ស្នងការខេត្តកំពត ជំរុញឲ្យមន្ត្រីនគរបាលទាំងអស់ ត្រូវយកចិត្តទុកដាក់លើការងារជំនាញរបស់ខ្លួន ដើម្បីមានការអភិវឌ្ឍ
ភ្នំពេញ៖ នាព្រឹកថ្ងៃអង្គារ ១៣កើត ខែបុស្ស ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី ២៣ ខែមករា ឆ្នាំ២០២៤ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានបើកកិច្ចប្រជុំត្រួតពិនិត្យលទ្ធផលការងារប្រចាំខែមករា ឆ្នាំ២០២៤ និងលើកទិសដៅអនុវត្តការងារបន្តខែខាងមុខ។
កិច្ចប្រជុំនេះក៏មានការអញ្ជើញចូលរួមពីលោក លោកស្រី ស្នងការរង លោកនាយ នាយរងការិយាល័យជំនាញ លោកមេបញ្ជាការវរសេនាតូចការពារព្រំដែនគោកលេខ៦០១ លោកអធិការ អធិការរង ទាំង០៩ ក្រុង ស្រុក និងលោកនាយប៉ុស្តិ៍នគរបាលរដ្ឋបាល ឃុំ សង្កាត់ទាំង៩៣ សរុបចំនួន ២៦៦នាក់។
ជាកិច្ចចាប់ផ្តើមលោកវរសេនីយ៍ឯក ដាន វុត្ថា ស្នងការរងទទួលផែនការងារសេនាធិការ បានឡើងអានរបាយការណ៍ បូកសរុបលទ្ធផលការងារប្រចាំខែមករា ឆ្នាំ២០២៤ ជូនអង្គប្រជុំ។
បន្ទាប់មកលោកអធិការនគរបាល ក្រុង ស្រុក បានឡើងធ្វើរបាយការណ៍បំពេញបន្ថែម ដោយលើកឡើង ពីការងារសន្តិសុខ សណ្តាប់ធ្នាប់សុវត្ថិភាពក្នុងមូលដ្ឋានរបស់ខ្លួន ពិសេសការងារបង្ក្រាបបទល្មើសគ្រឿងញៀន បទល្មើសក្មេងទំនើង និងរាល់បទល្មើសផ្សេងៗ ក្នុងភូមិសាស្ត្រខ្លួន។
មតិចូលរួមរបស់លោកឧត្តមសេនីយ៍ត្រី ងឹម វេត ស្នងការរងទទួលផែនការ ងារសណ្តាប់ធ្នាប់ បានលើកឡើងករណីគ្រោះថ្នាក់ចរាចរណ៍ ដែលកើតឡើងក្នុងខេត្តកំពត។ ដោយប្រៀបធៀបគ្រោះថ្នាក់ចរាចរណ៍ក្នុងខែធ្នូ ឆ្នាំ២០២៣ និងខែមករា ឆ្នាំ២០២៤ ឃើញថាមានការកើនទ្បើង ៤ករណី បើប្រៀបធៀបទៅខែធ្នូ ឆ្នាំ២០២៣។ បានលើកឡើងពីករណីកកស្ទះ តាមបណ្តោយផ្លូវជាតិ(ផ្លូវជាតិលេខ៣) មូលហេតុកកស្ទះ មានទីប្រជុំជនច្រើន ពិសេសផ្សារឈូក ក្នុងស្រុកឈូក(កន្លែងលក់មាន់អាំង)។យើងត្រូវមានកម្លាំង និងមានវិធានការដោះស្រាយ។ គួរស្នើសុំដល់អភិបាលស្រុក ដើម្បីបង្កើតគណៈកម្មការចម្រុះមួយដោយមានអភិបាលរងស្រុកមួយរូប អ្នកដឹកនាំរួម សម្រាប់ការងារសម្រួលចរាចរណ៍ពេលកកស្ទះ ត្រូវរកផ្លូវវាងសម្រាប់ដោះការស្ទះ។
-មតិចូលរួមរបស់ឧត្តមសេនីយ៍ត្រី មិញ សុខេង ស្នងការរងទទួលផែនភស្តុភារ ហិរញ្ញវត្ថុ បានលើកឡើងពីគោលរបប ប្រាក់បៀវត្សប្រចាំខែ សម្រាប់កងកម្លាំង។
-មតិចូលរួរបស់លោកវរសេនីយ៍ឯក ទឹម សុភាព ស្នងការរងទទួលផែនប្រឆាំងគ្រឿងញៀន បានលើកឡើងចំណុចសំខាន់មួយចំនួន ជូនដល់អង្គប្រជុំ។
-ត្រូវយកចិត្តទុកដាក់កសាងសំណុំរឿងមុនបញ្ជូនទៅតុលាការ។
-ម៉ោងពេលឃាត់ខ្លួនត្រូវបញ្ជូនមកការិយាល័យឲ្យបានទាន់ពេលវេលា។
-ត្រូវគ្រប់គ្រងមុខសញ្ញាជួញដូរ ធ្វើបញ្ជីឲ្យបានច្បាស់លាស់។
-មុខសញ្ញាដែលនៅសល់ ត្រូវធ្វើសាវតារឲ្យបានច្បាស់លាស់។
-សំណូមពរលោកអធិការនៅជាប់ព្រំដែនវៀតណាម ត្រូវក្តាប់មុខសញ្ញា ដែលចុះតាមផ្លូវទឹក។
ប្រសាសន៍បូកសរុបនិងលើកទិសដៅអនុវត្តបន្ត របស់លោកឧត្តមសេនីយ៍ទោ ស្នងការ បានកោតសរសើរដល់កងកម្លាំង ដែលបានខិតខំប្រឹងប្រែងបំពេញការងារបានល្អប្រសើរ។ ពិសេសផែនការងារព្រហ្មទណ្ឌក្នុងការបង្រា្កបបទល្មើសបានជាច្រើន។
-កម្លាំងទាំងអស់ត្រូវយកចិត្តទុកដាក់ក្នុងការអនុវត្តវិន័យរបស់កងកម្លាំង។
-ពាក់ព័ន្ធកម្លាំងទាំងអស់ ទាំងកម្លាំងអធិការដ្ឋាន ត្រូវមានវត្តមានធ្វើការងារ និងតាមបណ្តាផែនត្រូវត្រួតពិនិត្យកម្លាំង។
-ណែនាំដល់កងកម្លាំងទាំងអស់ឲ្យជៀសផុតពីគ្រឿងញៀន បើរកឃើញមានករណីប្រើប្រាស់ ត្រូវធ្វើរបាយការណ៍ស្នើសុំកាត់ក្របខ័ណ្ឌចោលតែម្តង។
-សំណូមពរដល់លោកអធិការ ស្រុក ក្រុង ត្រូវយកចិត្តទុកដាក់ លើការងារក្តាប់សភាពការណ៍សន្តិសុខក្នុងភូមិសាស្ត្រខ្លួន។
មុនបញ្ចប់លោកឧត្តមសេនីយ៍ទោ ស្នងការ បានជំរុញឲ្យមន្ត្រីនគរបាល នៅតាមបណ្តាការិយាល័យជំនាញទាំងអស់ ត្រូវខិតខំយកចិត្តទុកដាក់ ទៅលើការងារជំនាញរបស់ខ្លួន ដើម្បីមានការអភិវឌ្ឍ និងសូមជូនពរដល់មន្ត្រីនគរបាលទាំងអស់ ឲ្យទទួលជោគជ័យគ្រប់ភារកិច្ច និងមានអាយុ វណ្ណៈ សុខៈ ពលៈកុំបីឃ្លៀងឃ្លាតឡើយ ៕
