វិមានក្រឹមឡាំង៖ ជម្លោះរវាងរុស្ស៊ី និងអូតង់ ជៀសមិនរួចទេ ប្រសិនបើលោកខាងលិចបញ្ជូនទ័ពទៅអ៊ុយក្រែន

អ៊ីស្តង់ប៊ុល៖ វិមានក្រឹមឡាំងកាលពីថ្ងៃអង្គារបានឲ្យដឹងថា ជម្លោះរវាងរុស្ស៊ី និងណាតូគឺ ជៀសមិនរួចទេ ប្រសិនបើលោកខាងលិចដាក់ពង្រាយកងទ័ពទៅកាន់អ៊ុយក្រែន។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានក្នុងសន្និសីទសារព័ត៌មាននៅទីក្រុងមូស្គូថា ក្នុងករណីនេះ យើងត្រូវនិយាយមិនមែនអំពីប្រូបាប៊ីលីតេទេ ប៉ុន្តែអំពីភាពជៀសមិនរួច ហើយនោះជារបៀបដែលយើងវាយតម្លៃ រវាងរុស្ស៊ី និងណាតូ ប្រសិនបើកងទ័ពលោកខាងលិចត្រូវបានបញ្ជូនទៅកាន់អ៊ុយក្រែន។

លោក Peskov បានបន្តថា បណ្តាប្រទេសណាតូក៏ត្រូវតែវាយតម្លៃពីផលវិបាកដែលអាចកើតមាននៃសកម្មភាពបែបនេះ ហើយត្រូវដឹងថា នេះមិនមែនជាផលប្រយោជន៍របស់ប្រទេសទាំងនេះជាដាច់ខាត។

លោក Peskov បានបន្ថែមទៀតថា ប្រទេសមួយចំនួននៅលោកខាងលិចមានការវាយតម្លៃប្រកបដោយសុទិដ្ឋិនិយមអំពីផលវិបាក និងគ្រោះថ្នាក់ដែលអាចកើតមាននៃការដាក់ពង្រាយកងទ័ពទៅកាន់អ៊ុយក្រែន ហើយថាមិនមានការឯកភាពគ្នាលើបញ្ហានេះទេ។

លោកក៏បានឲ្យដឹងផងដែរថា ទីក្រុងមូស្គូដឹងពីធាតុផ្សេងទៀតនៃសុន្ទរកថារបស់ប្រធានាធិបតីបារាំង លោក Emmanuel Macron រួមទាំងបញ្ហាទាក់ទងនឹងតម្រូវការក្នុងការធ្វើឱ្យមានការបរាជ័យជាយុទ្ធសាស្ត្រ លើប្រទេសរុស្ស៊ី ដោយបន្ថែមថាគំនិតនៃការបញ្ជូនកងទ័ពលោកខាងលិចទៅកាន់អ៊ុយក្រែនគឺជាធាតុថ្មី។

កាលពីថ្ងៃចន្ទ លោក Macron បានឲ្យដឹងក្នុងអំឡុងពេលកិច្ចប្រជុំមួយស្តីពីអ៊ុយក្រែននៅរដ្ឋធានីប៉ារីសរបស់បារាំងថា ការបញ្ជូនទាហានទៅអ៊ុយក្រែន គឺជាជម្រើសដែលមិនគួរត្រូវបានបដិសេធ។

ប្រភព៖ AA

ប្រែសម្រួលដោយ៖ ឡាយ លីហួ