សម្តេចធិបតី៖ ការងាររាជរដ្ឋាភិបាល អាទិភាពធំគឺបង្កើនការងារក្នុងស្រុក តាមរយៈការខិតខំដើរទាក់ម៉ូយ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការងាររបស់រាជរដ្ឋាភិបាល អាទិភាពធំគឺបង្កើនការងារនៅក្នុងស្រុក តាមរយៈការខិតខំដើរទាក់ម៉ូយមកវិនិយោគនៅកម្ពុជា។

នាឱកាសអញ្ជើញជួបសំណេះសំណាលជាមួយបងប្អូនប្រជាពលរដ្ឋខ្មែរ នៅប្រទេសជប៉ុន នាថ្ងៃទី១៦ ខែធ្នូ ឆ្នាំ២០២៣នេះ
សម្តេចធិបតី ហ៊ុន ម៉ាណែត បញ្ជាក់ថា «ការបង្កើតការងាររបស់យើងក្នុងស្រុក អាទិភាពធំគឺនៅក្នុងស្រុក ខំបង្កើតការងារដែលខ្ញុំដើរទាក់ម៉ូយនឹង មិនមែនទាក់ម៉ូយអីទេ គឺយកក្រុមហ៊ុនពីខាងក្រៅដើម្បីភ្ជាប់ឱកាសមក ប៉ុន្តែភាគច្រើនយើងទាក់ម៉ូយទៅក្នុង ទាក់ម៉ូយហៅជប៉ុនទៅមើលសក្តានុពលនៅកម្ពុជា មើលវិនិយោគទុក យកបច្ចេកវិទ្យាទៅបណ្តុះបណ្តាលខ្មែរ ទៅបង្កើតការងារ ហើយ១០ ទៅ២០ឆ្នាំទៀត កូនខ្មែរអាចធ្វើជាវិស្វករអីបាន»។

សម្តេចធិបតី បានអំពាវនាវឲ្យបងប្អូនប្រជាពលរដ្ឋជឿទុកចិត្តចុះលើរាជរដ្ឋាភិបាលអាណត្តិទី៧ ដោយរាជដ្ឋាភិបាលនឹងនៅតែបន្តដឹកនាំតាមចក្ខុវិស័យដែលសម្តេចតេជោ បានកសាងប្រទេស ៤០ឆ្នាំ ជាមួយនឹងថ្នាក់ដឹកនាំជំនាន់មុន ដែលបានកសាងប្រទេសមកបានដូចនេះ ហើយនៅពេលដែលយើងមានសុខសន្តិភាព និងការអភិវឌ្ឍយើងត្រូវថែទាំឱ្យបាន ជាមួយនឹងការប្តេជ្ញាចិត្តធ្វើយ៉ាងណាឱ្យផលដែលបានត្រូវទៅឱ្យដល់ប្រជាពលរដ្ឋបានគ្រប់ទីកន្លែង ដែលមិនមែនប្រមូលផ្តុំក្នុងដៃអ្នកណាមួយនោះទេ គឺត្រូវទៅឱ្យដល់ដៃប្រជាពលរដ្ឋ ជាពិសេសប្រជាពលរដ្ឋដែលមានជីវភាពក្រីក្រ ដែលយើងត្រូវតែជួយឱ្យបានច្រើន។

សម្តេចធិបតី ហ៊ុន ម៉ាណែត លើកឡើងថា នៅលើពិភពលោកនេះគ្មានប្រទេសណាមួយ ដែលគ្មានប្រជាពលរដ្ឋធ្វើការប្រៅប្រទេសនោះទេ រួមទាំងជប៉ុនផងដែរ ជប៉ុនទៅធ្វើការជាច្រើន នៅសហរដ្ឋអាមេរិក, កូរ៉េ មកធ្វើការនៅជប៉ុន ខ្មែរទៅធ្វើការនៅកូរ៉េ។ ឥលូវទំនាក់ទំនងពាណិជ្ជកម្មសេរី គឺធ្វើយ៉ាងណាធានានៅលំហូរនៃទំនិញ និងមនុស្ស ព្រោះប្រទេសខ្លះ ទាក់ទងនឹងពលកម្មគេត្រូវធ្វើដូចនេះ ដើម្បីឱ្យលំនឹងពាណិជ្ជកម្មទាំងអស់បានផលទាំងអស់គ្នាផងដែរ៕