ឯកឧត្តម ញ៉ែម សំអឿន ជម្រុញក្មួយៗត្រូវបន្តខិតខំប្រឹងប្រែងសិក្សារៀនបន្ថែមទៀត នៅថ្នាក់ឧត្តមសិក្សា ជាពិសេសជំនាញបច្ចេកវិទ្យា និងភាសាបរទេស ដើម្បីរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ

ភ្នំពេញ៖ ក្នុងជំនួបសំណេះសំណាលជាមួយសិស្សានុសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិដែលទទួលបាននិទ្ទេស A ចំនួន ១០នាក់ ដែលបានប្រារព្ធធ្វើឡើងនៅសាលប្រជុំអគារB សាលាខេត្ត នាព្រឹកថ្ងៃទី០៥ ខែ មករា ឆ្នាំ២០២៤ ឯកឧត្តម ញ៉ែម សំអឿន អភិបាលខេត្តរតនគិរី បានជម្រុញនិងលើកទឹកចិត្តដល់ក្មួយៗត្រូវបន្តខិតប្រឹងប្រែងសិក្សារៀន បន្ថែមទៀត នៅថ្នាក់ឧត្តមសិក្សា ជាពិសេសជំនាញបច្ចេកវិទ្យា និងភាសាបរទេស ដើម្បីរួមចំណែកជាមួយរាជរដ្ឋាភិបាល ក្នុងការអភិវឌ្ឍ ប្រទេសជាតិ។

ឯកឧត្តមអភិបាលខេត្ត បានបញ្ជាក់ថា រាជរដ្ឋាភិបាល នីតិកាលទី៧ នៃរដ្ឋសភា ដែលមានសម្តេចមហាបវរធិបតី ហ៊ុន ម៉ាណែត ជាប្រមុខបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលមានមុំមួយ គឺផ្តោតទៅលើការអភិវឌ្ឍមូលធនមនុស្ស គឺធនធានមនុស្សដែលមានទាំងសមត្ថភាពខ្ពស់ ចំណេះដឹង ជំនាញច្បាស់លាស់។ ដូច្នេះមានតែចំណេះដឹងទេដែលអាចអោយក្មួយៗអាចចូលរួមជាមួយរាជរដ្ឋាភិបាលប្រកបដោយប្រសិទ្ធភាពខ្ពស់ ឆ្ពោះទៅសម្រេចចក្ខុវិស័យ ប្រែក្លាយជាប្រទេស មានចំណូលមធ្យមកម្រិតខ្ពស់ នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

ឯកឧត្តម ញ៉ែម សំអឿន បានកោតសរសើរចំពោះសិស្សានុសិស្សទាំង១០នាក់ បើទោះបីជាក្មួយៗខ្លះ មានជីវភាពមិនសូវធូរធាក៏ដោយ ក៏មានឆន្ទៈក្នុងការខិតខំប្រឹងប្រែងរៀនសូត្រ បូកផ្សំជាមួយនឹងការជំរុញបន្ថែមពីលោកគ្រូ អ្នកគ្រូ និងមានការលើកទឹកចិត្តពីសំណាក់ឪពុកម្តាយ រហូតប្រឡងបាននិទ្ទេសA។

ឯកឧត្តមអភិបាលខេត្ត ក៏បានថ្លែងអំណរគុណដល់លោកគ្រូ អ្នកគ្រូ មាតាបិតា អាណាព្យាបាលសិស្ស ដែលតែងតែជំរុញលើកទឹកចិត្ត អប់រំកូនក្មួយ ក្នុងការសិក្សារៀនសូត្រ គួបផ្សំ និងការយកចិត្តទុកដាក់ខិតខំបង្ហាត់បង្រៀន អប់រំទូន្មានណែនាំឱ្យខិតខំរៀនសូត្រ ទើបបានទទួលលទ្ធផលផ្លែផ្កាដ៏ល្អនាពេលនេះ ស្របទៅនិងពាក្យស្លោក «អ្នកចេះគឺជាប់»។

នៅក្នុងឱកាសនេះ ឯកឧត្តមអភិបាលខេត្ត បានជូនរង្វាន់លើកទឹកចិត្តដល់ជ័យលាភីនិទ្ទេសA ទាំង១០នាក់ក្នុងម្នាក់ៗ ទទួលបានថវិកា៣០មុឺនរៀល និងកុំព្យូទ័រយួរដៃចំនួន ១គ្រឿង។ ជូនវិទ្យាល័យសម្តេចឪ-សម្តេចម៉ែ ២លានរៀល, ជូនមជ្ឈមណ្ឌលសាលារៀនគ្រូយើង ១លានរៀល, ជូនមន្ទីរអប់រំ យុវជន និងកីឡាខេត្តសម្រាប់ដឹកសិស្សទៅសំណេះសំណាលនៅភ្នំពេញ ១លានរៀល។ ដោយឡែក ឯកឧត្តម ឌុច ចាន់តូ អភិបាលរងខេត្ត ក៏បានឧបត្ថម្ភផ្ទាល់ខ្លួនដល់ជ័យលាភីទាំង១០នាក់ក្នុងម្នាក់ៗថវិកា ១០មុឺនរៀលផងដែរ។

បើតាមការលើកឡើងពីលោក ខាត់ សាម៉ាល់ ប្រធានមន្ទីរអប់រំ យុវជន និងកីឡា ខេត្តរតនគិរី បានឲ្យដឹងថា សិស្សានុសិស្សប្រឡងជាប់សញ្ញាបត្រមធ្យមសិក្សាទុតិយភូមិសម័យប្រឡង ០៦ វិច្ឆិកា ២០២៣ នៅទូទាំងខេត្តរតនគិរី មាន ចំនួន ១.៣៩៣នាក់ ស្នើនឹង ៧៥,២៦% ក្នុងនោះស្រី ៨០,០២%។ ប្រឡងជាប់និទ្ទេស A ចំនួន ១០នាក់, និទ្ទេស B ចំនួន ៤២នាក់, និទ្ទេស C ចំនួន ២៣២នាក់, និទ្ទេស D ចំនួន ៥៨៦នាក់, និទ្ទេស E ចំនួន ៥២៣នាក់ និងសិស្សានុសិស្សជាជនជាតិដើមភាគតិចចំនួន ៦០៩នាក់ផងដែរ ៕