ឯកឧត្តម ហេង សុផាន់ណារិទ្ធ អញ្ជើញបើកវេទិកាថ្នាក់ជាតិ ពិភាក្សាអំពីស្ថានភាពនៃអ្នកធ្វើការក្នុងវិស័យកសិឧស្សាហកម្មចំការចេក និងកៅស៊ូ

ភ្នំពេញ៖ នៅព្រឹកថ្ងៃសៅរ៍ ទី២៣ ខែធ្នូ ឆ្នាំ២០២៣ ឯកឧត្តមបណ្ឌិត ហេង សុផាន់ណារិទ្ធ អគ្គនាយករងបេឡាជាតិសន្តិសុខសង្គម តំណាងដ៏ខ្ពង់ខ្ពស់ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតី ក្នុងពិធីបើកវេទិកាថ្នាក់ជាតិស្តីពី “ការលើកកម្ពស់ការអនុវត្តកិច្ចគាំពារសង្គម និងសុវត្ថិភាពនៅកន្លែងការងារ ក្នុងវិស័យកសិឧស្សាហកម្មចំការចេក និងកៅស៊ូ” ។

ឯកឧត្តមបណ្ឌិត ហេង សុផាន់ណារិទ្ធ បានថ្លែងឡើងថា សិក្ខាសាលាថ្នាក់ជាតិនេះ ជាឱកាសមួយដ៏មានសារៈសំខាន់ដែលយើងទាំងអស់គ្នាជាភាគីពាក់ព័ន្ធអាចអង្គុយជជែកពិភាក្សាអំពីស្ថានភាព បញ្ហាប្រឈម ក៏ដូចជាតម្រូវការចាំបាច់ របស់កម្មករនិយោជិតដែលធ្វើការក្នុងវិស័យកសិឧស្សាហកម្មចំការចេក និងកៅស៊ូ នឹងរួមគ្នាដើម្បីដោះស្រាយ ពន្យល់ពីជំហាន ឬនីតិវិធីត្រូវអនុវត្ត ដើម្បីឱ្យពួកគាត់ទទួលបានសិទ្ធិជាមូលដ្ឋាន ទទួលបានកិច្ចគាំពារសង្គមពេញលេញ និងគោលការណ៍សុវត្ថិភាពនៅកន្លែងការងាររបស់ពួកគាត់។

ឯកឧត្តមបានបញ្ជាក់ឱ្យដឹងថា គិតត្រឹមខែវិច្ឆិកា ឆ្នាំ២០២៣នេះ សហគ្រាសក្នុងវិស័យកសិកម្ម កសិឧស្សាហកម្ម បានមកចុះបញ្ជីចំនួន ៣២៧សហគ្រាស ដែលក្នុងនោះរួមមានកម្មករនិយោជិតដែលកំពុងធ្វើការនៅតាមកសិដ្ឋានដាំដុះ ចិញ្ចឹមសត្វ ចិញ្ចឹមត្រី និងនេសាទត្រីទឹកសាប ទឹកប្រៃ ចំនួន ៤២ ៤០២នាក់ ស្មើនឹងប្រមាណជា២% នៃ សមាជិក ប.ស.ស. សរុបជាង ២លាននាក់ ដែលទទួលបានអត្ថប្រយោជន៍ពីរបបសន្ដិសុខសង្គម។

ឯកឧត្តមបណ្ឌិតអគ្គនាយករង បានបន្តទៀតថា សម្រាប់គោលនយោបាយរបស់រាជរដ្ឋាភិបាល នីតិកាលទី៧ ការពង្រឹងប្រព័ន្ធគាំពារសង្គម ការថែទាំសុខភាព ជាគោលដៅអាទិភាពមួយសម្រាប់ផ្ដល់ជូនប្រជាពលរដ្ឋគ្រប់ៗគ្នា ដោយឈរលើស្មារតី “មិនបោះបង់ពលរដ្ឋខ្មែរណាម្នាក់ឡើយ”។ ហើយកាលពីពេលថ្មីៗនេះ រាជរដ្ឋាភិបាលបានសម្រេចដាក់ឱ្យអនុវត្តរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត ដែលនេះជាការពង្រីកវិសាលការគ្របដណ្ដប់ជូនប្រជាពលរដ្ឋគ្រប់ៗគ្នា ឆ្លើយតបទៅនឹងតម្រូវការ និងសេចក្តីប្រាថ្នាចង់ក្លាយជាសមាជិក ប.ស.ស. ពីសំណាក់បងប្អូនប្រជាពលរដ្ឋ ជាពិសេសបុគ្គលស្វ័យនិយោជន៍ដែលជាអ្នកប្រកបរបររកស៊ីដោយខ្លួនឯង ប្តី ឬប្រពន្ធ និងកូនក្នុងបន្ទុក អាចទទួលបានការថែទាំសុខភាពនេះផងដែរ។

សូមបញ្ជាក់ថា៖ វេទិកាថ្នាក់ជាតិខាងលើនេះ មានការធ្វើបទបង្ហាញដោយវាគ្មិនកិត្តិយស លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គម ដែលប្រព្រឹត្តិទៅនៅព្រឹកថ្ងៃសៅរ៍ ទី២៣ ខែធ្នូ ឆ្នាំ២០២៣ នៅសណ្ឋាគារកាំបូឌីយ៉ាណា ក្រោមមូលនិធិគាំទ្រដោយអង្គការអុកស្វាម និងមានវត្តមានចូលរួមពី តំណាងក្រសួង-ស្ថាប័នពាក់ព័ន្ធ បណ្តាសមាគម អង្គការសង្គមស៊ីវិល ព្រមទាំងបងប្អូន កម្មករ កម្មការិនីចំការកៅស៊ូ និងចេក មកពីខេត្តកំពត កំពង់ចាម ក្រចេះ ត្បូងឃ្មុំ មណ្ឌលគិរី និងរតនគិរី សរុបប្រមាណជាង ១០០នាក់៕