សម្តេចធិបតី៖ តំបន់ជើងឯកបានប្រែក្លាយពីកន្លែងដែលខ្មែរក្រហមយកមនុស្សទៅសម្លាប់មកជាតំបន់អភិវឌ្ឍន៍ ដោយសារកត្តាសុខសន្តិភាព

ភ្នំពេញ៖ ក្នុងឱកាសសម្ពោធដាក់ឱ្យប្រើប្រាស់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ ស្ថិតនៅក្នុងសង្កាត់ចាក់អង្រែលើ ខណ្ឌមានជ័យ នាព្រឹកថ្ងៃទី២៧ ខែធ្នូ ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា តំបន់ជើងឯកនេះ ពីមុនជាកន្លែងដែលខ្មែរក្រហមយកមនុស្សទៅសម្លាប់រាប់ម៉ឺននាក់ ប៉ុន្តែឥឡូវនេះ ក្លាយជាតំបន់រីកចម្រើនមានផ្លូវខ្វាត់ខ្វែង។

សម្តេចធិបតី ហ៊ុន ម៉ាណែត បានបន្តថា សមិទ្ធផលដែលយើងទទួលបានសព្វថ្ងៃនេះ កើតឡើងដោយសារកត្តាសុខសន្តិភាព ហើយដរាបណាសុខសន្តិភាពនៅតែរក្សាបាន តំបន់បឹងជើងឯក នឹងកាន់តែរីកចម្រើន។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា រាជរដ្ឋាភិបាលបានប្រែក្លាយតំបន់វាលសម្លាប់មនុស្សនៅបឹងជើងឯក ឲ្យទៅជាតំបន់អភិវឌ្ឍន៍ដែលបម្រើដល់ផលប្រយោជន៍សាធារណៈយ៉ាងសំខាន់នាពេលបច្ចុប្បន្ន និងទៅអនាគតផងដែរ ហើយសម្តេចបានអំពាវនាវឱ្យ កូនខ្មែរទាំងអស់ត្រូវឈប់កាប់ចាក់គ្នា ដើម្បីថែរក្សាសន្ដិភាព និងការអភិវឌ្ឍ ៕