នាយសេនាធិការយោធភូមិភាគទី៥ ជួបសំណេះសំណាលនិស្សិតនាយទាហានទ័ពជើងគោក ជំនាន់ទី១២ នៅទីបញ្ជាការកងការពារព្រំដែនលេខ៥០២

ភ្នំពេញ៖ ឧត្តមសេនីយ៍ទោ សេង ធារិន មេបញ្ជាការរង នាយសេនាធិការ យោធភូមិភាគទី៥ នៅថ្ងៃទី២៤ ខែធ្នូ ឆ្នាំ២០២៣ បានជួបសំណេះសំណាលជាមួយនិស្សិតនាយទាហានទ័ពជើងគោក ជំនាន់ទី១២ នៅទីបញ្ជាការកងការពារព្រំដែនលេខ៥០២ ស្ថិតក្នុងភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង។
ដែលបានបញ្ចប់ការចុះធ្វើកម្មសិក្សារយៈពេល ១៥ថ្ងៃ ដែលដឹកនាំដោយលោកឧត្តមសេនីយ៍ទោ ម៉ា សិទ្ធ នាយករងវិទ្យាស្ថានទ័ពជើងគោក នៅទិសទី៣ ប៉ៃលិន.សំឡូត យោធភូមិភាគទី៥ ក្នុងអង្គភាពវរសេនាតូចលេខ៥២៣ ចំណុះកងពលតូចថ្មើរជើងលេខ៥២ និងកងការពារព្រំដែនលេខ៥០២ ។

នៅក្នុងការជួបសំណេះសំណាលនាឱកាសនោះ តំណាងនិស្សិតបានអានរបាយការណ៍ស្តីពីសកម្មភាពចុះមកធ្វើកម្មសិក្សា ព្រមទាំងបានចូលរួមកសាងអង្គភាពដែលខ្លួនបានមកយកបទពិសោធន៍ការងារ ដើម្បីចងក្រងឯកសារ បញ្ចប់និក្ខេបបទ អោយបានគ្រប់ជ្រុងជ្រោយតាមតម្រូវការ។

លើសពីនោះតំណាងនិស្សិតបានថ្លែងអំណរគុណចំពោះថ្នាក់ដឹកនាំយោធភូមិភាគទី៥ មេបញ្ជាការកងពលតូចថ្មើរជើងលេខ៥២ និងមេបញ្ជាការកងការពារព្រំដែនលេខ៥០២ បានយកចិត្តទុកដាក់ចំពោះបេសកកម្មរបស់ប្អូនៗអស់ពីកម្លាំងកាយចិត្ត ទាំងការស្នាក់នៅ ធានាហូបចុក ការរស់នៅប្រចាំថ្ងៃ ហើយបានរួមចំណែកសម្របសម្រួល ដោះស្រាយបញ្ហា បង្កភាពងាយស្រួលដល់ក្រុមនិស្សិត រាល់ការផ្តល់ចំណេះដឹង បទពិសោធន៍ ឯកសារ នានាសម្រាប់សិក្សាស្វែងយល់។

ឧត្តមសេនីយ៍ទោ សេង ធារិន ជូនពរដល់និស្សិតនាយទាហានទ័ពជើងគោក ជំនាន់ទី១២ ទាំងអស់ ពេលទទួលភារកិច្ចថ្មី ត្រូវអនុវត្តបន្តលើការងារដឹកនាំគ្រប់គ្រងកម្លាំង និងកសាងពង្រឹងអង្គភាពរឹងមាំលើគ្រប់វិស័យ រក្សាសមិទ្ធផលចាស់បង្កើតសមិទ្ធផលថ្មី ត្រូវរួមសហការគ្នារក្សាសាមគ្គីឯកភាពផ្ទៃក្នុងឱ្យបានល្អជាប់ជានិច្ច និងខិតខំប្រឹងប្រែងបំពេញកិច្ចការងារនៅក្នុងអង្គភាពនីមួយៗ ប្រកបដោយស្មារតីទទួលខុសត្រូវខ្ពស់ សម្រាប់បង្កើនសមត្ថភាព ចំណេះដឹងបានកាន់តែច្រើន។

នាពេលបញ្ចប់លោកវរសេនីយ៍ទោ សៀម ប៊ុនស៊ីម មេបញ្ជាការកងការពារព្រំដែនលេខ៥០២ បានកោតសសើរ និងថ្លែងអំណរគុណដល់ប្អូនៗសម្រាប់ការសហការ ការជួយឧបត្ថម្ភ និងការយកចិត្តទុកដាក់ខិតខំប្រឹងប្រែង ក្នុងពេលបំពេញកិច្ចការងារប្រចាំថ្ងៃជាមួយអង្គភាពគ្រប់គោលដៅ ហើយទៅថ្ងៃខាងមុខពេលចេញទៅបម្រើតាមបណ្តាអង្គភាពផ្សេងៗ ពួកគាត់នឹងក្លាយជាអ្នកដឹកនាំបញ្ជាក្នុងអង្គភាព ចេះកសាងផែនការការងារឆ្លើយតបតាមបទបញ្ជារបស់ថ្នាក់លើដែលបានប្រគល់ជូន ទទួលបានជោគជ័យគ្រប់កិច្ចការងារ។