កម្ពុជាជាប្រទេសនាំចេញអង្ករច្រើនជាងគេ លំដាប់ថ្នាក់ទី១០ ក្នុងពិភពលោក ជាមួយនិងទំហំនាំចេញជិត៦លានតោន
ភ្នំពេញ៖ យោងតាមទិន្នន័យរបស់គេហទំព័រ Southeast Asia Statistic ដែលជាអ្នកកត់ត្រានិងតាមដានពីទិន្នន័យនានាក្នុងតំបន់អាស៊ាន និងក្រៅតំបន់បានបញ្ជាក់ថា កម្ពុជាជាប្រទេសនាំចេញអង្ករច្រើនជាងគេលំដាប់ថ្នាក់ទី១០ ក្នុងពិភពលោក កាលពីឆ្នាំ២០២៣ ជាមួយនឹងទំហំនាំចេញជិត៦លានតោន។
បើតាមស្ថាប័នដដែល នៅឆ្នាំ២០២៣ ការផលិតអង្ករនៅអាស៊ីអាគ្នេយ៍ ត្រូវបាននាំមុខដោយប្រទេសចំនួន៦រួមមាន៖ឥណ្ឌូណេស៊ី វៀតណាម ថៃ ហ្វីលីពីន មីយ៉ាន់ម៉ា និងកម្ពុជា។ ឥណ្ឌូណេស៊ី ជាប្រទេសនាំមុខគេក្នុងតំបន់អាស៊ាន ឈរនៅលេខរៀងទី១ និងឈរនៅលំដាប់លេខរៀងទី៤ លើពិភពលោក ជាមួយនឹងការផលិតអង្ករ៣៤លានតោន ខណៈវៀតណាម ជាប់ចំណាត់ថ្នាក់លេខ៥ក្នុងពិភពលោក និងលេខ២ក្នុងតំបន់ ជាមួយនឹងទំហំផលិតបាន ២៦,៩៤លានតោន។ ប្រទេសថៃឈរនៅលេខ៣ក្នុងតំបន់ និងលេខ៦ក្នុងពិភពលោក បាននាំចេញអង្ករសរុប ២០,៩១លានតោន។ ហ្វីលីពីន ឈរនៅលេខ៤ក្នុងតំបន់ និងលេខ៧ពិភពលោក បាននាំចេញអង្ករ១២,៦៣លានតោន។ ប្រទេសមីយ៉ាន់ម៉ា ទោះបីស្ថិតក្នុងវិបត្តិនយោបាយ និងសេដ្ឋកិច្ចដើរអូសជើងក៏ពិតមែន ប៉ុន្តែបាននាំចេញអង្ករ១១,៨លានតោន ឈរនៅលេខ៥ក្នុងតំបន់ និងលេខ៨ពិភពលោក។
កម្ពុជានៅពេញមួយឆ្នាំ២០២៣ បាននាំចេញអង្ករ៥,៩៣លានតោន ធ្វើឱ្យឡើងមកឈរលេខរៀងទី៦ក្នុងតំបន់ជាប្រទេសនាំចេញអង្ករច្រើនជាងគេ និងលេខ១០ក្នុងពិភពលោក។ សហព័ន្ធស្រូវអង្ករកម្ពុជា បានចាត់ទុកជោគជ័យនេះថា គុណបំណាច់របស់រាជរដ្ឋាភិបាលកម្ពុជា ដែលបានខិតខំឱ្យកម្ពុជា ប្រែពីប្រទេសខ្វះស្បៀងនៅទសវត្សរ៍ឆ្នាំ៧០ ដល់ទសវត្សរ៍៩០ ហើយក្លាយជាប្រទេសផលិត និងមានអតិរេកនាំចេញ។
សហព័ន្ធស្រូវអង្ករសរសេរនៅលើហ្វេសប៊ុករបស់ខ្លួនថា៖«កម្ពុជាយើងតូច តែក៍ជាប្រទេសធំផលិតស្រូវ និងកែច្នៃអង្ករបានជិត៦លានតោនក្នុងមួយឆ្នាំដែរ លើពិភពលោក យើងឈរលេខរៀងទី១០»។ សហព័ន្ធបន្ថែមថា៖«សូមថ្លែងអំណរគុណ សម្តេចតេជោ ហ៊ុន សែន ជាមគ្គុទេសឯក នៃសន្តិភាពនៅកម្ពុជា ជាស្ថានិកនៃការលុបបំបាត់ភាពអត់ឃ្លាន ពឹងជំនួយស្បៀងពីខាងក្រៅ មកប្រទេសម្ចាស់ការ និងចូលរួមផ្គត់ផ្គត់ស្បៀងលើពិភពលោក»។
បើនិយាយពីប្រទេសក្រៅតំបន់អាស៊ានវិញ ប្រទេសចិននៅតែជាប្រទេសនាំចេញអង្ករច្រើនជាងគេក្នុងលោក ជាមួយនឹងចំនួនប្រមាណ១៤៥,៩៥លានតោន តាមពីក្រោយដោយឥណ្ឌានាំចេញបាន១៣៥,៧៦លានតោន ខណៈបង់ក្លាដេសឈរនៅលេខ៣ នាំចេញអង្ករបាន៣៦,៣៣លានតោន។ ជប៉ុនក៏ជាប្រទេសនាំចេញអង្ករធំមួយដែរ ដោយកាលពីឆ្នាំមុន ជប៉ុននាំចេញអង្ករបានជាង៧,៤៨លានតោន ឈរចំណាត់ថ្នាក់លេខ៩ក្នុងពិភពលោកពីលើកម្ពុជា។
សូមជម្រាបថា គោលដៅនាំចេញអង្កររបស់កម្ពុជាមានជាង៥២ប្រទេស និងតំបន់ ជាក់ស្តែងទីផ្សារធំៗមានដូចជា៖អាម៉េរិក ចិន ប្រទេសតំបន់អឺរ៉ុប អាស៊ី និងក្នុងតំបន់អាស៊ីអាគ្នេយ៍ជាដើម។ កម្ពុជា ក៏បាននាំអង្ករចេញទៅប្រទេសក្បែរខាងក្នុងតំបន់ផងដែរ។ ជាក់ស្តែង អង្ករ[ស]របស់កម្ពុជា ក្នុងបរិមាណចំនួន៣៥០០តោន បាននាំចេញជើងទី១ ទៅឥណ្ឌូណេស៊ី កាលពីខែវិច្ឆិកា ចុងឆ្នាំ២០២៣៕
