អគ្គស្នងការដ្ឋាននគរបាលជាតិ រៀបចំប្រជុំបិទកិច្ចសវនកម្មផ្ទៃក្នុង សម្រាប់ការិយបរិច្ឆេទ២០២២ និងបណ្តាឆ្នាំពាក់ព័ន្ធ

ភ្នំពេញ៖ នាព្រឹកថ្ងៃព្រហស្បតិ៍ ៨រោច ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៤ ខែមករា ឆ្នាំ២០២៤ អគ្គស្នងការដ្ឋាននគរបាលជាតិ បានរៀបចំពិធីប្រជុំបិទកិច្ចសវនកម្មផ្ទៃក្នុង សម្រាប់ការិយបរិច្ឆេទ២០២២ និងបណ្តាឆ្នាំពាក់ព័ន្ធ ក្រោមអធិបតីភាពដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង ដោយមានការអញ្ជើញចូលរួមពី ឯកឧត្តម ឧត្តមសេនីយ៍ឯក ឡោ សុខឡេង អគ្គស្នងការរង តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការ នៃអគ្គស្នងការដ្ឋាននគរបាលជាតិ អគ្គនាយករង គណៈប្រតិភូសវនកម្មផ្ទៃក្នុង ប្រធាននាយកដ្ឋានចំណុះអគ្គស្នងការដ្ឋាននគរបាលជាតិ ព្រមទាំងមន្រ្តីពាក់ព័ន្ធជាច្រើនរូបទៀត។

ឆ្លៀតក្នុងឱកាសនោះ ឯកឧត្តម ឧត្តមសេនីយ៍ឯក ងួន ស្រេង អគ្គនាយកនៃអគ្គនាយកដ្ឋានសវនកម្មផ្ទៃក្នុង បានកោតសរសើរនិងវាយតម្លៃខ្ពស់ចំពោះថ្នាក់ដឹកនាំនិងមន្រ្តីនគរបាលជាតិចំណុះ អគ្គស្នងការដ្ឋាននគរបាលជាតិ ដែលបានខិតខំអនុវត្តតួនាទីប្រកបដោយស្មារតីទទួលខុសត្រូវ និងលះបង់ទាំងកម្លាំងកាយកម្លាំងចិត្តដើម្បីការពារប្រមុខថ្នាក់ដឹកនាំ ការពារសន្តិសុខសណ្តាប់ធ្នាប់ បង្រ្កាបបទល្មើសផ្សេងៗ ជាពិសេសបង្ក្រាបជនដែលបង្កភាពអសន្តិសុខនៅក្នុងមូលដ្ឋាន។

ឯកឧត្តម ឧត្តមសេនីយ៍ឯក អគ្គនាយក បានបញ្ជាក់បន្ថែមអំពីគោលបំណងនៃការធ្វើសវនកម្មផ្ទៃក្នុង គឺផ្តោតលើគោលការណ៍សំខាន់៣គឺ ការគ្រប់គ្រងបុគ្គលិក ការគ្រប់គ្រងហិរញ្ញវត្ថុ និងការគ្រប់គ្រងទ្រព្យសម្បត្តិរដ្ឋ ដើម្បីធានាបាននូវប្រតិបត្តិការប្រព័ន្ធគ្រប់គ្រងផ្ទៃក្នុងរបស់អង្គភាពនីមួយៗ ដំណើរការដោយមានប្រសិទ្ធភាព គណនេយ្យភាព និងភាពសន្សំសំចៃខ្ពស់ក្នុងការប្រើប្រាស់ធនធានរបស់អង្គភាព។

ឯកឧត្តម ឧត្តមសេនីយ៍ឯក អគ្គនាយក បានបន្តទៀតថា ដោយមានការបញ្ជាដឹកនាំដ៏មានឆន្ទៈ របស់ ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អតីត អគ្គស្នងការដ្ឋាននគរបាលជាតិ និងបន្ថែមលើការពង្រឹងប្រសិទ្ធភាពឱ្យកាន់តែប្រសើរឡើងបន្តទៀតរបស់ ឯកឧត្តម នាយឧត្តមសេនីយ៍ ស ថេត អគ្គស្នងការបន្តវេន ព្រមទាំងការខិតខំរបស់ថ្នាក់ដឹកនាំ អគ្គស្នងការរង ប្រធាននាយកដ្ឋាន កងកម្លាំងចំណុះអគ្គស្នងការដ្ឋាននគរបាលជាតិ។

បន្ថែមពីនេះទៀត ឯកឧត្តម ឧត្តមសេនីយ៍ឯក អគ្គនាយក បានពាំនាំអនុសាន៍ផ្តាំផ្ញើរបស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ ត្រូវប្រកាន់ភ្ជាប់អភិក្រមទាំង ៣ គឺ៖
-៣កុំ៖ កុំឈ្លោះគ្នា,កុំប៉ែងជើងគ្នា,កុំច្រណែនគ្នា
-៣គួរ៖ គួរស្រលាញ់គ្នា,គួរជ្រោមជ្រែងគ្នា,គួរសាទរគ្នា
-គប្បី១៖ គួរឱបដើមឈើក្រសួងមហាផ្ទៃឱ្យបានជោគជ័យ។

ជាកិច្ចបញ្ចប់ ឯកឧត្តម ឧត្តមសេនីយ៍ឯក អគ្គនាយក បានថ្លែងអំណរគុណដល់ ឯកឧត្តម ឧត្តមសេនីយ៍ឯក ឡោ សុខឡេង អគ្គស្នងការរង តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការ នៃអគ្គស្នងការដ្ឋាននគរបាលជាតិ ប្រធាននាយកដ្ឋាន នាយការិយាល័យ ព្រមទាំងមន្ត្រីជំនាញដែលបានសហការ សម្របសម្រួល ក្នុងកិច្ចធ្វើសវនកម្ម មានភាពរលូន ទទួលជោគជ័យ ប្រកបដោយការទទួលខុសត្រូវខ្ពស់ និងសូមប្រសិទ្ធពរជ័យ សិរីមង្គលក្នុងឆ្នាំថ្មី ២០២៤នេះ សម្រចបាននូវជោគជ័យថ្មីៗបន្ថែមទៀត និងសមប្រកបនូវពុទ្ធពរទាំងបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕