សម្តេចធិបតី៖ កម្ពុជាគ្មានជម្រើសទេ ត្រូវតែចាប់ជនជាតិតៃវ៉ាន់២នាក់ ដែលបំផ្លាញកិត្ដិយសកម្ពុជាយ៉ាងធ្ងន់ធ្ងរ

ភ្នំពេញ៖ ថ្លែងក្នុងពិធីបើកការដ្ឋានសាងសង់ស្ពានឆ្លងទន្លេបាសាក់ (ចាក់អង្រែក្រោម-ព្រែកប្រា) ស្ថិតក្នុងសង្កាត់ព្រែកប្រា ខណ្ឌច្បារអំពៅ នៅព្រឹកថ្ងៃទី១៩ ខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា កម្ពុជាគ្មានជម្រើសទេ ត្រូវតែចាប់ជនជាតិតៃវ៉ាន់២នាក់នោះ ដែលបានបំផ្លាញកិត្ដិយសរបស់កម្ពុជាយ៉ាងធ្ងន់ធ្ងរបំផុត តាមរយៈការថតរឿងចាប់ជំរិត ដើម្បីគ្រាន់តែចង់បាន View នៅលើប្រព័ន្ធអនឡាញ។

ជាមួយគ្នានេះ សម្តេចធិបតី ហ៊ុន ម៉ាណែត ក៏បានបញ្ជាក់ថា ប្រទេសកម្ពុជាយើងទទួលបានការយល់ច្រឡំដោយសារ ប្រព័ន្ធផ្សាយផ្សាយបរទេសមួយចំនួនដែលផ្សាយមិនបានគ្រប់ជ្រុងជ្រោយ និងបំផ្លាញមុខមាត់កម្ពុជា តាមរយៈការសម្តែងរឿងចាប់ជំរិត ការបូមឈាមលក់ ការដូរក្រលៀន និងការជួញដូរគ្រឿងញៀនជាដើម ដែលទង្វើទាំងអស់នេះ បានប៉ះពាល់ខ្លាំងណាស់ដល់ប្រទេសកម្ពុជា។

សម្តេចធិបតី ហ៊ុន ម៉ាណែត ក៏បានព្រមានចំពោះអ្នកទាំងឡាយណាដែលចង់បានការទស្សនាច្រើននៅលើបណ្តាញសង្គមដោយការបំផ្លាញមុខមាត់កម្ពុជា ថាពួកគេនឹងត្រូវទទួលរងវិធានការច្បាប់យ៉ាងតឹងរ៉ឹងបំផុត ជាពិសេសគឺពួកគេនឹងលែងបានចូលប្រទេសកម្ពុជាជារៀងរហូត ៕