សម្តេចព្រះមហាក្សត្រី ព្រះវររាជមាតាជាតិខ្មែរ យាងក្នុងព្រះរាជពិធីសម្ពោធជានិមិត្តរូប ព្រះរាជសមិទ្ធផល សម្តេចឪ សម្តេចម៉ែ
ភ្នំពេញ៖ នៅថ្ងៃទី២២ ខែកុម្ភៈ ឆ្នាំ២០២៤ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ព្រះអង្គបានសព្វព្រះរាជហឬទ័យ ប្រោសព្រះរាជទាន ដល់បងប្អូន សិស្សានុសិស្ស គ្រូបង្រៀន គ្រូពេទ្យ ប្រធានមណ្ឌលសុខភាព នាយកសាលា អាជ្ញាធរឃុំស្រុក តំណាងឲ្យគ្រប់សមាសភាពនៅឯមូលដ្ឋានខេត្តទាំង៤ មានខេត្តស្ទឹងត្រែង តាកែវ កំពង់ឆ្នាំង និងខេត្តកំពង់ស្ពឺ សរុបចំនួន ២៧នាក់ បានចូលក្រាបថ្វាយបង្គំគាល់ទទួលយកនូវព្រះរាជអំណោយសម្តេចឪ សម្តេចម៉ែ មានអគារមណ្ឌលសុខភាព អគារសិក្សា ផ្លូវលំ និងស្រះទឹក ពីអង្គសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ក្នុងព្រះរាជពិធីសម្ពោធជានិមិត្តរូបតាមរយៈពិព័រណ៍សមិទ្ធផលរូបភាពរបស់ក្រុមសម្តេចឪ ប្រោសព្រះរាជទានដល់ប្រជារាស្ត្រ ជាកូនចៅ ចៅទួតរបស់ព្រះអង្គ។
សម្តេចរាជបុត្រី ព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ, ឯកឧត្តមឧកញ៉ាមហាមន្ត្រី គុយ សុផល ឧត្តមប្រឹក្សាផ្ទាល់ព្រះមហាក្សត្រ និងជាទេសរដ្ឋមន្ត្រីទទួលបន្ទុកកិច្ចការទូទៅអមក្រសួងព្រះបរមរាជវាំង, ឯកឧត្តម ឈា ហន រដ្ឋមន្ត្រីអមក្រសួងព្រះបរមរាជវាំង និងមន្រ្តីសំខាន់ៗរបស់ក្រសួងព្រះបរមរាជវាំង បានយាង និងអញ្ជើញចូលរួមដង្ហែតាមព្រះរាជសកម្មភាពសម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ក្នុងព្រះរាជពិធីដ៏មានសារៈសំខាន់នេះផងដែរ។
សម្តេចព្រះមហាក្សត្រី ព្រះវររាជមាតាជាតិខ្មែរ សម្តេចម៉ែ សម្តេចយាយ សម្តេចយាយទួត ជាអម្ចាស់នៃយើង ព្រះអង្គសព្វព្រះរាជហឬទ័យ ប្រោសព្រះរាជទានដល់បងប្អូនប្រជារាស្ត្រ គ្រូបង្រៀន និងអាជ្ញាធរ មកពីខេត្តស្ទឹងត្រែង តាកែវ កំពង់ឆ្នាំង និងខេត្តកំពង់ស្ពឺ នៅពេលនេះ គឺជាភ័ព្វព្រេងសំណាង ដ៏ខ្ពង់ខ្ពស់ សម្រាប់បងប្អូនគ្រប់រូប ដែលមានឱកាសបានក្រាបថ្វាយបង្គំគាល់ ថ្វាយព្រះពរ ថ្វាយនូវសេចក្តីគោរពនឹករលឹកក្នុងមនោចេតនាគោរពអំណរ ព្រះរាជគុណដ៏ជ្រាលជ្រៅបំផុតថ្វាយសម្តេចព្រះមហាក្សត្រី ព្រះវររាជាមាតាជាតិខ្មែរ ដែលព្រះអង្គបានប្រោសព្រះរាជទាន នូវមហាម្លប់ដ៏ត្រជាក់ដល់ប្រជារាស្ត្រជាកូនចៅ ចៅទូតរបស់ព្រះអង្គ នៅទូទាំងព្រះរាជាណាចក្រកម្ពុជា។
សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យ ស្តេចយាងកាត់ខ្សែបូរជាបន្តបន្ទាប់ជានិមិត្តរូបនៃព្រះរាជពិធីសម្ពោធដោយ រូបភាពនូវព្រះរាជអំណោយដ៏ថ្លៃថ្លារបស់សម្តេចឪ សម្តេចម៉ែ មានស្តូបព្រះបរមឆាយាលក្ខ័ព្រះករុណា ព្រះបរមរតនកោដ្ឋ, មណ្ឌលសុខភាពព្រះនរោត្តម សីហនុរាជា និងសម្តេចព្រះវររាជមាតា នរោត្តម មុនិនាថ សីហនុ អូរស្វាយ, សាលាបឋមសិក្សាព្រះនរោត្តម សីហនុរាជា និងសម្តេចព្រះវររាជមាតា នរោត្តម មុនិនាថ សីហនុ អូរស្វាយ នៅឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង, វិទ្យាល័យព្រះនរោត្តម សីហនុរាជា និងសម្តេចព្រះវររាជមាតា នរោត្តម មុនិនាថ សីហនុ តុំ ស្ថិតក្នុងសង្កាត់រក្រៅ ក្រុងដូនកែវ ខេត្តតាកែវ, ផ្លូវលំក្រាលគ្រួសក្រហម មួយខ្សែ ប្រវែង ៣ពាន់ម៉ែត្រ ស្ថិតក្នុងឃុំត្រពាំងចាន់ ស្រុកបរិបូរណ៍ ខេត្តកំពង់ឆ្នាំង និងស្រះទឹក១កន្លែង មានទំហំបណ្តោយ ១០០ម ទទឹង ៧៥ម ជម្រៅ៣ម នៅឃុំទ័ពមាន ស្រុកថ្ពង ខេត្តកំពង់ស្ពឺ។
ព្រះរាជសមិទ្ធិផលទាំង៤កន្លែងខាងលើ មានតម្លៃសរុប ១១ ០៩២ ៨១៣ ២៥០ រៀល ស្មើនឹង ២ ៧៧៣ ២០៣ ដុល្លារសហរដ្ឋអាមេរិក។
ព្រះរាជអំណោយដ៏ឧត្តុងឧត្តមរបស់សម្តេចឪ សម្តេចម៉ែទាំង៤កន្លែងនេះ សម្តេចម៉ែ សម្តេចយាយ សម្តេចយាយទូតជាអម្ចាស់នៃយើង ព្រះអង្គប្រោសព្រះរាជទានជាឧត្តមប្រយោជន៍របស់ប្រជារាស្ត្រ ពិសេសសិស្សានុសិស្សនៅក្នុងខេត្តទាំង៤ បានប្រើប្រាស់ក្នុងការទទួលយកចំណេះដឹង ដើម្បីប្រែក្លាយទៅជាពលរដ្ឋដ៏ប្រសើរ ប្រកបដោយចំណេះដឹង និងសីលធម៌ខ្ពង់ខ្ពស់ក្នុងការចូលរួមចំណែកបម្រើប្រទេសជាតិយើងនៅពេលអនាគត។
ព្រះរាជសកម្មភាពដ៏ថ្លៃថ្លានេះ គឺបានបង្ហាញអំពីព្រះរាជហប្ញទ័យដ៏ខ្ពង់ខ្ពស់ថែមទៀត នៃ សម្តេចព្រះមហក្សត្រី ព្រះវររាជមាតាជាតិខ្មែរ ដែលព្រះអង្គបានគោរពដង្ហែតាមព្រះរាជគំរូវិរភាពដ៏ឧដុង្គឧត្តម របស់ព្រះករុណា ព្រះវររាជបិតាជាតិខ្មែរ ព្រះវររាជបិតាសុខាភិបាលជាតិ ព្រះបរមរតនកោដ្ឋ ជាទីសក្ការៈដ៏ខ្ពង់ខ្ពស់បំផុត ព្រះអង្គបានប្រោសព្រះរាជទាននូវព្រះរាជទ្រព្យដ៏ច្រើនសន្ធឹកសន្ធាប់ថ្លៃថ្លាជាបន្តបន្ទាប់ ដើម្បីជាឧត្តមប្រយោជន៍នៃការជួយសង្គ្រោះអាយុជីវិត ការថែបំប៉នសុខភាពប្រជារាស្ត្រទូទៅ ជាកូនចៅ ចៅទូតរបស់ព្រះអង្គ អោយមានសុខភាពមាំមួន ព្រោះថាសុខភាពគឺជាកត្តាសំខាន់ចាំបាច់បំផុត ប្រសិនបើយើងមានសុខភាពល្អ និងអាចសម្រេចទទួលបានជោគជ័យនូវគ្រប់ភារកិច្ច ៕
