ឯកឧត្តមបណ្ឌិតសភាចារ្យ ហង់ជួន ណារ៉ុន ជួបពិភាក្សាការងារជាមួយឯកឧត្តម Tete António រដ្ឋមន្ត្រីការបរទេស អង់ហ្គោឡា

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ដ្រីក្រសួងអប់រំ យុវជន និងកីឡា នាថ្ងៃទី១៩ ខែមករា ឆ្នាំ២០២៤ បានអនុញ្ញាតទទួលជួបឯកឧត្តម Tete António រដ្ឋមន្ត្រីការបរទេស អង់ហ្គោឡា និងជាប្រធានក្រុមប្រឹក្សានៃសហគមន៍អភិវឌ្ឍន៍អាហ្វ្រិកខាងត្បូង ក្នុងឱកាសនៃកិច្ចប្រជុំកំពូល 19th NAM Summit នៅទីក្រុងកាំប៉ាឡា សាធារណរដ្ឋអ៊ូហ្គង់ដា។

ក្នុង​ជំនួបនេះ ឯកឧត្តម បណ្ឌិតសភាចារ្យឧបនាយក រដ្ឋមន្ត្រី និង ឯកឧត្តម Tete António បានឯកភាពគ្នាក្នុងការឈានឆ្ពោះទៅពង្រឹងពង្រីកកិច្ចសហប្រតិបត្តិការទ្វេភាគីជារួម និងដោយឡែកទៅលើកិច្ចសហប្រតិបត្តិការវិស័យអប់រំ យុវជន និងកីឡា។

ជាមួយនេះដែរ ឯកឧត្តមបណ្ឌិត សភាចារ្យឧបនាយក រដ្ឋមន្ត្រី និងក្នុងនាមសម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា ក៏បានអញ្ជើញឯកឧត្តម Tete António រដ្ឋមន្ត្រីការបរទេស អង់ហ្គោឡា ធ្វើទស្សនកិច្ចផ្លូវការមកកាន់ប្រទេសកម្ពុជា ដើម្បីឱ្យប្រទេសទាំងពីរមានទំនាក់ទំនងគ្នាកាន់តែជិតស្និទលើកិច្ចសហប្រតិបត្តិការ និងភាពជាដៃគូយុទ្ធសាស្ត្រ ដែលមានសារៈសំខាន់សម្រាប់សន្តិភាព និងស្ថិរភាពក្នុងតំបន់។ ឆ្លើយតបនឹងការអញ្ជើញរបស់ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ឯកឧត្តម Tete António បានយល់ព្រមនឹងការធ្វើទស្សនកិច្ចមកកាន់ព្រះរាជាណាចក្រកម្ពុជានាពេលខាងមុខ។

ប្រទេសកម្ពុជា និង សាធារណៈរដ្ឋអង់ហ្គោឡា បានបង្កើតទំនាក់ទំនងការទូតជាលើកដំបូង នាចុងឆ្នាំ១៩៧៥​ និងភ្ជាប់ទំនាក់ទំនងការទូតជាថ្មីឡើងវិញក្នុងឆ្នាំ១៩៧៩ រហូតមកទល់បច្ចុប្បន្ន ដោយកំពុងពិភាក្សាអំពីកិច្ចសហប្រតិបត្តិការលើបេសកកម្មមួយចំនួនបន្ថែមទៀត ដូចជា ទស្សនកិច្ចសិក្សាផ្លាស់ប្តូរបទិសោធន៍គ្នា ការចុះអនុស្សរណៈយោគយល់ (MOU) ស្តីពីការពិគ្រោះយោបល់នយោបាយរវាងបរទេសទាំងពីរ កិច្ចព្រមព្រៀងស្តីពីការលើកលែងទិដ្ឋាការសម្រាប់អ្នកកាន់ការទូត និងសេវា/លិខិតឆ្លងដែនផ្លូវការរវាងប្រទេសទាំងពីរ និងកិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច បច្ចេកទេស និងហិរញ្ញវត្ថុ៕