ឯកឧត្តម អ៊ូច ភា អញ្ជើញពិនិត្យដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៃមណ្ឌលភូមិភាគ៥ ក្នុងខេត្តតាកែវ
ភ្នំពេញ៖នៅព្រឹកថ្ងៃអាទិត្រ ទី២៥ ខែកុម្ភៈ ឆ្នាំ២០២៤នេះ ឯកឧត្តម អ៊ូច ភា អភិបាលនៃគណៈអភិបាលខេត្តតាកែវ រួមនឹងមន្រ្តីពាក់ព័ន្ធ បានអញ្ជើញចុះពិនិត្យដំណើរការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៃមណ្ឌលភូមិភាគ៥ នៅទីតាំងមជ្ឈមណ្ឌលគរុកោសល្យភូមិភាគខេត្តតាកែវ ស្ថិតក្នុងសង្កាត់រកាក្នុង ក្រុងដូនកែវ។
នៅក្នុងឱកាសនោះឯកឧត្តម អ៊ូច ភា អភិបាលខេត្ត ក៏បានណែនាំឲ្យមន្ត្រីពាក់ពន្ធ័ក៏ដូចអាជ្ញាធរដែនដី ត្រូវបន្តពង្រឹងសន្តិសុខសណ្តាប់ របៀបរៀបរយសាធារណៈឲ្យបានកាន់តែល្អប្រសើរថែមទៀត ដើម្បីធ្វើយ៉ាងណាអោយដំណើរការនៃកាបោះឆ្នោតជ្រើសតាំងសមាជិកព្រឹទ្ធសភា ប្រព្រឹត្តទៅដោយរលូនដើម្បីធានាបាននូវការបោះឆ្នោតមួយដែលសេរីត្រឹមត្រូវយុត្តិធម៏គ្មានការបំភិតបំភ័យឬគំរាមកំហែងក្នុងបរិបទប្រជាធិបតេយ្យសេរីពហុបក្ស។
បើយោងតាមការបញ្ជាក់ពីលោកស្រី ហែម បញ្ញា ប្រធានគណៈកម្មការរៀបចំការបោះឆ្នោតខេត្តតាកែវ បានឲ្យដឹងថា សម្រាប់ខេត្តតាកែវមានការិយាល័យបោះឆ្នោតចំនួន០២ ដែលមានអង្គបោះឆ្នោតជាតំណាងរាស្ត្រ និងសមាជិកក្រុមប្រឹក្សាឃុំសង្កាត់ទាំង៩៧ឃុំនឹង៣សង្កាត់ មានចំនួន ៧៤៤នាក់ មានគណបក្សនយោបាយចំនួន០៤ បានឈរឈ្មោះបោះឆ្នោត រួមមាន៖ ទី១.គណបក្សប្រជាជនកម្ពុជា, ទី២.គណបក្សហ៊្វុនស៊ិនប៉ិច, ទី៣.គណបក្សកម្លាំងជាតិ និងទី៤.គណបក្សឆន្ទៈខ្មែរ ព្រមទាំងមានអ្នកអង្កេតការណ៍មកពីអង្គការសង្គមស៊ីវិលចំនួន៤ មានចំនួន ១៥នាក់ ហើយចំពោះដំណើរការនៃការបោះឆ្នោតជ្រើសតាំងសមាជិព្រឹទ្ធសភានេះដែរ ពុំមានបាតុភាពអ្វីកើតឡើងនោះទេ គឺដំណើរការជាធម្មតា ក្នុងបរិយាកាសសប្បាយរីករាយ ៕
