លោកជំទាវកិត្តិបណ្ឌិត អ៊ឹង កន្ថាផាវី៖ ការលើកកម្ពស់បរិយាបន្នហិរញ្ញវត្តុ និងឌីជីថល ជាគន្លឹះសំខាន់មួយក្នុងការអភិវឌ្ឍសេដ្ឋកិច្ចគ្រួសារ និងអាជីវកម្មសម្រាប់ស្រ្តី

ភ្នំពេញ៖ នាថៃ្ងព្រហស្បតិ៍ ៩កើត ខែមិគសិរ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែធ្នូ ឆ្នាំ២០២៣ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានអញ្ជើញផ្ដល់កិត្តិយលចូលរួម សិក្ខាសាលាស្វែងយល់អំពីបរិយាបន្នហិរញ្ញវត្ថុ និងឌីជីថល ក្រោមគម្រោងស្តីពី “ការពង្រីកកាលានុវត្តភាពសម្រាប់ស្ត្រីនៅជនបទក្នុងវិស័យហិរញ្ញវត្ថុ និងឌីជីថល” ដោយទទួលបានកិច្ចការពីធនាគាជាតិកម្ពុជា រួមជាមួយការគាំទ្រពីក្រុមហ៊ុន VISA។

សិក្ខាសាលាស្វែងយល់មានគោលបំណង៖ ដើម្បីធ្វើការផ្សព្វផ្សាយ និងលើកកម្ពស់ចំណេះដឹងហិរញ្ញវត្ថុ និងឌីជីថលសម្រាប់ស្រ្តីមួយចំនួននៅជនបទ ជាពិសេសថ្នាក់ធ្វើសេចក្តីសម្រេចក្នុងការតាក់តែងគោលនយោបាយ និងកម្មវិធីគាំទ្រនានា បានគិតគូនិងឆ្លើយតបអោយស្របតាមតម្រូវការរបស់ស្រ្តីនៅតាមជនបទ និងជាឧត្តមប្រយោជន៍ក្នុងការអភិវឌ្ឍជីវភាពគ្រួសាររបស់ស្រ្តី ដែលពាក់ព័ន្ធនឹងចំណេះដឹងផ្នែកហិរញ្ញវត្ថុ និងឌីជីថល ឱ្យកាន់តែប្រសើរ។

សិក្ខាសាលានេះក៏ផ្ដោតទៅលើ បញ្ហាប្រឈម កាលានុវត្តភាព និងដំណោះស្រាយនានា ពាក់ព័ន្ធនឹងចំណេះដឹងផ្នែកហិរញ្ញវត្ថុ និងឌីជីថល ដែលជាតម្រូវការចាំបាច់សម្រាប់ស្រ្តីនៅជនបទ។ អ្នកចូលរួមនឹងទទួលបានចំណេះដឹង និងវិធីសាស្ត្រក្នុងការលើកកម្ពស់ចំណេះដឹងហិរញ្ញវត្ថុ និងឌីជីថលសម្រាប់ ស្ត្រីនៅតាមជនបទ។

សមាសភាពអ្នកចូលរួមរួមមាន៖ ថ្នាក់ដឹកនាំ និងមន្ត្រីក្រសួងកិច្ចការនារី និងមន្ត្រីមន្ទីរកិច្ចការនារីខេត្តព្រៃវែង និងស្វាយរៀង តំណាងក្រុមហ៊ុនវីសា តំណាងក្រសួង ស្ថាប័នពាក់ព័ន្ធ តំណាងវិស័យជន តំណាងដៃគូអភិវឌ្ឍន៍ និងអង្គការសង្គមស៊ីវិល សរុបអ្នកចូលដោយផ្ទាល់ប្រមាណចំនួន ៨០នាក់ (ស្ត្រី៧០នាក់) និងចូលរួមតាមប្រព័ន្ធអនឡាញប្រមាណ ៨០នាក់បន្ថែមទៀត ៕