ឯកឧត្ដម ស្វាយ សំអ៊ាង៖ សម្តេចតេជោ ហ៊ុន សែន ជាមេដឹកនាំដ៏អស្ចារ្យក្នុងការដឹកនាំកសាងជាតិ ក្នុងសម័យទំនើបរយៈពេល ៥០០ឆ្នាំចុងក្រោយនេះ

ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្ត និងជាសមាជិកគណៈកម្មាធិការកណ្តាល និងប្រធានគណៈកម្មាធិការគណបក្សខេត្តស្ទឹងត្រែង បានបញ្ជាក់ថា សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ជាមេដឹកនាំដ៏អស្ចារ្យក្នុងការដឹកនាំកសាងជាតិដ៏កម្រិតកំពូល នៅក្នុងសម័យទំនើបរយៈពេល ៥០០ឆ្នាំចុងក្រោយនេះ។

ឯកឧត្ដមបានបញ្ជាក់បែបនេះ ក្នុងឳកាសអញ្ជើញក្នុងកិច្ចប្រជុំឃោសនាបោះឆ្នោតជាមួយសមាជិក សមាជិកានៃអង្គបោះឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភា អាណត្តិទី៥ ឆ្នាំ២០២៤ នៅគណៈបក្សស្រុកបុរីអូរស្វាយសែនជ័យ កាលពីថ្ងៃទី១៧ ខែកុម្ភៈ ឆ្នាំ២០២៤។

ឯកឧត្ដមស្វាយសំអ៊ាង បានឲ្យដឹងថា ប្រវត្តិសាស្ត្រសម័យទំនើប ចាប់រាប់ពីចុងសតវត្សរ៍ទី១៥ បើគិតពីប្រទេសកម្ពុជាវិញ រួមមាន សម័យក្រោយអង្គរ គឺសម័យចតុម្មុខ លង្វែក ឧត្តុង្គ និងសម័យបន្តបន្ទាប់មក មិនមានសម័យណា មានសន្តិភាពពេញលេញ ហើយយូរអង្វែង ដូចសម្តេចតេជោ ហ៊ុន សែន នោះទេ។ ជាមួយគ្នានេះ ក៏មិនមានសម័យណា ដែលប្រទេសកម្ពុជា មានប្រព័ន្ធគមនាគមន៍ខ្វែងខ្វាត់ មានផ្លូវហាយវេ និងមានផ្លូវល្បឿនលឿនតភ្ជាប់យ៉ាងរលោងស្រិលដូចជាសម័យសម្តេចតេជោ ហ៊ុន សែន ដែរ។

ឯកឧត្ដមបានលើកឡើងបន្តថា សម្តេចតេជោ ហ៊ុន សែន ប្រទេសកម្ពុជាមានអគារខ្ពស់ៗ នៅតាមរាជធានីភ្នំពេញ ឬក៏តាមប្រជុំជន ដែលមើលច្រឡំនឹងបណ្តាប្រទេសអភិវឌ្ឍផ្សេងៗទៀត ទៀតផង។ សម្តេចតេជោ ហ៊ុន សែន ប្រទេសកម្ពុជា សម្បូរបែបដោយម្ហូបអាហារ ប្រជាជនខ្មែរអាចចេញដំណើរដើរកម្សាន្តគ្រប់ទីកន្លែង គ្រប់ខេត្ត គ្រប់ខណ្ឌ និងរហូតធ្វើដំណើរកម្សាន្តនៅក្រៅប្រទេស យ៉ាងច្រើនកុះករ។

ឯកឧត្ដម ស្វាយ សមអ៊ាង បានបន្ថែមថា សម្តេចតេជោ ហ៊ុន សែន ធ្វើឱ្យប្រជាពលរដ្ឋមានឧបករណ៍ និងរបស់របរទំនើបៗប្រើប្រាស់ មានសាលារៀនស្អេកស្កេះនៅជិតផ្ទះប្រជាពលរដ្ឋ និងមាននិស្សិតបញ្ចប់ការសិក្សាមួយឆ្នាំៗ រាប់ពាន់ម៉ឺននាក់។ មានន័យថា ការអភិវឌ្ឍ និងការរីកចម្រើនរបស់សង្គមសេដ្ឋកិច្ចជាតិរបស់កម្ពុជា ដល់កម្រិតកំពូល មានតែនៅសម័យតេជោ ហ៊ុន សែន តែមួយគត់ ក្នុងរយៈពេល ៥០០ឆ្នាំចុងក្រោយនេះ។

ឯកឧត្ដម បញ្ជាក់ថា រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខហើយឥលូវនេះកំពុងតែមានរាជរដ្ឋាភិបាលបន្តវេន ដោយសម្តេចធិបតី ហ៊ុន ម៉ាណែត ជាប្រមុខដឹកនាំរាជរដ្ឋាភិបាល ដែលដឹកនាំប្រទេសកម្ពុជាអភិវឌ្ឍខ្ពស់បំផុតកម្រិតកំពូល។ ឥលូវនេះ អ្នកបន្តវេនជំនាន់ទី២ របស់គណបក្សប្រជាជនកម្ពុជា បានចាប់ផ្តើមចេញដំណើរហើយ ៦ខែ។

ឯកឧត្ដមបន្ថែមថា ក្រុមអ្នកដឹកនាំថ្មី នឹងនាំប្រទេសកម្ពុជា លឿនទៅមុខទៀត ដោយសារមានគ្រឹះរួចស្រេច ដោយសាររៀមច្បង កើតឡើងដោយសារការដឹកនាំរបស់សម្តេចតេជោ ហ៊ុន សែន៕