អ្នកជំនាញអ៊ុយក្រែន៖ ការដកខ្លួនចេញពី Avdiivka មិនបណ្តាលឱ្យបរាជ័យជាយុទ្ធសាស្ត្ររបស់អ៊ុយក្រែនទេ
កៀវ៖ អ្នកជំនាញម្នាក់បានបញ្ជាក់ថា ការដកកងកម្លាំងអ៊ុយក្រែនចេញពីទីក្រុងសំខាន់មួយនៃ Avdiivka ក្នុងតំបន់ Donetsk ភាគខាងកើត នឹងមិននាំទៅដល់ការបរាជ័យជាយុទ្ធសាស្ត្ររបស់កងទ័ពអ៊ុយក្រែននោះទេ។
លោក Anton Naychuk នាយកមូលនិធិការទូតស៊ីវិលបានប្រាប់ស៊ីនហួថា ការដកទ័ពចេញពី Avdiivka ដោយសារតែខ្វះគ្រាប់រំសេវ គឺជាបទពិសោធន៍អវិជ្ជមាន ប៉ុន្តែវានឹងមិនមានសារៈសំខាន់ជាយុទ្ធសាស្ត្រនៅក្នុងសង្គ្រាមនោះទេ។
អ្នកវិភាគបានកត់សម្គាល់ថា កងកម្លាំងអ៊ុយក្រែនបានដកខ្លួនចេញពីទីក្រុងសំខាន់មួយទៀតនៃ Bakhmut កាលពីឆ្នាំមុន ប៉ុន្តែវាមិនបានបណ្តាលឱ្យមានការរីកចម្រើនយ៉ាងខ្លាំងនៃកងទ័ពរុស្ស៊ីនោះទេ។
យ៉ាងណាក៏ដោយ លោក Anton Naychuk បានចង្អុលបង្ហាញថា កងទ័ពរុស្ស៊ីអាចបន្តការវាយលុករបស់ខ្លួន និងបើកការវាយប្រហារទ្រង់ទ្រាយធំក្នុងទិសដៅជាច្រើន។
លោកបានបន្តថា ពួកគេអាចដាក់ពង្រាយអង្គភាពមួយចំនួនឡើងវិញពី Avdiivka ទៅទិសដៅ Vuhledar និងវាយប្រហារពី Bakhmut ទៅទិសដៅ Chasiv Yar។ ក្នុងពេលជាមួយគ្នានេះកងទ័ពរុស្ស៊ីនឹងព្យាយាមវាយលុកទីតាំងអ៊ុយក្រែននៅ Rabotyno ដើម្បីតម្រង់ជួរមុខនៅភាគខាងត្បូង។
ជាហេតុផលសំខាន់សម្រាប់វឌ្ឍនភាពយឺតរបស់អ៊ុយក្រែនក្នុងការវាយលុកកងកម្លាំងរុស្ស៊ី លោក Anton Naychuk បានបញ្ជាក់ថាដោយសារការខ្វះខាតគ្រាប់រំសេវ។
អ្នកជំនាញរូបនេះបានសង្កត់ធ្ងន់ថា ការពន្យារពេលក្នុងជំនួយយោធាពីសហរដ្ឋអាមេរិកធ្វើឱ្យស្មុគស្មាញដល់សមត្ថភាពរបស់កងកម្លាំងប្រដាប់អាវុធអ៊ុយក្រែនក្នុងការធ្វើសកម្មភាពការពារ និងរៀបចំសកម្មភាពប្រឆាំង។
លោកមិនបានច្រានចោលការពិតដែលថាស្ថានភាពកង្វះគ្រាប់រំសេវនឹងមិនប្រសើរឡើងសម្រាប់អ៊ុយក្រែនក្នុងពេលឆាប់ៗនេះទេ។
លោកបានបន្ថែមថា កង្វះខាតសក្តានុពលនៃកាំជ្រួចការពារដែនអាកាសនៅក្នុងប៉ុន្មានខែខាងមុខនេះ គឺជាសេណារីយ៉ូពិតប្រាកដដែលដាក់ទីក្រុងនានារបស់អ៊ុយក្រែន ក៏ដូចជាថាមពល និងវិស័យឧស្សាហកម្មប្រឈមនឹងហានិភ័យនៃការវាយប្រហារដោយមីស៊ីលរបស់រុស្ស៊ី។
លោកបានសង្កត់ធ្ងន់ថា កង្វះគ្រាប់រំសេវដែលអាចបណ្តាលឱ្យមានជនស៊ីវិលច្រើនជាងមុន និងធ្វើឱ្យទីតាំងសមរភូមិរបស់អ៊ុយក្រែនចុះខ្សោយ។
លោកបានអះអាងថា ទោះបីជាអ៊ុយក្រែនបានចុះហត្ថលេខាលើកិច្ចព្រមព្រៀងសហប្រតិបត្តិការសន្តិសុខជាមួយចក្រភពអង់គ្លេស អាល្លឺម៉ង់ បារាំង និងប្រទេសមួយចំនួនផ្សេងទៀតនៅអឺរ៉ុបក៏ដោយ ក៏អឺរ៉ុបមិនអាចប្រមូលធនធានយោធាឱ្យបានគ្រប់គ្រាន់ដើម្បីជួយអ៊ុយក្រែនបានឆាប់រហ័សនោះទេ។
អ្នកជំនាញរូបនេះបានបន្ថែមថា ការពន្យារពេលក្នុងការសម្រេចចិត្តរបស់សហរដ្ឋអាមេរិកលើការផ្គត់ផ្គង់គ្រាប់រំសេវដល់អ៊ុយក្រែននាពេលថ្មីៗនេះ គឺជាក្តីកង្វល់ដ៏ធំមួយទៀតសម្រាប់អាជ្ញាធរអ៊ុយក្រែន។
ប្រភព៖ Xinhua Net
ប្រែសម្រួលដោយ៖ ឡាយ លីហួ
