សម្ដេចធិបតី ហ៊ុន ម៉ាណែត បញ្ជូនសារទៅក្រុមប្រឆាំងថា ការសម្តែងមតិត្រូវធ្វើដោយថ្លៃថ្នូរ កុំឲ្យប៉ះពាល់ដល់មុខមាត់កម្ពុជា
ភ្នំពេញ៖ សម្ដេចមហាបវរធិបតី ហ៊ុន ម៉ាណែត បានបញ្ជូនសារទៅក្រុមប្រឆាំង ដែលគ្រោងប្រមូលគ្នាជេរសម្តេចថា ការសម្ដែងមតិការប្រឆាំងជំទាស់នឹងអ្វីមួយ គឺមិនខុសនោះទេ តែសូមកុំឱ្យបាក់មុខមាត់ប្រទេសរបស់យើង ។
ក្នុងពិធីសំណេះសំណាលជាមួយបងប្អូនប្រជាពលរដ្ឋខ្មែរ នៅប្រទេសជប៉ុន នាថ្ងៃទី១៦ ខែធ្នូ ឆ្នាំ២០២៣ សម្តេចធិបតីមានប្រសាសន៍ថា យើងត្រូវមានស្មារតីជាតិនិយម គឺការរួមគ្នាដើម្បីកសាងជាតិយើង និងលើកស្ទួយជាតិរបស់យើងទាំងអស់គ្នា។
សម្ដេចធិបតី ហ៊ុន ម៉ាណែត គូសបញ្ជាក់ថា សម្តេចបើកទូលាយសិទ្ធិឱ្យជេរសម្ដេច តែការសម្ដែងមតិគួរធ្វើឡើងក្នុងក្របខណ្ឌថ្លៃថ្នូរ កុំឱ្យបាក់មុខប្រទេសជាតិ។ ការជំទាស់ និងមិនគាំទ្រ គឺជារឿងរបស់បងប្អូន តែវត្តមានរបស់សម្ដេចនៅជប៉ុនពេលនេះ ជាសារបញ្ជាក់ថា ជប៉ុន ទទួលស្គាល់សម្ដេចជានាយករដ្ឋមន្ត្រី។
សម្ដេចធិបតី បន្ថែមថា ករណីដែលជប៉ុន និងអង្គការសហប្រជាជាតិ អញ្ជើញសម្តេចទៅចូលរួមកិច្ចប្រជុំនានា គឺជាសកម្មភាពដែលបង្ហាញពីការគោរពតាមមតិភាគច្រើន និងគោរពតាមលទ្ធិប្រជាធិបតេយ្យនៅកម្ពុជា ដែលកើតចេញពីការបោះឆ្នោត ដោយមានពលរដ្ឋជាង ៨,២ លាននាក់បានបោះឆ្នោតគាំទ្រគណបក្សប្រជាជនកម្ពុជា គាំទ្រសម្ដេចធិបតីជានាយករដ្ឋមន្ត្រី៕
