សម្តេចធិបតី ហ៊ុន ម៉ាណែត ចំអកឲ្យទណ្ឌិត សម រង្ស៉ី ថាស្ងាត់ជ្រាប ក្រោយពេលសម្តេចបង្ហាញនិក្ខេបបទថ្នាក់បណ្ឌិត

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងចំអកទណ្ឌិត សម រង្ស៉ី ថាស្ងាត់ជ្រាប ក្រោយពេលសម្តេចបង្ហាញនិក្ខេបបទថ្នាក់បណ្ឌិត ដែលអាចមានមូលហេតុពីរ ទី១. គឺនិក្ខេបបទនោះល្អ ទី២. គឺគាត់មិនយល់អំពីនិក្ខេបបទ។

ក្នុងពិធីសំណេះសំណាលជាមួយ​ប្រជាពលរដ្ឋខ្មែរ នៅប្រទេសជប៉ុន នាថ្ងៃទី១៦ ខែធ្នូ ឆ្នាំ២០២៣ សម្តេចធិបតី បញ្ជាក់ថា «កាលពុកជេរគាត់ថាអវិជ្ជា គាត់ជេរពុកថា មនុស្សអវិជ្ជាដឹកនាំប្រទេសថាមិនទៅមុខ ដល់ពេលខ្ញុំរៀនដល់ PhD ថាខ្ញុំនេះ អត់កំណើត ថាសញ្ញាបត្រពីរ ចុងក្រោយថា PhD របស់ខ្ញុំហ្នឹងគេសរសេរឱ្យ ដោយសារទៅសុំសាលាអត់បាន ខ្ញុំទ្រាំមិនបានខ្ញុំក៏បង្ហោះលើអ៊ីនធើណិត ឱ្យយកទៅមើលទៅ (ឥឡូវ)ស្ងាត់ជ្រាប»។

សូមបញ្ជាក់ថា កាលពីខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានបង្ហាញនិក្ខេបបទថ្នាក់អនុបណ្ឌិត និងថ្នាក់បណ្ឌិត ជាសធារណៈ បន្ទាប់ពីមានការស្នើសុំរបស់ លោក David Whitehouse អ្នកសារព័ត៌មានជនជាតិបារាំង បន្ទាប់ពីលោក អះអាងតាមរយៈលិខិតចំហរមួយថា លោកមានការពិបាកទទួលបានការចម្លងនិក្ខេបបទរបស់ សម្តេចនាយករដ្ឋមន្ត្រី ហ៊ុន ម៉ាណែត។

មុនមានការបង្ហាញជាសាធារណៈនេះ លោក សម រង្ស៉ី បានវាយប្រហារជាបន្តបន្ទាប់ចំពោះសញ្ញាបត្រនៅសាលាបណ្ឌិត្យយោធាអាមេរិក West Point របស់ សម្តេចធិបតី ហ៊ុន ម៉ាណែត ថាជាសញ្ញាបត្រក្លែងក្លាយ ឬជាសញ្ញាបត្រការទូត រហូតដល់ខាងសាលាចេញមកអះអាងបញ្ជាក់ការពិត និងការពារនិស្សិតរបស់ខ្លួនផងដែរ ៕