ថ្នាក់ដឹកនាំ មន្ត្រីរាជការ ព្រមទាំងមន្ត្រីកិច្ចសន្យា នៃមន្ទីរការងាររាជធានីភ្នំពេញ ចូលរួមឈ្វេងយល់ពីបច្ចុប្បន្នភាព របបសន្តិសុខសង្គមសម្រាប់មន្ត្រីរាជការសាធារណៈ
ភ្នំពេញ៖ ដោយទទួលបានការអនុញ្ញាតពីសំណាក់ ឯកឧត្តម ម៉េង ហុង អគ្គនាយកបេឡាជាតិសន្តិសុខសង្គម (ប.ស.ស.)ស្តីទី នាថ្ងៃទី១៨ ខែមករា ឆ្នាំ២០២៤ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម ប.ស.ស. នៃក្រសួងការងារ និងបណ្តុះបណ្តាលវិជ្ជាជីវៈ បានធ្វើបទបង្ហាញស្តីពី បច្ចុប្បន្នភាពរបបសន្តិសុខសង្គមសម្រាប់មន្ត្រីរាជការសាធារណៈ និងសហព័ន្ធ ព្រមទាំងកូនក្នុងបន្ទុក ដល់ថ្នាក់ដឹកនាំ មន្ត្រីរាជការ និងមន្ត្រីកិច្ចសន្យានៃមន្ទីរការងារ និងបណ្ដុះបណ្តាលវិជ្ជាជីវៈរាជធានីភ្នំពេញ ដោយមានអ្នកចូលរួមប្រមាណជា ៦០រូប នៅសាលប្រជុំមន្ទីរការងារ និងបណ្ដុះបណ្តាលវិជ្ជាជីវៈរាជធានីភ្នំពេញ។
បទបង្ហាញខាងលើធ្វើឡើងក្នុងគោលបំណង បញ្ជ្រាបការយល់ដឹងឱ្យកាន់តែស៊ីជម្រៅច្បាស់លាស់បន្ថែមទៀតទៅលើរបបសន្តិសុខសង្គមសម្រាប់មន្ត្រីរាជការសាធារណៈ និងសហព័ន្ធ ព្រមទាំងកូនក្នុងបន្ទុក ក៏ដូចជានីតិវិធីផ្សេងៗទៀត។
ឆ្លៀតក្នុងឱកាសនោះលោក សុក បូរ៉ា បានធ្វើការពន្យល់លម្អិត ព្រមទាំងឆ្លើយតបទៅនឹងសំណួរសំខាន់ៗមួយចំនួនទាក់ទងទៅនឹងច្បាប់ ប.ស.ស. ក៏ដូចជាការអនុវត្តរបបសន្តិសុខសង្គមនៅប្រទេសកម្ពុជា ព្រមទាំងការផ្តល់សេវារបបសន្តិសុខសង្គម ដល់សមាជិករបស់ខ្លួន៕
