រដ្ឋមន្ត្រីការបរទេសកម្ពុជា បំពាក់គ្រឿងឥស្សរិយយស សហមេត្រី ថ្នាក់មហាសេនា ជូនលោកជំទាវ ឯកអគ្គរដ្ឋទូតគុយបា ដែលបញ្ចប់អាណត្តិបេសកកម្មការទូតនៅកម្ពុជា
ភ្នំពេញ៖ នៅថ្ងៃទី១៥ ខែកុម្ភៈ ឆ្នាំ២០២៤ ឯកឧត្តម ឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេសកម្ពុជា បានបំពាក់គ្រឿងឥស្សរិយយស សហមេត្រី ថ្នាក់មហាសេនា ជូនលោកជំទាវ Liurka Rodríguez Barrios ឯកអគ្គរដ្ឋទូតគុយបាប្រចាំកម្ពុជា ដើម្បីជាការថ្លែងអំណរគុណ និងទទួលស្គាល់ចំពោះការរួមចំណែកដ៏សកម្មរបស់លោកជំទាវ ក្នុងការពង្រឹងទំនាក់ទំនងទ្វេភាគីរវាងព្រះរាជាណាចក្រកម្ពុជា និងសាធារណរដ្ឋគុយបា ក្នុងអាណត្តិរបស់លោកជំទាវ។
ឯកឧត្តម សុខ ចិន្តាសោភា បានសម្តែងនូវសេចក្ដីថ្លែងអំណរគុណ និងបានគូសបញ្ជាក់អំពីសម្ទុះនៃការរីកចម្រើនជាលំដាប់នៃទំនាក់ទំនងរវាងប្រទេសទាំងពីរ ព្រមទាំងបានរំលឹកឡើងវិញនូវព្រឹត្តិការណ៍ប្រវត្តិសាស្ត្រនៃការផ្លាស់ប្តូរទស្សនកិច្ចរបស់ថ្នាក់ដឹកនាំនៃប្រទេសទាំងពីរ ក្នុងប៉ុន្មានឆ្នាំចុងក្រោយនេះ។
ឯកឧត្តម ឧបនាយករដ្ឋមន្រ្តី ក៏បានកោតសរសើរផងដែរ ចំពោះទំនាក់ទំនងទ្វេភាគីដ៏រឹងមាំរវាងកម្ពុជា និងគុយបាលើវិស័យផ្សេងៗ រួមទាំង វិស័យកសិកម្ម សុខាភិបាល ពាណិជ្ជកម្ម ការវិនិយោគ និងកីឡា៕