សម្ព័ន្ធសហជីពជាតិ និងអង្គការសមាគមពាក់ព័ន្ធនានា ជាដៃគូយ៉ាងសំខាន់ក្នុងសកម្មភាពផ្សព្វផ្សាយអំពីសិទ្ធិ និងផលប្រយោជន៍របស់បងប្អូនប្រជាពលរដ្ឋ ពិសេសបងប្អូនកម្មករនិយោជិត

ភ្នំពេញ៖ ឯកឧត្តម ម៉េង ហុង អគ្គនាយកបេឡាជាតិសន្ដិសុខសង្គមស្ដីទី នៃក្រសួងការងារ និងបណ្តុះបណ្តាលវិជ្ជាជីវៈ បានថ្លែងឡើងថា តំណាងសម្ព័ន្ធសហជីពជាតិ សហព័ន្ធសហជីពកម្មករសំណង់ និងព្រៃឈើកម្ពុជា អង្គការកម្មវិធីអភិវឌ្ឍន៍ធនធានយុវជន និងអង្គការ សមាគមពាក់ព័ន្ធនានា គឺជាដៃគូយ៉ាងសំខាន់ក្នុងសកម្មភាពផ្សព្វផ្សាយអំពីសិទ្ធិ និងផលប្រយោជន៍របស់បងប្អូនប្រជាពលរដ្ឋ ពិសេសបងប្អូនកម្មករនិយោជិត ក្នុងការទទួលបានការគាំពារ និងការយល់ដឹងកាន់តែច្បាស់អំពីអត្ថប្រយោជន៍របបសន្តិសុខសង្គម និងរីករាយទទួលយកនូវសមិទ្ធិផលនានារបស់រាជរដ្ឋាភិបាល នីតិកាលទី៧ ដែលបានដាក់ចេញនាពេលកន្លងមកនេះ។

ការថ្លែងឡើងបែបនេះ ក្នុងឱកាសដែលឯកឧត្តមអញ្ជើញជាអធីបតីបើកពិធីផ្សព្វផ្សាយស្ដីពីការអនុវត្តរបបសន្តិសុខសង្គម ផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស. ជូនដល់សម្ព័ន្ធសហជីពជាតិ សហព័ន្ធសហជីពកម្មករសំណង់ និងព្រៃឈើកម្ពុជា និងអង្គការកម្មវិធីអភិវឌ្ឍន៍ធនធានយុវជន នាព្រឹកថ្ងៃទី២៤ ខែធ្នូ ឆ្នាំ២០២៣នេះ។

ឯកឧត្តមអគ្គនាយកស្ដីទី បានបន្ដទៀតថា សម្រាប់គ្រប់អង្គការ សមាគម និងសហជីពពាក់ព័ន្ធទាំងអស់ ដែលមានបំណងចង់ឈ្វេងយល់ពីរបបសន្ដិសុខសង្គមដែលកំពុងអនុវត្តនាពេលបច្ចុប្បន្ន អាចអញ្ជើញមកជួបជុំគ្នានៅស្នាក់ការ ប.ស.ស. ដោយផ្ទាល់ ដែល ប.ស.ស. នឹងរៀបចំពិធីផ្សព្វផ្សាយជូនឱ្យចំគោលដៅនឹងទទួលបានចំណេះដឹងគ្រប់ៗគ្នា នឹងអាចបន្ដផ្សព្វផ្សាយបានឆាប់រហ័ស ទាន់ពេលវេលា អំពីគោលនយោបាយចម្បងសំខាន់ៗរបស់រាជរដ្ឋាភិបាល ពិសេសពាក់ព័ន្ធទៅនឹងវិស័យសន្តិសុខសង្គមកម្ពុជា។

ឯកឧត្តមអគ្គនាយកស្ដីទី បានបន្ថែមទៀតថា ក្នុងនាម ប.ស.ស. ជាសេនាធិការរបស់ក្រសួងការងារ និងបណ្តុះបណ្តាលវិជ្ជាជីវៈ សូមស្វាគមន៍រាល់កិច្ចសហប្រតិបត្តិការ ជាមួយភាគីសហជីព ក៏ដូចជាអង្គការសមាគមនានា ដើម្បីស្វែងរកដំណោះស្រាយ និងធ្វើសកម្មភាពរួមគ្នាឱ្យកាន់តែមានប្រសិទ្ធភាពសម្រាប់ជាប្រយោជន៍ជូនដល់បងប្អូនកម្មករនិយោជិត និងបងប្អូនប្រជាពលរដ្ឋ។

ជាមួយគ្នានេះ ឯកឧត្តមអគ្គនាយកស្តីទីក៏បានធ្វើការសំណូមពរ ដល់តំណាងសហជីព អង្គការ និងសមាគមពាក់ព័ន្ធទាំងអស់ ដែលជាអ្នកជួបផ្ទាល់ជាមួយបងប្អូនប្រជាពលរដ្ឋក្នុងមូលដ្ឋាន ពិសេសកម្មករនិយោជិត គឺសូមចូលរួមជាមតិកែលំអ នូវរាល់ចំណុចខ្វះខាតរបស់ ប.ស.ស. ដើម្បីឱ្យអង្គភាពបម្រើសេវាសាធារណៈជូនប្រជាពលរដ្ឋមួយនេះ មានឱកាសអាចពង្រឹងសមត្ថភាពបន្ថែមពីមួយថ្ងៃទៅមួយថ្ងៃ និងអាចបន្ដដំណើរឈានទៅមុខ កាន់តែល្អប្រសើរ ក្នុងការបម្រើផលប្រយោជន៍ជូនប្រជាពលរដ្ឋឱ្យបានគ្រប់ៗគ្នា។

សូមបញ្ជាក់ថា ពិធីផ្សព្វផ្សាយពេញមួយព្រឹកនេះ ក៏មានការធ្វើបទបង្ហាញដោយវាគ្មិនកិត្តិយស លោក សុក បូរ៉ា ប្រធាននាយកដ្ឋានតាវលិកសន្ដិសុខសង្គម ដែលមានការអញ្ជើញចូលរួមពី លោក លោកស្រីតំណាងសម្ព័ន្ធសហជីពជាតិ សហព័ន្ធសហជីពកម្មករសំណង់ និងព្រៃឈើកម្ពុជា អង្គការកម្មវិធីអភិវឌ្ឍន៍ធនធានយុវជន និងអង្គការ សមាគមពាក់ព័ន្ធនានាសរុបប្រមាណជាង ១០០នាក់ នៅទីស្នាក់ការកណ្តាល ប.ស.ស. រាជធានីភ្នំពេញ៕