សម្តេចធិបតី៖ បឹងជើងឯក បានប្រែក្លាយពីកន្លែងវាលកប់ខ្មោច ក្នុងរបបខ្មែរក្រហ ទៅជាកន្លែងដែលរស់រវើក

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា តំបន់បឹងជើងឯក បានប្រែក្លាយពីកន្លែងវាលកប់ខ្មោច ប្រមាណ ២ម៉ឺននាក់ នៅក្នុងសម័យ ប៉ុលពត ទៅជាកន្លែងដែលរស់រវើក ។

ក្នុងឱកាសអញ្ជើញ សម្ពោធដាក់ឱ្យប្រើប្រាស់សមិទ្ធផល គម្រោងអភិវឌ្ឍន៍ប្រព័ន្ធបង្ហូរ ទឹកកង្វក់ក្នុងរាជធានីភ្នំពេញ នាថ្ងៃទី២៧ ខែធ្នូ ឆ្នាំ២០២៣នេះ សម្តេចធិបតី ហ៊ុន ម៉ាណែត មានប្រសាសន៍ថា «អ៊ុំ ពូ មីង បង ប្អូនថ្ងៃនេះមើលជុំវិញខ្លួនមើលបូកចូលគ្នាប្រហែលខ្ទង់ ៣ពាន់នាក់ជាង យកចំនួនហ្នឹងគុណនឹង៧ ឃើញ២ម៉ឺននាក់ ចំនួន២ម៉ឺននាក់ គឺចំនួនដែលអ្នករង់គ្រោះត្រូវបានគេយកមកវ៉ៃចោលនៅកន្លែងហ្នឹង ជំនាន់អា ពត យកពីគុកទួលស្លែងមកវ៉ៃចោលនៅកន្លែងហ្នឹង ២ម៉ឺននាក់ ។ កន្លែងនេះពីមុនគេហៅថាព្រៃខ្លោច អញ្ចឹងយើងឃើញប្រែប្រួលកន្លែងកប់ខ្មោច ២ម៉ឺននាក់ ត្រូវគេយកមកផ្តាច់ជីវិតកន្លែងនេះ ថ្ងៃនេះគឺជាកន្លែងដែលរស់រវើក»។

សម្តេចធិបតី បន្ថែមថា «បើគ្មានសង្គ្រាមផ្ទុះក្នុងទសវត្សទី៧០ គេមិនអាចចាប់គាត់២ម៉ឺននាក់ ហើយគ្មានខ្មែរក្រហម មកត្រួតត្រាហើយយក២ម៉ឺននាក់ មកវ៉ៃចោលនៅកន្លែងនេះនោះទេ នេះជាការពិត។ ប៉ុន្តែ បើយើងងាកត្រឡប់ក្រោយដឹងពីកន្លែងនេះ បានយើងស្ញប់ស្ញែង ប្រែក្លាយពីកន្លែងដែលគេយក ២ម៉ឺននាក់មកវ៉ៃចោល កន្លែងដែលស្ងាត់ជ្រងំឆ្នាំ១៩៧៩ កន្លែងកប់ខ្មោច ទៅជាកន្លែងដែលរស់រវើក»។

សម្តេចធិ​បតីលើកឡើងថា តំបន់បឹងជើងឯក ប្រសិនបើមើលនៅពេលបច្ចុប្បន្ននោះគិតថា ជាកន្លែងធម្មតា ប៉ុន្តែ បើក្រឡេកមើលពីអតីតកាលតំបន់នេះជាបឹង ប៉ុន្តែ បច្ចុប្បន្ននេះ​ទីតាំងនេះត្រូវបានស្ថាបនាផ្លូវជាច្រើនខ្សែរួចហើយ។ សម្ដេចថា ក្រោមម្លប់នេះសុខសន្តិភាព ស្ថិរភាពនយោបាយពេញលេញ បានប្រែក្លាយកន្លែងព្រៃខ្មោចទៅជាកន្លែងដែលរស់រវើក កន្លែងដែលសេដ្ឋកិច្ច កន្លែងដែលរដ្ឋាភិបាលកម្ពុជា និងជប៉ុន សម្ពោធសមិទ្ធផលជានិម្តិតរូបនៃចំណងការទូតរវាងប្រទេសទាំងពីរឱ្យរស់រវើកឡើងវិញ ៕