងដែលប្រាក់ស្រុតនេះស្ថិតក្នុងអំឡុងពេលសុពលភាពជួសជុលថែទាំរបស់ក្រុមហ៊ុន ដូចនេះក្រុមហ៊ុននឹងបន្តសិក្សាលក្ខណៈបច្ចេកទេសជួសជុលឡើងវិញ។

សូមបញ្ជាក់ថា រដ្ឋបាលខេត្តបាត់ដំបងបានសាងសង់ច្រាំងស្ទឹងសង្កែនេះឡើងក្នុងគោលបំណងដើម្បីការពារការបាក់ស្រុតផ្លូវ និងសម្រួលដល់ការធ្វើដំណើររបស់បងប្អូនប្រជាពលរដ្ឋ។

នៅក្នុងកិច្ចសម្ភាសន៍ជាមួយអ្នកសារព័ត៌មាន លោក សុង ស៊ើង បានពន្យល់ថា ករណីបាក់ស្រុតនៅទីតាំងមួយចំនួនតាមបណ្ដោយដងស្ទឹងសង្កែតែងតែកើតឡើងជាបន្តបន្ទាប់នៅពេលទឹកស្ទឹងសង្កែស្រកចុះ ដោយសារតំបន់ទាំងនោះភាគច្រើនជាដៃព្រែកពីអតីតកាល ខណៈការបាក់ស្រុតនេះអាចជួសជុលឡើងវិញបានមិនបង្កផលប៉ះពាល់នោះទេ។

លោក សុង ស៊ើង បានបន្តថា ទីក្រុងបាត់ដំបងជាទីក្រុងអភិរក្ស ដោយអភិបាលខេត្តពីមួយជំនាន់ទៅមួយជំនាន់ គឺមានការអភិវឌ្ឃន៍បន្តិចម្ដងៗ ហើយនៅក្នុងដំណាក់កាលដែលឯកឧត្ដម សុខ លូ ជាអភិបាលខេត្តបានរៀបចំដើម្បីទាក់ទាញទេសចរនៅក្នុងខេត្ត មានដូចជាការរៀបចំច្រាំង សោភណ្ឌភាពនៅក្នុងក្រុង និងបន្តិចទៀត និងមានការរៀបចំដាំដើមឈើ រៀបចំចំណីផ្លូវ ផ្លូវដើរ ផ្ឡូវថ្មើរជើងជាដើម។

បើយោងតាមរយៈសេចក្ដីបំភ្លឺរបស់រដ្ឋបាលខេត្តបាត់ដំបងបានឱ្យដឹងថា កាលពីថ្ងៃទី១៥ ខែកុម្ភៈ ឆ្នាំ២០២៤ រដ្ឋបាលខេត្ត បានទម្លាក់កម្ពស់ទឹកស្ទឹងសង្កែ ដើម្បីសាងសង់ស្ថានីយបូមទឹកឆៅសម្រាប់ផ្គត់ផ្គង់រោងចក្រផលិតកម្មទឹកស្អាត ដែលជាជំនួយហិរញ្ញប្បទានរបស់ធនាគារអភិវឌ្ឍន៍អាស៊ី(ADB), ទីភ្នាក់ងារបារាំងសម្រាប់ការអភិវឌ្ឍ(AFD) និងថវិកាបដិភាគរបស់រាជរដ្ឋាភិបាលកម្ពុជា មានសមត្ថភាពផលិតទឹកស្អាតបាន ៥០.០០០ម៉ែត្រគូប ក្នុងមួយថ្ងៃ ដែលមានទីតាំងស្ថិតនៅភូមិកំពង់សីមា សង្កាត់វត្តគរ ក្រុងបាត់ដំបង ខេត្ត បាត់ដំបង។ ប៉ុន្តែគួរឱ្យសោកស្ដាយដោយសារបន្ទាប់ពីការទម្លាក់កម្ពស់ទឹករួច ពិនិត្យឃើញថាច្រាំងស្ទឹងដែលទើបនឹងកសាងរួច មានកន្លែងខ្លះត្រូវបាក់ស្រុត ដែលកន្លងមកក្រុមហ៊ុនបានខិតខំធ្វើការកសាង យ៉ាងយកចិត្តទុកដាក់ចំពោះទីតាំងច្រាំងស្ទឹងដែលធ្លាប់តែបាក់ស្រុតនេះ ដោយកាយយកដីស្អុយចេញ និងចាក់បំពេញដីឥដ្ឋ និងក្រាលដុំថ្មដោយកិនបង្ហាប់តាមស្រទាប់នីមួយៗ។

រដ្ឋបាលខេត្តបាត់ដំបង បញ្ជាក់បន្ថែមថា ច្រាំងស្ទឹងដែលបាក់ស្រុតនេះស្ថិតក្នុងអំឡុងពេលសុពលភាពជួសជុលថែទាំរបស់ក្រុមហ៊ុននៅឡើយ ដូចនេះក្រុមហ៊ុន នឹងបន្តសិក្សា លក្ខណៈបច្ចេកទេសបន្ថែមទៀត ដើម្បីរៀបចំជួសជុលច្រាំងស្ទឹងឡើងវិញ ហើយរដ្ឋបាលខេត្ត នឹងពិនិត្យ តាមដានយ៉ាងយកចិត្តទុកដាក់ចំពោះលក្ខណៈបច្ចេកទេស ដែលក្រុមហ៊ុននឹងបន្តធ្វើការជួសជុលឡើងវិញនៅពេលខាងមុខនេះ៕